ଶ୍ରୀନଗର: ଆଜି (ରବିବାର) ସନ୍ଧ୍ୟାରେ ଜାମ୍ମୁ କାଶ୍ମୀରରେ ସନ୍ଦେହଜନକ ଭାବେ ଏକ ବିମାନ ଆକୃତିର ପାକିସ୍ତାନୀ ବେଲୁନ ଠାବ କରାଯାଇଛି । ଏନେଇ ଏକ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେବାରେ ଲାଗିଛି । ପାକିସ୍ତାନ ଇଣ୍ଟରନ୍ୟାସନାଲ୍ ଏୟାରଲାଇନ୍ସ (PIA) ଲେଖାଥିବା ଏକ ବିମାନ ଆକୃତିର ବେଲୁନ ସ୍ଥାନୀୟ ଜଣେ ବାସିନ୍ଦାଙ୍କ ଘର ଛାତ ଉପରେ ଖସିପଡିଥିଲା । ଏହା ଠାବ ହେବା ପରେ ଏହା ପାକିସ୍ତାନର ଗୁପ୍ତଚର କାର୍ଯ୍ୟକଳାପ ବୋଲି ପ୍ରାଥମିକ ଭାବେ ସନ୍ଦେହ କରାଯାଉଛି ।
ସ୍ଥାନୀୟ ପୋଲିସ ପକ୍ଷରୁ ମିଳିଥିବା ସୂଚନା ଅନୁସାରେ, ଧଳା ଏବଂ ସବୁଜ ରଙ୍ଗର ଏହି ବେଲୁନଟି ବିମାନ ଆକାରର । ଏହି ସନ୍ଦେହଜନକ ବେଲୁନ୍ ଡୋମନା ସେକ୍ଟରେ ସୋହଲ ଲାଲ ଶର୍ମାଙ୍କ ପୁଅ ସୁରେଶ କୁମାର ଶର୍ମାଙ୍କ ଘରର ଛାତ ଉପରେ ଖସିପଡିଥିଲା । ଏହା ଦେଖି ଉକ୍ତ ଘରର ମାଲିକ ପୋଲିସକୁ ସୂଚନା ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି । ସେହି ବେଲୁନ ମଧ୍ୟରୁ କିଛି ବୈଦ୍ୟୁୁତିକ ସରଞ୍ଜାମ ମିଳିଥିବା ନେଇ କିଛି ସୂଚନା ନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
