ସିମଲା: ମଇ 8 ତାରିଖରେ ଧର୍ମଶାଳାରେ ହିମାଚଳପ୍ରଦେଶ ବିଧାନସଭା ମୁଖ୍ୟ ଫାଟକ ଓ ପାଚେରୀରେ ଦେଖିବାକୁ ମିଳିଥିଲା ଖଲିସ୍ତାନୀ ପତାକା । ଏ ନେଇ ତୀବ୍ର ଅସନ୍ତୋଷ ସୃଷ୍ଟି ହୋଇଥିଲା । ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ ହିମାଚଳପ୍ରଦେଶ ମୁଖ୍ୟମନ୍ତ୍ରୀ ଜୟରାମ ଠାକୁର । ଉକ୍ତ ଘଟଣାରେ ଆଜି ପଞ୍ଜାବରୁ ଜଣଙ୍କୁ ଗିରଫ କରିଛି ପୋଲିସ ।
ପୋଲିସର ସୂଚନାନୁସାରେ, ଗିରଫ ଅଭିଯୁକ୍ତଙ୍କ ନାମ ରାଜେନ୍ଦ୍ର ସିଂ । ଅଭିଯୁକ୍ତ ଜଣକ ଲୁଧିଆନା ଜିଲ୍ଲାର ମୋରିଣ୍ଡା ଜିଲ୍ଲାର ରୁପନଗରର ସୁଗର ବାସିନ୍ଦା। ଏହା ବ୍ୟତୀତ ହିମାଚଳ ପ୍ରଦେଶ ପୋଲିସ ମଧ୍ୟ ଆଜି (ବୁଧବାର) ରୋପଡ ଚାମକପୁର ଜିଲ୍ଲାର ପରମଜିତ ସିଂଙ୍କ ଘରେ ଚଢାଉ କରିଥିଲା। ମାତ୍ର ଅଭିଯୁକ୍ତ ପୋଲିସ କବଜାରେ ଆସିନଥିଲା । ମୋରିଣ୍ଡାଠାରେ ଧରାପଡିଥିବା ବ୍ୟକ୍ତି ଖଲିସ୍ତାନର ପତାକା ଲଗାଇବା ପାଇଁ ପଞ୍ଜାବରୁ ହିମାଚଳକୁ ଆସିଥିଲେ ଏବଂ ରାତିରେ ଧର୍ମଶାଳା ନିକଟରେ ଏକ ଘରେ ରହିଥିଲେ। ଏହା ପରେ ଏକ ସ୍କୁଟରରେ ବିଧାନସଭା ଭବନକୁ ଯାଇଥିଲେ ଏବଂ ରାତିରେ ପତାକା ଏବଂ କାନ୍ଥ କିଛି ଲେଖିବା ପରେ ସେ ଏକ ଭିଡିଓ ମଧ୍ୟ କରିଥିଲେ। ଫୋନ କଲ ତଥ୍ୟ ରେକର୍ଡକୁ ଆଧାର କରି ପୋଲିସ ଉକ୍ତ ବ୍ୟକ୍ତିଙ୍କୁ କାବୁ କରିଛି ।
ଧର୍ମଶାଳାରେ ଥିବା ବିଧାନସଭା ଅଟ୍ଟାଳିକାରେ କେବଳ ଶୀତ ଅଧିବେଶନ ଅନୁଷ୍ଠିତ ହେଉଥିବାରୁ ସେଠାରେ ସବୁ ସମୟରେ ପ୍ରାୟ ସୁରକ୍ଷା ବ୍ୟବସ୍ଥା ଦେଖିବାକୁ ମିଳେନାହିଁ । ତେଣୁ ସୁରକ୍ଷା ବ୍ୟବସ୍ଥାର ଅଭାବର ସୁଯୋଗ ନେଇ କିଛି ଖଲିସ୍ତାନୀ ସମର୍ଥକ ଏହି କାଣ୍ଡ ଘଟାଇଥିଲେ । ଗଣମାଧ୍ୟମରେ ଖବର ପ୍ରସାରିତ ହେବା ପରେ ସ୍ଥାନୀୟ ପ୍ରଶାସନ ଓ ପୋଲିସ ଉକ୍ତ ପତାକାକୁ ଗେଟ ଓ ପାଚେରୀରୁ ହଟା ଯାଇଥିଲା । ଏହା ପରେ ଘଟଣାର ତଦନ୍ତ ଆରମ୍ଭ କରିିଥିଲା ପୋଲିସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
