ଏକ ସାଧାରଣ ବ୍ଲଡ ଟେଷ୍ଟ ଯଦି କରାଯାଏ, ତାହା ହେଲେ ନିର୍ଦ୍ଦିଷ୍ଟ ଧରଣର ବ୍ରେନ ଟ୍ୟୁମର ପାଇଁ ଆବଶ୍ୟକ ହେଉଥିବା ଇଂଟ୍ରୁସିଭ ସର୍ଜରୀ ଦରକାର ପଡିବ ନାହିଁ । କେତେକ କ୍ଷେତ୍ରରେ ଏହି ସର୍ଜରୀ ଦରକାର ପଡିବ ନାହିଁ । ଏକ ନୂଆ ଅଧ୍ୟୟନରୁ ଏହା ଜଣାପଡିଛି । ଗବେଷକମାନେ ଏକ ବାୟୋମାର୍କର ଆବିଷ୍କାର କରିଛନ୍ତି ଯାହା ପ୍ରୋଟିନ ଫିବୁଲିନ-୨ ( ଏଫବିଏଲଏନ୨) ନାଁରେ ପରିଚିତ । ଏହି ବାୟୋମେକର ବୟସ୍କଙ୍କ ମଧ୍ୟରେ ଦେଖାଯାଉଥିବା ମେନିନଜିଓମା ନାମକ ଏକ ସାଧାରଣ ବ୍ରେନ ଟ୍ୟୁମର ଗ୍ରେଡ୍ -୧ ନା ଗ୍ରେଡ୍ -୨, ତାହା ସ୍ଥିର କରିବ ।
ବ୍ରେନ ଟ୍ୟୁମରର ଗ୍ରେଡିଂ ଗୁରୁତ୍ୱପୂର୍ଣ୍ଣ । କାରଣ ଲୋୟର ଗ୍ରେଡ ଟ୍ୟୁମର ଦୀର୍ଘ ସମୟ ଧରି ସୁପ୍ତ ବା ନିଷ୍କ୍ରିୟ ଅବସ୍ଥାରେ ରହେ । ଏଥିପାଇଁ ହାଇରିସ୍କ ସର୍ଜରୀ ବା ରେଡିଓଥେରାପି ଓ କେମୋଥେରାପି ପରି କଠିନ ଓ କଷ୍ଟକର ଚିକିତ୍ସା ଦରକାର ପଡେ ନାହିଁ । ଗ୍ରେଡ୍-୨ ଟ୍ୟୁମର କର୍କଟରେ ପରିଣତ ହେବା ଆଶଙ୍କା ଥାଏ । ଏ ପ୍ରକାର ଟ୍ୟୁମର ପାଇଁ କଡା ଚିକିତ୍ସା ଦରକାର ପଡେ ।
ଗବେଷଣାରୁ ଏଫବିଏଲଏନ୨ ନାମକ ଏକ ନୂଆ ବାୟୋମାର୍କର ଚିହ୍ନଟ କରାଯାଇପାରିଛି,ଯାହା କି ମେନିନଜିଓମା ଗ୍ରେଡ୍ -୧ ଓ ଗ୍ରେଡ୍-୨ ବ୍ରେନ ଟ୍ୟୁମର ସଂପର୍କରେ ସୂଚନା ଦେଇପାରିବ । ଗ୍ରେଡ-୨ ମେନିନଜିଓମାରେ ତୁଳନାତ୍ମକ ଭାବେ ଅଧିକ ମାତ୍ରାରେ ବାୟୋମାର୍କର ଥାଏ ବୋଲ ବ୍ରିିଟେନର ପ୍ଲେମାଉଥ ବିଶ୍ୱବିଦ୍ୟାଳୟର ଗବେଷକ ସି. ଅଲିଭର ହାନିମାନ କହିଛନ୍ତି । ଗ୍ରେଡ -୨ ମେନିନଜିଓମା ରୋଗୀଙ୍କ ରକ୍ତ ନମୁନାରେ ଉଚ୍ଚମାତ୍ରାରେ ଏଫବିଏଲଏନ୨ ଚିହ୍ନଟ ହୋଇପାରିବ ବୋଲି ଗବେଷଣାରୁ ଜଣାପଡିଥିବା ହାନିମାନ ଦର୍ଶାଇଛନ୍ତି । ମେନିନଜିଓମାର ବୟୋମାର୍କର ଭାବେ ଏଫବିଏଲଏନ୨ର ଚିହ୍ନଟ ରୋଗ ଚିହ୍ନଟ ପ୍ରକ୍ରିୟାରେ ଉନ୍ନତି ଦୃଷ୍ଟିରୁ ବେଶ୍ ଗୁରୁତ୍ୱପୂର୍ଣ୍ଣ ବୋଲି ସେ କହିଛନ୍ତି ।
ଗବେଷକମାନଙ୍କ ମତରେ ମେନିନଜିଓମା ବିକାଶ ପଛରେ ବାୟୋମାର୍କର ଭୂମିକା ରହିଛି ବୋଲି ପୂର୍ବ ଗବେଷଣାରୁ ପ୍ରମାଣିତ ହୋଇ ନ ଥିଲା । ତେବେ, ଏହାକୁ ଅନ୍ୟାନ୍ୟ କ୍ୟାନସର ସହ ଯୋଡାଯାଇଥିଲା । ଟ୍ୟୁମର ସାମ୍ପଲ ବ୍ୟବହାର କରି ଲାବ୍ରୋଟୋରୀରେ କ୍ୟାନସର ସେଲ ସୃଷ୍ଟି କରାଯିବା ସହ ରୋଗୀଙ୍କଠାରୁ ଲିକ୍ୟୁଡ୍ ବାୟୋପସିସ୍ ସଂଗ୍ରହ କରାଯାଇ ଗବେଷଣା କରାଯାଇଥିଲା । ଏହି ଗବେଷଣା ସଂପର୍କିତ ରିପୋର୍ଟ ଜର୍ଣ୍ଣାଲ ଅଫ୍ ମୋଲିକ୍ୟୁଲାର ସାଇସେନ୍ସରେ ପ୍ରକାଶିତ ହୋଇଛି ।
