ହାଇଦ୍ରାବାଦ: ଗାଆର ମୋପାରେ ମନୋହର ପାରିକର ଅନ୍ତର୍ଜାତୀୟ ବିମାନ ବନ୍ଦରର ଲୋକାର୍ପଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି (PM Modi inaugurates Mopa International Airport) । ମୋପାରେ ନିର୍ମାଣ କରାଯାଇଥିବା ଏହି ବିମାନ ବନ୍ଦରର ନାମ ପୂର୍ବତନ ଗୋଆ ମୁଖ୍ୟମନ୍ତ୍ରୀ ତଥା ପ୍ରତିରକ୍ଷା ମନ୍ତ୍ରୀ ମନୋହର ପାରିକରଙ୍କ ନାମରେ ନାମିତ କରାଯାଇଛି । ଏହି ଅନ୍ତର୍ଜାତୀୟ ବିମାନ ବନ୍ଦର ସାରା ବିଶ୍ବରେ ପର୍ଯ୍ୟଟନ କ୍ଷେତ୍ରରେ ସ୍ବତନ୍ତ୍ର ପରିଚୟ ପାଇଥିବା ପଶ୍ଚିମ ଉପକୂଳ ରାଜ୍ୟ ଗୋଆରେ ଏୟାର କନେକ୍ଟଭିଟି ଏବଂ ପର୍ଯ୍ୟଟନ ବୃଦ୍ଧି ଦିଗରେ ଏକ ସଫଳ ଭୂମିକା ଲିଭାଇବା ନେଇ ପ୍ରଧାନମନ୍ତ୍ରୀ ମୋଦି କହିଛନ୍ତି ।
ଏହି ଅବସରରେ ଲୋକାର୍ପଣ ସମାରୋହକୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦି କହିଛନ୍ତି, "ମୋପାରେ ଲୋକାର୍ପିତ ହୋଇଥିବା ଏହି ଅତ୍ୟାଧୁନିକ ବିମାନ ବନ୍ଦର ଗୋଆରେ ପର୍ଯ୍ୟଟନକୁ ବୃଦ୍ଧି କରିବା ସହିତ ଯୋଗାଯୋଗରେ ବୈପ୍ଳବିକ ପରିବର୍ତ୍ତନ ଆଣିବାକୁ ଯାଉଛି । ଏହାକୁ ଅତ୍ୟାଧୁନିକ ଭିତ୍ତିଭୂମି ସହ ବିକଶିତ କରାଯାଇଛି । ଦେଶରେ ଗତ 8ବର୍ଷ ମଧ୍ୟରେ ଏୟାର କନେକ୍ଟିଭିଟିକୁ ସୁଦୃଢ କରିବା ପାଇଁ କେନ୍ଦ୍ର ସରକାର ଏକାଧିକ କାର୍ଯ୍ୟକ୍ରମ ହାତକୁ ନେଇଛନ୍ତି । ବର୍ତ୍ତମାନ ସାରା ବିଶ୍ବରେ ଭାରତ ତୃତୀୟ ବୃହତ ଆଭିଏସନ ମାର୍କେଟ ହେବାକୁ ଯାଉଛି ।"
ଏହି ଅତ୍ୟାଧୁନିକ ଅନ୍ତର୍ଜାତୀୟ ବିମାନ ବନ୍ଦରରେ ମୋଟ 2,870 କୋଟି ଟଙ୍କା ବ୍ୟୟ ହୋଇଛି । 2016 ନଭେମ୍ବରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ବିମାନ ବନ୍ଦରର ଶିଳାନ୍ୟାସ କରିଥିଲେ । ଏହି ନୂତନ ଅନ୍ତର୍ଜାତୀୟ ବିମାନବନ୍ଦରଟି ଗୋଆର ଉତ୍ତରରେ ରହିଛି । ଯାହାକି ରାଜଧାନୀ ପାନଜୀଠାରୁ ପ୍ରାୟ 35 କିଲୋମିଟର ଦୂର । ଗାଆରେ ପୂର୍ବରୁ ଥିବା ବିମାନ ବନ୍ଦର ଏବେ କେବଳ ନୌସେନା ପାଇଁ ବ୍ୟବହାର ହେବ । ଏହି ନୂତନ ବିମାନ ସିଭିଲ ଆଭିଏସନ ଅପରେସନ ପାଇଁ ସମ୍ପୂର୍ଣ୍ଣ ଭାବେ ବ୍ୟବହାର କରାଯିବାକୁ ଭାରତୀୟ ବିମାନ ବନ୍ଦର ପ୍ରାଧିକରଣ (AAI) ସୂଚନା ଦେଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
