ନୂଆଦିଲ୍ଲୀ: ପଡୋଶୀ ଶ୍ରୀଲଙ୍କାରେ ଜାରି ରହିଥିବା ଆର୍ଥିକ ଓ ରାଜନୈତିକ ସଙ୍କଟ ମଧ୍ୟରେ ରାଷ୍ଟ୍ରପତି ଭାବେ ଶପଥ ଗ୍ରହଣ କରିଥିବା ରାନିଲ ବିକ୍ରମସିଙ୍ଘେଙ୍କୁ ଚିଠି ଲେଖି ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ପ୍ରଧାନମନ୍ତ୍ରୀ ନିଜ ଶୁଭେଚ୍ଛା ପତ୍ରରେ ଆର୍ଥିକ ସଙ୍କଟଗ୍ରସ୍ତ ଶ୍ରୀଲଙ୍କାକୁ ସମସ୍ତ ସହଯୋଗ କରିବା ପାଇଁ ମଧ୍ୟ ଆଶ୍ବାସନା ଦେଇଛନ୍ତି ।
ପ୍ରଧାନମନ୍ତ୍ରୀ ମୋଦି ପଡୋଶୀ ରାଷ୍ଟ୍ରପତି ବିକ୍ରମସିଙ୍ଘେଙ୍କୁ ଲେଖିଥିବା ଚିଠିରେ ଉଲ୍ଲେଖ କରିଛନ୍ତି,‘‘ଏକ ପ୍ରତିକୂଳ ତଥା ଘଡିସନ୍ଧି ମୁହୂର୍ତ୍ତରେ ଆପଣ ଶ୍ରୀଲଙ୍କାର 8ମ ରାଷ୍ଟ୍ରପତି ଭାବେ ସର୍ବୋଚ୍ଚ ପଦବୀ ଗ୍ରହଣ କରିଛନ୍ତି । ମୁଁ ଆଶା କରୁଛି ଆପଣଙ୍କ କାର୍ଯ୍ୟକାଳରେ ଶ୍ରୀଲଙ୍କାରେ ଆର୍ଥିକ ସ୍ଥିରତା ଫେରିବା ସହ ସାଧାରଣ ନାଗରିକଙ୍କ ଆଶା ମଧ୍ୟ ପୂରଣ ହେବ । ସେହିପରି ଆଗାମୀ ଦିନରେ ଦୁଇ ଦେଶ ମିଳିତ ସ୍ବାର୍ଥ ଦୃଷ୍ଟିରୁ ମଧ୍ୟ ସହଭାଗିତାରେ ଆଗକୁ ବଢିବା ନେଇ ମୁଁ ଆଶା କରୁଛି ’’।
ସେହିପରି ବର୍ତ୍ତମାନ ଜାରି ରହିଥିବା ସଙ୍କଟ ମଧ୍ୟରେ ଭାରତ, ଶ୍ରୀଲଙ୍କା ସହ ରହିଛି ଓ ସମସ୍ତ ଆବଶ୍ୟକୀୟ ସହଯୋଗ ଯୋଗାଇ ଆସିଛି । ଶ୍ରୀଲଙ୍କାରେ ଆର୍ଥିକ ପୁନଃରୁଦ୍ଧାର, ରାଜନୈତିକ ଓ ସାମ୍ବିଧାନିକ ସ୍ଥିରତା ବଜାୟ ରହିବା ନେଇ ଭାରତ ତାର ସମସ୍ତ ନୈତିକ ଦାୟିତ୍ବ ଜାରି ରଖିବ ବୋଲି ବିକ୍ରମସିଙ୍ଘେଙ୍କୁ ଆଶ୍ବସନା ଦେଇଛନ୍ତି ପ୍ରଧାନମନ୍ତ୍ରୀ ମୋଦି ।
ସ୍ବାଧୀନତା ପର ଠାରୁ ଦ୍ବୀପରାଷ୍ଟ୍ର ଶ୍ରୀଲଙ୍କା ସବୁଠୁ ବଡ ଆର୍ଥିକ ଅସ୍ଥିରତା ମଧ୍ୟରେ ଗତି କରୁଛି । ନିକଟତମ ପଡୋଶୀ ଭାବେ ଭାରତ ମଧ୍ୟ ଏପରି ସଙ୍କଟ ଆରମ୍ଭରୁ ନୈତିକ ଦାୟିତ୍ବ ତୁଲାଇ ଆସୁଛି । ପର୍ଯ୍ୟାୟ କ୍ରମେ ଏକାଧିକ ସିପମେଟରେ ନୂଆଦିଲ୍ଲୀ ପ୍ରାୟ 3.5 ମିଲିୟନ ଆମେରିକୀୟ ଡଲାର ମୂଲ୍ୟର (USD 3.5 billion) ସହାୟତା ଯୋଗାଇ ସାରିଛି । ଏହି ସହୟତା ରାଶି ମଧ୍ୟରେ ଇନ୍ଧନ, ଖାଦ୍ୟ ସାମଗ୍ରୀ, ଔଷଧ ଓ ଜରୁରୀ ଚିକିତ୍ସା ସାମଗ୍ରୀ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
