ନୂଆଦିଲ୍ଲୀ: ପ୍ରକାଶ ପାଇଛି ଜାତୀୟ ସଂସ୍ଥାଗତ ରାଙ୍କିଂ ଫ୍ରେମଓ୍ବାର୍କ (NIRF)ର ରାଙ୍କିଂ ତାଲିକା 2023 । ଏଥିରେ ଆଇଆଇଟି ମାଡ୍ରାସ ସାମଗ୍ରିକ ଉଚ୍ଚ ଶିକ୍ଷାନୁଷ୍ଠାନ ବର୍ଗରେ ଶୀର୍ଷରେ ରହିଥିବା ବେଳେ ଦ୍ବିତୀୟ ସ୍ଥାନର ରହିଛି ପ୍ରତିଷ୍ଠିତ ଆଇଆଇଏସ ବେଙ୍ଗାଲୁରୁ । ଚଳିତବର୍ଷ NIRFର 8ମ ସଂସ୍କରଣକୁ ଆଜି କେନ୍ଦ୍ର ଶିକ୍ଷା ମନ୍ତ୍ରଣାଳୟ ପ୍ରକାଶ କରିଛି । ଏହି ତାଲିକା କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଦିଲ୍ଲୀରେ ଉନ୍ମୋଚନ କରିଛନ୍ତି । ଆଇଆଇଟି ମାଡ୍ରାସ ନିର୍ଦ୍ଦେଶକ ଫ୍ରଫେସର ଭି.କାମାକୋଟି ସଂସ୍ଥାନର ପ୍ରଦର୍ଶନ ନେଇ ଖୁସିବ୍ୟକ୍ତ କରିଛନ୍ତି ।
ଦେଶରେ ସାମଗ୍ରିକ ଉଚ୍ଚଶିକ୍ଷା ପ୍ରତିଷ୍ଠାନ ବର୍ଗରେ ତୃତୀୟ ସ୍ଥାନରେ ଆଇଆଇଟି ଦିଲ୍ଲୀ, ଚତୁର୍ଥରେ ଆଇଆଇଟି ବମ୍ବେ, 5ମରେ ଆଇଆଇଟି କାନପୁର, 6ଷ୍ଠରେ ଏଏମ୍ସ ଦିଲ୍ଲୀ, 7ମ ଆଇଆଇଟି ଖଡଗପୁର, 8ମ ଆଇଆଇଟି ରୁର୍କି, 9ମରେ ଆଇଆଇଟି ଗୌହାଟୀ ଓ 10ମରେ ଦିଲ୍ଲୀର ଜବାହାରଲାଲ ନେହରୁ ବିଶ୍ବବିଦ୍ୟାଳୟ ରହିଛି । ସେହିପରି ବିଶ୍ବବିଦ୍ୟାଳୟ ବର୍ଗରେ ଆଇଆଇଏସ ବେଙ୍ଗାଲୁରୁ ପ୍ରଥମ ସ୍ଥାନରେ ଥିବା ବେଳେ ଦ୍ବିତୀୟ ଓ ତୃତୀୟ ସ୍ଥାନରେ ଯଥାକ୍ରମେ ଜେଏନୟୁ ଓ ଜାମିଆ ମିଲିଆ ଇସଲାମିଆ ବିଶ୍ବବିଦ୍ୟାଳୟ ରହିଛନ୍ତି ।
ସେହିପରି କଲେଜ ବର୍ଗରେ ଦିଲ୍ଲୀର ମିରଣ୍ଡା ହାଉସ କଲେଜ ପ୍ରଥମ ସ୍ଥାନରେ ଥିବା ବେଳେ ନୂଆଦିଲ୍ଲୀର ହିନ୍ଦୁ କଲେଜ ଦ୍ବିତୀୟ ଓ ପ୍ରେସିଡେନ୍ସି କଲେଜ ତୃତୀୟ ସ୍ଥାନରେ ରହିଛି । ଇଞ୍ଜିନିୟରିଂ ବର୍ଗରେ ଆଇଆଇଟି ମାଡ୍ରାସ ତାଲିକାର ପ୍ରଥମ ସ୍ଥାନରେ ଥିବା ବେଳେ ଆଇଆଇଟି ଦିଲ୍ଲୀ ଓ ବମ୍ବେ ଯଥାକ୍ରମେ ଦ୍ବିତୀୟ ଓ ତୃତୀୟ ସ୍ଥାନରେ ରହିଛନ୍ତି । ସେହିପରି ଇଞ୍ଜିନିୟରିଂ ବର୍ଗରେ ଚତୁର୍ଥ ସ୍ଥାନରେ ଆଇଆଇଟି କାନପୁର, 5ମରେ ରୁରକୀ, 6ଷ୍ଠରେ ଖଡଗପୁର, 7ମରେ ଗୌହାଟୀ, 8ମରେ ହାଇଦ୍ରାବାଦ, 9ମରେ ଆଇଆଇଟି ତିରୁଚିରାପଲ୍ଲୀ ଓ 10ମ ସ୍ଥାନରେ କୋଲକାତାର ଯାଦବପୁର ବିଶ୍ବବିଦ୍ୟାଳୟ ରହିଛି ।
ସେହିପରି ପ୍ରବନ୍ଧନ ବର୍ଗରେ ଭାରତୀୟ ପ୍ରବନ୍ଧନ ସଂସ୍ଥାନ (ଆଇଆଇଏମ) ଅହମ୍ମଦାବାଦ ପ୍ରଥମ ସ୍ଥାନରେ ରହିଛି । ଆଇଆଇଏମ ବେଙ୍ଗାଲୁରୁ ଦ୍ବିତୀୟ ଓ କେରଳ ସ୍ଥିତ ଆଇଆଇଏମ କୋଝିକୋଡ ତୃତୀୟ ସ୍ଥାନରେ ରହିଛି । ଚିକିତ୍ସା ବିଜ୍ଞାନ ବର୍ଗରେ ଦିଲ୍ଲୀ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ (AIIMS) ପ୍ରଥମ ସ୍ଥାନରେ ରହିଛି । ସେହିପରି ଚଣ୍ଡିଗଡର ପୋଷ୍ଟ ଗ୍ରାଜୁଏଟ ଇନଷ୍ଟିଚ୍ୟୁଟ ଅଫ ମେଡିକାଲ ଏଜୁକେସନ ଓ ରିସର୍ଚ୍ଚ ଦ୍ବିତୀୟ ଓ ଭେଲୋର ସ୍ଥିତ ଖ୍ରୀଷ୍ଟିଆନ ମେଡିକାଲ କଲେଜ ତୃତୀୟ ସ୍ଥାନରେ ରହିଛନ୍ତି । ରାଙ୍କିଂରେ ଆଇନ ଶିକ୍ଷା କ୍ଷେତ୍ରରେ ଶୀର୍ଷ ସ୍ଥାନ ଅଧିକାର କରିଛି ବେଙ୍ଗାଲୁରୁର ନ୍ୟାସନାଲ ଲ’ ସ୍କୁଲ ଓ ଇଣ୍ଡିଆ ୟୁନିଭର୍ସିଟି । ସେହିପରି ଜାତୀୟ ଆଇନ ବିଶ୍ବବିଦ୍ୟାଳୟ ଦିଲ୍ଲୀ ଓ ହାଇଦ୍ରାବାଦର ନାଲସାର ଆଇନ ବିଶ୍ବବିଦ୍ୟାଳୟ ତୃତୀୟ ସ୍ଥାନରେ ରହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
