ଲକ୍ଷ୍ନୌ: ଉତ୍ତରପ୍ରଦେଶ ସନ୍ଥ କବୀର ନଗରରେ ଜଣେ ଯୁବକ ନାବାଳିକାଙ୍କୁ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା । ମାମଲା ଥାନାରେ ପହଞ୍ଚିଥିଲା । ହେଲେ ପଞ୍ଚାୟତ ଘଟଣାର ଫଇସଲା କରିବାକୁ ନିଷ୍ପତ୍ତି ନେଇଥିଲା । ଦୁଷ୍କର୍ମକାରୀକୁ 1 ଲକ୍ଷ 25 ହଜାର କ୍ଷତିପୂରଣ ଦେବାକୁ ନିଷ୍ପତ୍ତି ଶୁଣାଇଛି ପଞ୍ଚାୟତ । ଏଠି ପ୍ରଶ୍ନ ଉଠୁଛି ଯେ ନ୍ୟାୟପାଳିକାକୁ ଟକ୍କର ଦେଇଛି ପଞ୍ଚାୟତ । ଜଣେ କିଶୋରୀକୁ ନ୍ୟାୟ ଦେବା ବଦଳରେ ଦୁଷ୍କର୍ମର ମୂଲ୍ୟ ନିର୍ଦ୍ଧାରଣ କରିଛି ପଞ୍ଚାୟତ ।
ସନ୍ଥ କବୀର ନଗର ଗାଁର 16 ବର୍ଷୀୟ ନାବାଳିିକାକୁ ସେହି ଗାଁର 18 ବର୍ଷୀୟ ଯୁବକ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା । ନାବାଳିକା ଜଣକ ନିତ୍ୟକର୍ମ ପାଇଁ ଯାଇଥିବା ସମୟରେ ଘଟଣା ଘଟିଥିଲା । କିଶୋରୀ ଜଣଙ୍କ ତାଙ୍କ ସହ ଘଟିଥିବା ଘଟଣା ନେଇ ଘରଲୋକଙ୍କୁ ଜଣାଇଥିଲେ । ପରିବାର ପୀଡିତାଙ୍କୁ ନେଇ ଥାନାରେ ପହଞ୍ଚିଥିଲେ । ଅଭିଯୁକ୍ତ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଥିଲେ । ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା ।
ଏହା ବି ପଢନ୍ତୁ...ବିହାରରେ ବିଶାକ୍ତ ମଦ ପିଇ ୯ ମୃତ, ୨୫ଜଣ ହରାଇଛନ୍ତି ଦୃଷ୍ଟିଶକ୍ତି
ଘଟଣାକୁ ନେଇ ବସିଲା ପଞ୍ଚୟାତ...
ପୀଡିତାଙ୍କ ଅଭିଯୋଗ କ୍ରମେ ପୋଲିସ ଅଭିଯୁକ୍ତକୁ ଥାନାକୁ ଡାକି କିଛି ଘଣ୍ଟା ଥାନାରେ ରଖି ଛାଡି ଦେଇଥିଲା । ମାତ୍ର ଏହାରି ଭିତରେ ହଠାତ୍ ମୁଣ୍ଡ ପୁରେଇଲା ପଞ୍ଚାୟତ । କାରଣ ଅଭିଯୁକ୍ତ ପ୍ରଭାବିଶାଳୀ ପରିବାରର ହୋଇଥିବାରୁ ମାମଲାକୁ ଆପୋଷ ବୁଝାମଣା କରିବାକୁ ନିଷ୍ପତ୍ତି ନେଇଥିଲା । ଗାଁର ପ୍ରତିଷ୍ଠିତ ବ୍ୟକ୍ତି ଏକାଠି ହୋଇଥିଲେ । ଦୁଇପକ୍ଷର ଲୋକେ ଆସିଲେ, ପଞ୍ଚାୟତ ବସିଥିଲା । ଉଭୟ ପକ୍ଷଙ୍କ କଥା ଶୁଣିବାର ଦୀର୍ଘ ସମୟ ପରେ ପଞ୍ଚାୟତ ନିଷ୍ପତ୍ତି ନେଇଥିଲା । ଶେଷରେ ପଞ୍ଚାୟତ ନିଷ୍ପତ୍ତି ଅନୁଯାୟୀ ଅଭିଯୁକ୍ତ ଜଣକ ପୀଡିତା ପରିବାରକୁ 1 ଲକ୍ଷ 25 ହଜାର ଟଙ୍କା କ୍ଷତିପୂରଣ ଦେବାକୁ କୁହା ଯାଇଥିଲା । ଏହାପରେ ପୀଡିତାଙ୍କ ପରିବାରକୁ ଟାଙ୍କା ମଧ୍ୟ ଦିଆଯାଇଥିଲା ।
ସେପଟେ ଏପରି କୌଣସି ଘଟଣା ଘଟିଥିବା ନେଇ ସୂଚନା ନଥବା କହିଛି ପୋଲିସ । ଏପରିକି ସେମିତି କିଛି ଘଟଣା ସାମ୍ନାକୁ ଆସିନାହିଁ, ଯଦି ସେମିତି ଅଭିଯୋଗ ଆସେ ତେବେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛି ପୋଲିସ । ଏଠାରେ ପୋଲିସ ପୀଡିତା ପରିବାରକୁ ନ୍ୟାୟ ଦେବା ବଦଳରେ ମାମଲାକୁ ରଫାଦଫା କରିବା ନିମନ୍ତେ ଚୁପ ରହିବା ଯୋଗୁଁ ଏହାର ଫାଇଦା ନେଇଛନ୍ତି କିଛି ସଂଭ୍ରାନ୍ତ ଶ୍ରେଣୀର ଲୋକେ । ଏହି ଘଟଣାରୁ ସ୍ପଷ୍ଟ ହୋଇଛି ଯେ, ଆଇନର ରକ୍ଷକ ଯଦି ଲୋକଙ୍କୁ ନ୍ୟାୟ ଦେବାରେ ବିଫଳ ହେବ ତେବେ ସାଧାରଣ ଲୋକେ ନ୍ୟାୟ ପାଇବାରୁ ବଞ୍ଚିତ ହେବେ ।
