ନୂଆଦିଲ୍ଲୀ: କୋରୋନା ସମ୍ମୁଖ ଯୋଦ୍ଧାଙ୍କ ପାଇଁ ଆରମ୍ଭ ହେବ କ୍ରାସ କୋର୍ସ କାର୍ଯ୍ୟକ୍ରମ । ଆଜି(ଶୁକ୍ରବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନଫରେନ୍ସିଂ ଜରିଆରେ ଏହି କାର୍ଯ୍ୟକ୍ରମର ଶୁଭାରମ୍ଭ କରିବେ । ଏନେଇ ପ୍ରଧାନମନ୍ତ୍ରୀ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି ।
ଦେଶର 26ଟି ରାଜ୍ୟରେ ଥିବା 111ଟି ପ୍ରଶିକ୍ଷଣ କେନ୍ଦ୍ରରେ ଏହି କ୍ରାସ କୋର୍ସର ଶୁଭାରମ୍ଭ ହେବ । ତେବେ ଏହି କୋର୍ସର ଉଦ୍ଦେଶ୍ୟ ପ୍ରାୟ ଏକ ଲକ୍ଷ କୋଭିଡ ଯୋଦ୍ଧାଙ୍କ ଦକ୍ଷତା ବୃଦ୍ଧି କରିବା । ଏଥିରେ ସମ୍ପୃକ୍ତ ଯୋଦ୍ଧାଙ୍କୁ ଗୃହ ଚିକିତ୍ସା ସହାୟତା, ମୌଳିକ ଚିକିତ୍ସା ସହାୟତା, ଅତ୍ୟାଧୁନିକ ଚିକିତ୍ସା ସହାୟତା, ସାମ୍ପୁଲ ସଂଗ୍ରହ ସହାୟତା, ମେଡିକାଲ ଉପକରଣ ସହାୟତା ଆଦି ପ୍ରଶିକ୍ଷଣ ଦିଆଯିବ । ଏଥିରେ କେନ୍ଦ୍ର ଦକ୍ଷତା ବିକାଶ ମନ୍ତ୍ରୀ ଉପସ୍ଥିତ ରହିବେ ।
ଏହି କାର୍ଯ୍ୟକ୍ରମ ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନା 3.0ର ଏକ ମୁଖ୍ୟ ଉପାଦାନ ଭାବେ ପ୍ରସ୍ତୁତ କରାଯାଇଛି । ଏଥିରେ ମୋଟ 276 କୋଟି ବ୍ୟୟ କରାଯିବ ବୋଲି ପ୍ରଧାନମନ୍ତ୍ରୀଙ୍କ କାର୍ଯ୍ୟଳୟ ପକ୍ଷରୁ ସୂଚନା ମିଳିଛି । ସ୍ବାସ୍ଥ୍ୟ କ୍ଷେତ୍ରରେ ବର୍ତ୍ତମାନ ଓ ଭବିଷ୍ୟତର ମାନବ ସମ୍ବଳ ଆବଶ୍ୟକତା ପୂରଣ ଦିଗରେ ଦକ୍ଷ ଅଣ ସ୍ବାସ୍ଥ୍ୟକର୍ମୀ ସୃଷ୍ଟି କରିବାରେ ଏହି କାର୍ଯ୍ୟକ୍ରମ ସହାୟକ ହେବ ।
@ANI
