ମୁମ୍ବାଇ: ଆଟାକ ମୁଡରେ ଅଛନ୍ତି ନୱାବ ମଲିକ । ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ଉପରେ ଗର୍ଜିଛନ୍ତି ନୱାବ । “ମୁଁ ୬୨ ବର୍ଷ ଏହି ସହରରେ କାଟିଛି। ମୋ ଉପରକୁ ଆଙ୍ଗୁଠି ଉଠାଇବାକୁ ସାହସ କାହାର ନାହିଁ” ବୋଲି କହିଛନ୍ତି ନୱାବ । ନୱାବଙ୍କ ଅଣ୍ଡରୱାର୍ଲ୍ଡ ସହିତ ଲିଙ୍କ ଥିବା ପ୍ରମାଣ ଦେବେ ବୋଲି ଗତକାଲି ମହାରାଷ୍ଟ୍ର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ଅଭିଯୋଗ ଆଣିବାବେଳେ ଆଜି ଏପରି ଭାବେ ସଫେଇ ଦେଇଛନ୍ତି ନୱାବ ମଲିକ ।
ମୁମ୍ବାଇ ଡ୍ରଗ୍ସ ମାମଲାକୁ ନେଇ ତେଜୁଛି ରାଜନୀତି। ଏନ୍ସିପି ନେତା ନୱାବ ମଲିକ ଓ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ କଳି ଏବେ ଦାଣ୍ଡରେ ପଡ଼ି ହାଟରେ ଗଡୁଛି । ଭଭୟଙ୍କ ମଧ୍ୟରେ ଚାଲିଥିବା ତୁ ତୁ ମେଁ ମେଁ ଦିନକୁ ଦିନ ଭୟଙ୍କର ରୂପ ନେବାରେ ଲାଗିଛି । କେହି କାହାକୁ ଛାଡିବାକୁ ନାରାଜ । ପରସ୍ପର ପରସ୍ପରକୁ ପାଲଟା ଆକ୍ରମଣ କରିବାରେ ବ୍ୟସ୍ତ । ନୱାବ ମଲିକଙ୍କ ଅଣ୍ଡରୱାର୍ଲ୍ଡ ସହ ଲିଙ୍କ ଥିବା ଫଡନାଭିସ୍ କହିବା ପରେ ଆଜି ମୁହଁ ଖୋଲିଛନ୍ତି ନୱାବ ମଲିକ।
ସୋମବାର ନୱାବ ମଲିକ ଟ୍ବିଟ୍ କରି ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କୁ ଟାର୍ଗେଟ କରିଥିଲେ। ଡ୍ରଗ୍ସ ପେଡ୍ଲରଙ୍କ ସହ ତାଙ୍କ ସମ୍ପର୍କ ଥିବା ସେ ଅଭିଯୋଗ କରିଥିଲେ। ଟ୍ବିଟ କରି ନୱାବ ମଲିକ ଏକ ଫଟୋ ପୋଷ୍ଟ କରିଥିଲେ। ଫଟୋରେ ଦେବେନ୍ଦ୍ର ଫଡନାଭିସ, ତାଙ୍କ ପତ୍ନୀ ଅମୃତା ଫଡନାଭିସ ଏବଂ ଡ୍ରଗ୍ସ କାରବାର ମାମଲାରେ ବର୍ତ୍ତମାନ ଜେଲ୍ରେ ଥିବା ଜୟଦୀପ ରାଣା ନଜର ଆସିଛନ୍ତି।
ନୱାବ ମଲିକଙ୍କ ଏହି ଅଭିଯୋଗ ପରେ ଫଡନାଭିସ ତାଙ୍କ ଉପରେ ପାଲଟା ଅଭିଯୋଗ ଆଣିଥିଲେ। ତାଙ୍କୁ ଜବାବ ଦେଇ ଫଡନାଭିସ୍ କହିଥିଲେ ଯେ ତାଙ୍କ ପତ୍ନୀ ଅମୃତା ଏବଂ ଡ୍ରଗ୍ ବେପାରୀ ଜୟଦୀପ ରାଣାଙ୍କ ସହ ସେୟାର କରାଯାଇଥିବା ଫଟୋ ୪ ବର୍ଷ ପୁରୁଣା। ୪ ବର୍ଷ ପରେ ଏବେ କାହିଁକି ଏହି ଫଟୋ କଥା ମନେ ପଡିଲା ବୋଲି ଫଡନାଭିସ ମଲିକଙ୍କୁ ପ୍ରଶ୍ନ ପଚାରିଥିଲେ।
ବ୍ୟୁରୋ ରିପୋର୍ଟ,ଇଟିଭି ଭାରତ
