ନୂଆଦିଲ୍ଲୀ: ମୁକ୍ତିଲାଭ କରିବା ପର ଠାରୁ ଚର୍ଚ୍ଚାର କେନ୍ଦ୍ରରେ ଥିବା ବଲିଉଡର ବାସ୍ତବଧର୍ମୀ ଚଳଚିତ୍ର ‘ଦି କାଶ୍ମୀର ଫାଇଲ୍ସ’କୁ ନେଇ ଚର୍ଚ୍ଚା ଥମିବାର ନାଁ ନେଉନାହିଁ । ଅର୍ଥନୈତିକ ସଫଳତା ସାଙ୍ଗକୁ ବିଶ୍ବବ୍ୟାପୀ ଦର୍ଶକୀୟ ଆଦୃତି ପାଇଥିବା ଏହି ମୁଭିର ନିର୍ମାତା ଟିମକୁ ଚାରିଆଡୁ ଛୁଟିବାରେ ଲାଗିଛି ପ୍ରଶଂସାର ସୁଅ । ତେବେ ଏହାରି ମଧ୍ୟରେ ଆଉ ଏକ ଖବର ମଧ୍ୟ ସାମ୍ନାକୁ ଆସିଛି । ଉତ୍ତର ପ୍ରଦେଶରେ ଯୋଗୀ ସରକାରର ଦ୍ବିତୀୟ ପାଳି ଆରମ୍ଭ ହେବାକୁ ଯାଉଥିବାବେଳେ ଯୋଗୀଙ୍କ ଶପଥ ଗ୍ରହଣ ସମାରୋହକୁ ନିମନ୍ତ୍ରିତ ହୋଇଛନ୍ତି ଟିମ The Kashmir Files ।
ଆସନ୍ତାକାଲି (ଶୁକ୍ରବାର) ଭାରତରତ୍ନ ଅଟଳ ବିହାରୀ ବାଜପାୟୀ କ୍ରିକେଟ ଷ୍ଟାଡିୟମରେ ଏହି ଶପଥ ଗ୍ରହଣ ଉତ୍ସବ ଆୟୋଜିତ ହେବାକୁ ଥିବାବେଳେ ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ସମେତ କେନ୍ଦ୍ରୀୟ ବିଜେପି ନେତୃତ୍ବ ସାମିଲ ହେବେ । ତେବେ ଏହି ଚଳଚିତ୍ର ନିର୍ମାଣକାରୀ ଟିମ ସଦସ୍ୟଙ୍କୁ ମଧ୍ୟ ଏହି ମଞ୍ଚରେ ଦେଖିବାକୁ ମିଳିବ ।
ପ୍ରଧାନମନ୍ତ୍ରୀଙ୍କ ବ୍ୟତୀତ କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କ ସମେତ ଲୋକପ୍ରିୟ ଅଭିନେତା ଅକ୍ଷୟ କୁମାର, ବେନି କାପୁର, କଙ୍ଗନା ରାଣାଓ୍ବତ ମଧ୍ୟ ଏଥିରେ ଅଂଶଗ୍ରହଣ କରିବେ । ଅପରାହ୍ନରେ ଏହି ଶପଥ ଗ୍ରହଣ ଉତ୍ସବ ଆରମ୍ଭ ହେବା ନେଇ କାର୍ଯ୍ୟସୂଚୀ ସ୍ଥିରୀକୃତ ହୋଇଛି । କାର୍ଯ୍ୟକ୍ରମ ପାଇଁ ସମସ୍ତ ପ୍ରକାର ଆନୁସଙ୍ଗିକ ପ୍ରସ୍ତୁତି ଶେଷ ହୋଇଛି ।
ଷ୍ଟାଡିୟମରେ ପ୍ରାୟ ୨୦ ହଜାର ଅତିଥିଙ୍କ ବସିବା ପାଇଁ ଚେୟାରର ବନ୍ଦୋବସ୍ତ ହୋଇଛି । ପ୍ରଧାନମନ୍ତ୍ରୀ, କେନ୍ଦ୍ର ଗୃହମନ୍ତ୍ରୀ, ପାର୍ଟି ଅଧ୍ୟକ୍ଷଙ୍କ ସମେତ କେନ୍ଦ୍ରୀୟ ନେତା, ବହୁ ବିଶିଷ୍ଟ ବ୍ୟକ୍ତି ବିଶେଷଙ୍କ ସମତେ ପ୍ରଦେଶର ଅନେକ ପାର୍ଟି କର୍ମକର୍ତ୍ତା ସାମିଲ ହେବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
