ହାଇଦ୍ରାବାଦ: ମୃତ୍ୟୁ କେବେ ଏବଂ କେଉଁ ସମୟରେ ଆସିବ ତାହା କେହି ଜାଣନ୍ତି ନାହିଁ । ହେଲେ ମୃତ୍ୟୁ କେତେ ଯେ ଭୟଙ୍କର ହୋଇପାରେ ତାହା ବୟାନ କରୁଛି ଦୁର୍ଘଟଣା ସମୟର ଏକ CCTV ଫୁଟେଜ । ହାଇଦ୍ରାବାଦ ମାଧପୁର ଠାରେ ଘଟିଛି ଏହି ମର୍ମନ୍ତୁଦ ଦୁର୍ଘଟଣା । ଯାହାକୁ ଦେଖିଲେ ଯକୌଣସି ଲୋକର ବି ଛାତି ଥରି ଉଠିବ । ରାତି ସମୟରେ ଏକ ଅଟୋ ଯାଉଥିବା ବେଳେ ପଛ ପଟୁ ଦ୍ରୁତଗତିରେ ଆସୁଥିବା ଏକ ଅଡି କାର ଅଟୋଟିକୁ ଧକ୍କା ଦେଇଥିଲା । ଫଳରେ ଅଟୋଟି ବହୁ ସମୟ ଧରି ରାସ୍ତା ଉପରେ ଘୁରି ବୁଲିଥିଲା ଏବଂ ଚୁରାମାର୍ ହୋଇ ଓଲଟି ପଡିଥିଲା । ଦୁର୍ଘଟଣାରେ ଅଟୋରେ ଥିବା ଜଣେ ଯାତ୍ରୀଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ ଅଟୋ ଚାଳକ ଗୁରୁତର ଆହତ ହୋଇଛନ୍ତି । ଦୁର୍ଘଟଣା ସମୟର ସିସିଟିଭ ଫୁଟେଜ ସାଇବରାବାଦ ପୋଲିସ ପକ୍ଷରୁ ଟ୍ବିଟରରେ ପୋଷ୍ଟ କରାଯାଇଛି ।
ସୂଚନାଯୋଗ୍ୟ, ସୁଜିତ୍ ଏବଂ ଆଶିଷ ନାମକ ଦୁଇ ଜଣ ଯୁବକ ରାୟଦୁର୍ଗମ ଅଞ୍ଚଳରେ ରହୁଥିବା ନିଜର ଏକ ସାଙ୍ଗ ଘରକୁ ରାତ୍ର ଭୋଜନ ପାଇଁ ଯାଇଥିଲେ । ସେଠାରେ ସେମାନେ ପ୍ରଚୁର ମାତ୍ରାରେ ମଦ ପିଇଥିଲେ ଏବଂ କିଛି ସମୟ ପରେ କାର ଧରି ଘର ଅଭିମୁଖେ ବାହାରିଥିଲେ । ନିଶାରେ ଚୁର୍ ସୁଜିତ ଖୁବ୍ ସ୍ପିଡରେ ଗାଡି ଚଳାଉ ଥିବାବେଳେ ଆଗରେ ଯାଉଥିବା ଏକ ଅଟୋକୁ ଧକ୍କା ଦେଇଥିଲେ । ସେ ଏତେ ଜୋରରେ ଅଟୋଟିକୁ ପିଟିଥିଲେ ଯେ ଅଟୋଟି ଅନେକ ସମୟ ଧରି ରାସ୍ତାରେ ଘୁରିବା ସହ ଓଲଟି ପଡିଥିଲା । ସେପଟେ ଦୁର୍ଘଟଣା ଘଟାଇ ସୁଜିତ ଓ ଆଶିଷ ଘଟଣାସ୍ଥଳରୁ ଫେରାର୍ ହୋଇଯାଇଥିଲେ ଏବଂ ଗାଡି ନମ୍ବର ପ୍ଲେଟକୁ ମଧ୍ୟ ହଟାଇ ଦେଇଥିଲେ । ହେଲେ ଘଟଣା ଜଣାପଡିବା ପରେ ପୋଲିସ ସେମାନଙ୍କ ନିକଟରେ ପହଞ୍ଚିଥିଲା । କିନ୍ତୁ ସୁଜିତଙ୍କ ବାପା ଆଉ ଜଣେ ଡ୍ରାଇଭରଙ୍କୁ ସେ ଦୁର୍ଘଟଣା କରିଥିବା କହି ପୋଲିସକୁ ବୁଝାଇବାକୁ ଚେଷ୍ଟା କରିଥିଲେ ।
ପୋଲିସ ଘଟଣାସ୍ଥଳର CCTV ଫୁଟେଜକୁ ଯାଞ୍ଚ କରିବା ସହ ପ୍ରକୃତ ଅଭିଯୁକ୍ତଙ୍କୁ ଧରିବାରେ ସକ୍ଷମ ହୋଇଛି । ଦୁର୍ଘଟଣା ଘଟାଇଥିବା ଉଭୟ ଯୁବକଙ୍କୁ ବର୍ତ୍ତମାନ ପୋଲିସ ହେପାଜତକୁ ନେଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
