ବେଙ୍ଗାଲୁରୁ: ଜନଗହଳିପୂର୍ଣ୍ଣ ସ୍ଥାନରେ ଧୂମପାନ କଲେ ଧରିବ ମୋବାଇଲ ଆପ୍ । ଏଥିଲାଗି ଜିପିଏସ ବେସଡ୍ ମୋବାଇଲ ଆପ୍ 'ଷ୍ଟପ ଟୋବାକୋ' (GPS-based Stop Tobacco App) ନାମରେ ଏକ ମୋବାଇଲ ଆପ୍ ଲଞ୍ଚ କରିବାକୁ ଯାଉଛି କର୍ଣ୍ଣାଟକ ସରକାର । ଜନଗହଳିପୂର୍ଣ୍ଣ ସ୍ଥାନରେ ଧୂମପାନ ଏକ ଅପରାଧିକ କାର୍ଯ୍ୟ ହୋଇଥିବା ବେଳେ ଏପରି ଯିଏ କରିବ ତାକୁ ଏହି ମୋବାଇଲ ଆପ୍ ଧରିବ ବୋଲି ଜଣାପଡ଼ିଛି । ଏହି ଆପ୍କୁ ଖୁବଶୀଘ୍ର ରାଜ୍ୟ ସରକାର ଲଞ୍ଚ କରିବାକୁ ଯୋଜନା କରିଛନ୍ତି ।
କିପରି କାର୍ଯ୍ୟ କରିବ ଏହି ଆପ୍:-
ଏହି ଆପ୍ଟି ଜିପିଏସ ଟେକ୍ନୋଲୋଜି (GPS technology) ଉପରେ ଆଧାରିତ । ଆପ୍କୁ ଡାଉନଲୋଡ କରିବା ପରେ ସର୍ବସାଧାରଣ ସ୍ଥାନରେ ଯେପରିକି ଦୋକାନ, ହୋଟେଲ, ବିଦ୍ୟାଳୟ, କଲେଜ, ବସଷ୍ଟାଣ୍ଡ, ରେଳ ଷ୍ଟେସନ୍, ଖେଳ ପଡିଆ ଏବଂ ଅନ୍ୟାନ୍ୟ ଜନଗହଳି ପୂର୍ଣ୍ଣ ସ୍ଥାନ । ଏହିସବୁ ସ୍ଥାନରେ ନିୟମ ଉଲ୍ଲଘଂନ ହେଲେ ଧୂମପାନ କରୁଥିବା ବ୍ୟକ୍ତିର ଫଟୋ ଉଠାଇ ଏହି ଆପ୍ରେ ଅପଲୋଡ୍ କରି ହେବ । ଏହାପରେ ଅଭିଯୋଗକାରୀଙ୍କ ଜିଲ୍ଲା ଏବଂ ମୋବାଇଲ୍ ନମ୍ବର ଦେବା ଲାଗି ଏକ ଅପସନ୍ ରହିଛି ।
ଏହି ଅପସନ କ୍ଲିକ କରି ନିୟମ ଉଲ୍ଲଘଂନ ହେଉଥିବା ନିର୍ଦ୍ଦିଷ୍ଟ ସ୍ଥାନକୁ ଯାଇ ହେବ । ଏଥିଲାଗି ଆପ୍ରେ ନିର୍ଦ୍ଦିଷ୍ଟ ଅପସନ ମଧ୍ୟ ରହିଛି । ଏହି ଆପ୍ ଜିପିଏସ୍ ଆଧାରିତ ହୋଇଥିବାରୁ ଯେଉଁଠାରେ ଅଭିଯୋଗ ରହିଛି ସେହି ସ୍ଥାନଟି ମ୍ୟାପରେ ହାଇଲାଇଟ୍ ହେବ ଏବଂ ଜିଲ୍ଲା ତମାଖୁ ନିୟନ୍ତ୍ରଣ ଟିମ ଜାଣିପାରିବେ ଏବଂ ଘଟଣାସ୍ଥଳକୁ ଯାଇ ଜୋରିମାନା ଆଦାୟ କରିପାରିବେ ।
କୋଟା ଆକ୍ଟ -୨୦୦୩ ର ଧାରା-୪ ଅନୁଯାୟୀ ସର୍ବସାଧାରଣ ସ୍ଥାନରେ ଧୂମପାନ ନିଷେଧ । ଧାରା ୫ ତମାଖୁ ଦ୍ରବ୍ୟର ବିଜ୍ଞାପନକୁ ବାରଣ କରିଥାଏ । ସେହିପରି ସେକ୍ସନ-ଏ ନାବାଳିକା ମାନଙ୍କୁ ତମାଖୁ ଦ୍ରବ୍ୟ ବିକ୍ରୟ କରିବାକୁ ବାରଣ କରିଛି । ଧାରା ୬-ବି ଅନୁଯାୟୀ, ଶିକ୍ଷାନୁଷ୍ଠାନଗୁଡିକର ୧୦୦ ମିଟର ପରିସର ମଧ୍ୟରେ ତମାଖୁ ଦ୍ରବ୍ୟ ବିକ୍ରୟକୁ ମଧ୍ୟ ଅନୁମତି ଦିଆଯାଇ ନାହିଁ । ତେବେ ଏହି ଆପ୍ ଲଞ୍ଚ ହେବା ପରେ ସର୍ବସାଧାରଣ ସ୍ଥଳରେ ଧୂମପାନକୁ ରୋକାଯାଇପାରିବ ।
