ନୂଆଦିଲ୍ଲୀ: ଅନ୍ତର୍ଜାତୀୟ ଯାତ୍ରୀବାହୀ ବିମାନ ସେବା ପୁନଃକାର୍ଯ୍ୟକ୍ଷମ କରିବା (international commercial flight Resumption) ନିଷ୍ପତ୍ତି ଉପରେ ବିଳମ୍ବ କରିଛି ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) । ଆଜି (ବୁଧବାର) ଏ ସମ୍ପର୍କରେ ଏକ ବିଜ୍ଞପ୍ତି ପ୍ରକାଶ କରି DGCA କହିଛି ନୂଆ କୋଭିଡ ପ୍ରଜାତିର ସଂକ୍ରମଣକୁ ଦୃଷ୍ଟିରେ ରଖି ଏ ଦିଗରେ ବିଚାରବିମର୍ଶ ଚାଲିଛି । ଖୁବଶୀଘ୍ର ଚୂଡାନ୍ତ ନିଷ୍ପତ୍ତି ପ୍ରକାଶ ପାଇବ ।
ଗତ ମାସର ଶେଷ ଭାଗରେ ଆନ୍ତର୍ଜାତୀୟ ବିମାନ ଉଡ଼ାଣ ଡିସେମ୍ବର 15 ରୁ ପୁଣିଥରେ ଆରମ୍ଭ ହେବା ନେଇ କେନ୍ଦ୍ର ସରକାର ସୂଚନା ଦେଇଥିଲେ । ତେବେ ପ୍ରାୟ 20 ମାସରୁ ଅଧିକ ସମୟ ଧରି ଅନ୍ତର୍ଜାତୀୟ ବିମାନ ସେବା ବନ୍ଦ ରହିବା ପରେ ପୁଣି କାର୍ଯ୍ୟକ୍ଷମ ହେବାକୁ ସ୍ଥିର କରାଯାଇଥିଲା । ତେବେ ନୂଆ ଭ୍ୟାରିଏଣ୍ଟ ଚିନ୍ତାଜନକ ସ୍ଥିତିରେ ଥିବା ଯୋଗୁ ଏହାର ପୁନଃ ଆରମ୍ଭ ନିଷ୍ପତ୍ତି ମଧ୍ୟ ଝୁଲିବାରେ ଲାଗିଛି ।
ନୂଆ ଭ୍ୟାରିଏଣ୍ଟ ଓମିକ୍ରନ (New covid variant Omicron) ର ଉତ୍ପତି ପରେ ସମସ୍ତ ଦେଶ ସୁରକ୍ଷା ଦୃଷ୍ଟିରୁ ଅନ୍ତର୍ଜାତୀୟ କଟକଣା ବଢାଇବା ସହ ଦକ୍ଷିଣ ଆଫ୍ରିକୀୟ ଦେଶମାନଙ୍କ ଉପରେ କଡା ନଜର ରଖିଛନ୍ତି । ତେବେ ଏକାଧିକ ଦେଶରେ ଏହି ନୂଆ ପ୍ରଜାତି ଚିହ୍ନଟ ହେବାରେ ଲାଗିଥିବାବେଳେ ବର୍ତ୍ତମାନ ପରିସ୍ଥିତିରେ ଅନ୍ତର୍ଜାତୀୟ ବିମାନ ସେବା ପୁନଃ ଆରମ୍ଭ କରିବା ନିଷ୍ପତ୍ତିର ପନଃସମୀକ୍ଷା କରୁଛି କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ।
ଆଜି ଏନେଇ DGCA ଦ୍ବାରା ଏକ ବିଜ୍ଞପ୍ତି ଜରିଆରେ ସଠିକ ସମୟରେ ବିମାନ ସେବା ଆରମ୍ଭ ହେବା ନେଇ ଚୂଡାନ୍ତ ନିଷ୍ପତ୍ତି ପ୍ରକାଶ ପାଇବ ବୋଲି ସୂଚନା ପ୍ରଦାନ କରାଯାଇଛି ।
ବ୍ୟୁରୋ ରିପୋର୍ଟ,ଇଟିଭି ଭାରତ
