ଲକ୍ଷ୍ନୌ: ସେରମ୍ ଇନଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ସିଇଓ ଆଦର ପୁନାୱାଲାଙ୍କ ସହିତ ୭ ଜଣଙ୍କୁ ସମନ୍ । କୋରୋନା ଟିକା କୋଭିଶିଲ୍ଡ ଭ୍ୟାକସିନ୍ ନେବାପରେ ଆଣ୍ଟିବଡି ତିଆରି ହୋଇନଥିବାରୁ ତାଙ୍କ ବିରୋଧରେ ସମନ ଜାରି ହୋଇଛି ।
ସୂଚନା ଥାଉକି, ଉତ୍ତର ପ୍ରଦେଶର ଲକ୍ଷ୍ନୌରେ ରହୁଥିବା ପ୍ରତାପ ଚନ୍ଦ୍ର କୋରୋନା ଭ୍ୟାକସିନ୍ ନେବାପରେ ତାଙ୍କର ଆଣ୍ଟିବଡି ତିଆରି ହୋଇନଥିଲା । ଯାହାଫଳରେ ସେ ଠକେଇ ମାମଲା ରୁଜୁ କରି ଲକ୍ଷ୍ନୌ ଜିଲ୍ଲା କୋର୍ଟର ଦ୍ବାରସ୍ଥ ହୋଇଥିଲେ । ଏହି ମାମଲାର ଶୁଣାଣି କରି ଲକ୍ଷ୍ନୌ ଜିଲ୍ଲା କୋର୍ଟ ସେରମ୍ କମ୍ପାନୀର ମାଲିକ ଆଦର ପୁନାୱାଲା, ଡ୍ରଗ୍ସ କନଟ୍ରୋଲୋର ଡାଇରେକ୍ଟର, ସ୍ବାସ୍ଥ୍ୟ ସଚିବ, ଆଇସିଏମ୍ଆର ଓ ଡବ୍ଳୁଏଚଓ ବିରୋଧରେ ଦାଖଲ ହୋଇଥିବା ଅଭିଯୋଗର ଶୁଣାଣି କରି ସମସ୍ତ ୭ ଜଣ ଅଭିଯୁକ୍ତଙ୍କୁ ଏପ୍ରିଲ ୧ ତାରିଖରେ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦେଇଛନ୍ତି ।
ପ୍ରତାପ ଚନ୍ଦ୍ର ନିଜ ଅଭିଯୋଗରେ କହିଛନ୍ତି ଯେ, ସେ 2021 ଏପ୍ରିଲ 8ତାରିଖରେ କୋଭିଶିଲ୍ଡ ଟିକାର ପ୍ରଥମ ଡୋଜ ନେଇଥିଲେ। ମାତ୍ର ଟିକା ନେବାର 28 ଦିନ ପରେ ସେ ଦ୍ବିତୀୟ ଡୋଜ ପାଇଁ ଯାଇଥିଲେ । କିନ୍ତୁ ଉକ୍ତ ଦିନ ତାଙ୍କୁ ଦ୍ବିତୀୟ ଡୋଜର ସମୟସୀମା ଛଅ ସପ୍ତାହ ପର୍ଯ୍ୟନ୍ତ ବୃଦ୍ଧି କରାଯାଇଥିବା କୁହାଯାଇଥିଲା । ଏହାପରେ ସରକାର କୋଭିସିଲ୍ଡ ଟିକାର ଦୁଇଟି ଡୋଜ ମଧ୍ୟରେ ସମୟ ବ୍ୟବଧାନକୁ 12 ସପ୍ତାହ ପର୍ଯ୍ୟନ୍ତ ବୃଦ୍ଧି କରିଥିଲେ ।
