World Pneumonia Day 2024: ନିମୋନିଆ ହେଉଛି ଫୁସଫୁସରେ ସଂକ୍ରମଣ । ଏହି ଗୁରୁତର ରୋଗ ସବୁ ବୟସର ଲୋକଙ୍କୁ ହେଉଥିବାବେଳେ ବିଶେଷକରି ଛୋଟ ପିଲାଙ୍କୁ ଅଧିକ ପ୍ରଭାବିତ କରିଥାଏ । ନିମୋନିଆ ୫ ବର୍ଷରୁ କମ୍ ଶିଶୁଙ୍କ ମୃତ୍ୟୁର ପ୍ରମୁଖ କାରଣ । ଏହାର ଲକ୍ଷଣ ଦେଖିବା ମାତ୍ରେ ଅବହେଳା ନକରି ଶିଶୁକୁ ସ୍ବାସ୍ଥ୍ୟକର୍ମୀ କିମ୍ବା ନିକଟସ୍ଥ ସ୍ୱାସ୍ଥ୍ୟକେନ୍ଦ୍ରକୁ ନେବା ଉଚିତ୍ । ନିମାୋନିଆ ହେଲେ ଥଣ୍ଡା କାଶ, ପ୍ରବଳ ଜ୍ବର, ଛାତିରେ ଯନ୍ତ୍ରଣା, ନିଶ୍ବାସ ପ୍ରଶ୍ବାସ ନେବାରେ ସମସ୍ୟା ଆଦି ଲକ୍ଷଣମାନେ ଦେଖାଯାଏ । ଏହି ରୋଗକୁ ପ୍ରତିହତ କରିବାକୁ ହେଲେ ସଚେତନ ରହିବା ଜରୁରୀ । ଏହାକୁ ଦୃଷ୍ଟିରେ ରଖି ପ୍ରତିବର୍ଷ ନଭେମ୍ବର ୧୨ ତାରିଖରେ 'ବିଶ୍ଵ ନିମୋନିଆ ଦିବସ' ପାଳନ ହୋଇଥାଏ ।
ନିମୋନିଆରୁ ରକ୍ଷା ପାଇବା ଲାଗି ଶିଶୁକୁ ସଠିକ୍ ସମୟରେ ସମ୍ପୂର୍ଣ୍ଣ ଟୀକାକରଣ କରାଇବା ଉଚିତ୍ । ୫ ବର୍ଷରୁ କମ୍ ବୟସର ଶିଶୁମାନଙ୍କୁ ପିଭିସି ଟିକା ଦିଅନ୍ତୁ ଯାହା ନିମୋକୋକସ୍ ଜୀବାଣୁ ଜନିତ ନିମୋନିଆ ଓ ମସ୍ତିଷ୍କ ସଂକ୍ରମଣଠାରୁ ସୁରକ୍ଷା ଦେଇଥାଏ । ଏହାସହିତ ଶୀତ ଦିନେ ଗରମ ପୋଷାକ ଓ ମୋଜା ପିନ୍ଧାଇବା, ପିଇବା ପାଣି ଘୋଡାଇ ରଖିବା, ଓ ଶିଶୁ ଜନ୍ମ ପରେ ମା' କ୍ଷୀର ତୁରନ୍ତ ଦେବା ଆବଶ୍ୟକ ବୋଲି ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ପରାମର୍ଶ ଦିଆଯାଇଛି ।
ନିମୋନିଆ ଏକ ଗୁରୁତର ରୋଗ। ଏହି ବିଶ୍ୱ ନିମୋନିଆ ଦିବସରେ ନିଜର ୫ ବର୍ଷରୁ କମ୍ ବୟସର ଶିଶୁମାନଙ୍କୁ ପି ଭି ସି ଟୀକା ଦିଅନ୍ତୁ ଯାହା ଜୀବାଣୁ ଜନିତ ନିମୋନିଆ ଓ ମସ୍ତିଷ୍କ ସଂକ୍ରମଣ ଠାରୁ ସୁରକ୍ଷା ଦେଇଥାଏ। #WorldPneumoniaDay #OdishaCares pic.twitter.com/kuQhnPPYgP
— H & FW Dept Odisha (@HFWOdisha) November 11, 2024
ନିମୋନିଆ ଲକ୍ଷଣ:
- ଥଣ୍ଡା, କାଶ ବଢିବା
- ଜୋରରେ ନିଶ୍ବାସ ପ୍ରଶ୍ବାସ ନେବା
- ପ୍ରବଳ ଜ୍ବର ହେବା
- ନିଶ୍ବାସ ନେବାବେଳେ ଛାତି ତଳ ଭିତରକୁ ପଶିଯିବା
- ନିଶ୍ବାସ ନେଲା ବେଳେ ନାକପୁଡା ଫୁଲିବା
- ଅଧିକ ନିଦ ଲାଗିବା
- ଓଠ ଓ ଜିଭ ନୀଳ ପଡିବା
ଲକ୍ଷଣ ଜାଣିବା ମାତ୍ରେ ଏସବୁ କାମ କରନ୍ତୁ:
- ଜ୍ଵରକୁ ବାରମ୍ବାର ମାପି ନିରୀକ୍ଷଣ କରନ୍ତୁ
- ଓଜନ ମାପାନ୍ତୁ
- ଶ୍ଵାସ ପ୍ରଶ୍ବାସର ଗତି କରନ୍ତୁ
- ଅମ୍ଳଜାନର ସ୍ତର ମାପି ନିରୀକ୍ଷଣ କରନ୍ତୁ
କାଶ ଓ ଥଣ୍ଡା ବଢ଼ିବା, ଦ୍ରୁତ ଗତିରେ ନିଶ୍ଵାସ ପ୍ରଶ୍ଵାସ ନେବା, ଅତ୍ୟଧିକ ଜ୍ଵର ହେବା ଇତ୍ୟାଦି ନିମୋନିଆର ଲକ୍ଷଣ ହୋଇପାରେ। ଏହି ଲକ୍ଷଣ ଦେଖାଦେଲେ ନିଜ ଶିଶୁଙ୍କୁ ତୁରନ୍ତ ନିକଟସ୍ଥ ସ୍ୱାସ୍ଥ୍ୟକେନ୍ଦ୍ରକୁ ନେଇଯାଆନ୍ତୁ। #WorldPneumoniaDay #OdishaCares pic.twitter.com/4wVtERwwPh
— H & FW Dept Odisha (@HFWOdisha) November 11, 2024
ଶ୍ୱାସପ୍ରଶ୍ବାସର ଗତିରୁ ନିମୋନିଆ କିପରି ଚିହ୍ନିବେ:
ପିଲାର ଶ୍ଵାସପ୍ରଶ୍ବାସର ଗତି ଠିକ୍ ଅଛି ଅଥବା ଜୋର୍ ଅଛି, ଏହା ଜାଣିବା ପାଇଁ ସ୍ୱାସ୍ଥ୍ୟକର୍ମୀ ଷ୍ଟପୱାଚ୍ ବ୍ୟବହାର କରି ଏକ ମିନିଟ୍ ପର୍ଯ୍ୟନ୍ତ ଗଣନା କରିବେ । ଦ୍ରୁତ ଶ୍ୱାସପ୍ରଶ୍ବାସର ଗତି ଚିହ୍ନିବା ପ୍ରଣାଳୀ
୦ ରୁ ୨ ମାସ ପର୍ଯ୍ୟନ୍ତ ଶିଶୁଟି ଶ୍ଵାସପ୍ରଶ୍ବାସର ଗତି ମିନିଟ୍କୁ ୬୦ ରୁ ଅଧିକା ହେବା
୨ ମାସରୁ ୧ ବର୍ଷ ପର୍ଯ୍ୟନ୍ତ ଶିଶୁଟି ଶ୍ଵାସପ୍ରଶ୍ବାସର ଗତି ମିନିଟ୍କୁ ୫୦ ରୁ ଅଧିକା ହେବା
ବୟସ ୧ ବର୍ଷରୁ ୫ ବର୍ଷ ପର୍ଯ୍ୟନ୍ତ ଶିଶୁର ଶ୍ଵାସପ୍ରଶ୍ବାସର ଗତି ମିନିଟ୍କୁ ୪୦ ରୁ ଅଧିକା ହେବା
ଫୁସଫୁସ୍ ର ସଂକ୍ରମଣକୁ ନିମୋନିଆ କୁହାଯାଏ ଯାହା ୫ ବର୍ଷରୁ କମ୍ ଶିଶୁଙ୍କ ମୃତ୍ୟୁର ମୁଖ୍ୟ କାରଣ। ନିମୋନିଆର ଲକ୍ଷଣ ଦେଖିଲା ମାତ୍ରେ ଅବହେଳା ନକରି ଶିଶୁକୁ ସ୍ୱାସ୍ଥ୍ୟକର୍ମୀଙ୍କ ପାଖରୁ କିମ୍ବା ନିକଟସ୍ଥ ସ୍ୱାସ୍ଥ୍ୟକେନ୍ଦ୍ରକୁ ନିଅନ୍ତୁ। #WorldPneumoniaDay #OdishaCares pic.twitter.com/6fRg1EKL0f
— H & FW Dept Odisha (@HFWOdisha) November 11, 2024
ନିମୋନିଆ କିପରି ବ୍ୟାପେ:
ରୋଗୀ କାଶିବା, ଛିଙ୍କିବା ଦ୍ବାରା ବାୟୁ ମାଧ୍ୟମରେ ନିମୋନିଆ ରୋଗ ଜୀବାଣୁ ବ୍ୟାପିଥାଏ । ସେହିପରି ଅଧିକ ସମୟ ଧୂଆଁ ପାଖରେ ରହିଲେ, ଜଳବାୟୁରେ ପରିବର୍ତ୍ତନ, ରୋଗ ପ୍ରତିରୋଧକ ଶକ୍ତି କମ୍ ଥିଲେ ଓ ପୁଷ୍ଟିକର ଖାଦ୍ୟ ନ ଖାଇଲେ ନିମୋନିଆ ହେବାର ସମ୍ଭାବନା ବଢିଥାଏ । କମ୍ ଓଜନ ବିଶିଷ୍ଟ ଶିଶୁ ଜନ୍ମ ହେଲେ କିମ୍ବା ସମୟ ପୂର୍ବରୁ ଜନ୍ମ ହେଲେ ବି ନିମୋନିଆ ଆଶଙ୍କା ଅଧିକ ଥାଏ ।
ନିମୋନିଆରୁ ରକ୍ଷା ପାଇବା ପାଇଁ କ'ଣ କରିବେ:
- ଶିଶୁର ଶରୀରକୁ ସଂପୂର୍ଣ୍ଣ ଭାବରେ ଘୋଡାଇ ରଖନ୍ତୁ
- ଶୀତ ଦିନରେ ଗରମ ପୋଷାକ ଓ ମୋଜା ପିନ୍ଧାନ୍ତୁ
- ଖାଲି ପାଦରେ ଚଳିବାକୁ ଦିଅନ୍ତୁ ନାହିଁ
- ପିଇବା ପାଣି ଘୋଡାଇ ରଖନ୍ତୁ
ନିମୋନିଆରୁ ରକ୍ଷା ପାଇବା ପାଇଁ ଶିଶୁକୁ ସଠିକ୍ ସମୟରେ ସମ୍ପୂର୍ଣ୍ଣ ଟୀକାକରଣ କରାନ୍ତୁ। ଶୀତ ଦିନେ ଗରମ ପୋଷାକ ଓ ମୋଜା ପିନ୍ଧାନ୍ତୁ, ପିଇବା ପାଣି ଘୋଡାଇ ରଖନ୍ତୁ, ଓ ଶିଶୁ ଜନ୍ମ ପରେ ମା' କ୍ଷୀର ତୁରନ୍ତ ଦିଅନ୍ତୁ। #WorldPneumoniaDay #OdishaCares pic.twitter.com/PV4oeAQ8OU
— H & FW Dept Odisha (@HFWOdisha) November 11, 2024
ଏହାସହିତ ରୋଷେଇ କରିବା ବେଳେ, ଖୁଆଇବା ପୂର୍ବରୁ ଏବଂ ଶୌଚ ପରେ ହାତକୁ ଭଲ ଭାବରେ ସାବୁନରେ ଅତିକମରେ ୪୦ ସେକେଣ୍ଡ ପର୍ଯ୍ୟନ୍ତ ଧୁଅନ୍ତୁ ।
ଘରେ ଧୂଆଁ କରନ୍ତୁ ନାହିଁ । ସବୁବେଳେ ଝରକା ଖୋଲା କରନ୍ତୁ । LPG ଗ୍ଯାସ ଚୁଲାରେ ରୋଷେଇ କରନ୍ତୁ ।
ଜନ୍ମ ପରେ ଶିଶୁକୁ ତୁରନ୍ତ ମାଆ କ୍ଷୀର ଦିଅନ୍ତୁ । ଜନ୍ମର ୬ ମାସ କେବଳ ମାଆ କ୍ଷୀର ଦେବା ଉଚିତ୍ ।
୬ ମାସ ପରେ ମାଆ କ୍ଷୀର ସହିତ ଘରୋଇ ପ୍ରସ୍ତୁତ ଖାଦ୍ଯ ଦିଅନ୍ତୁ ।
ଶିଶୁକୁ ଠିକ୍ ସମୟରେ ସଂପୂର୍ଣ୍ଣ ଭାବରେ ଟିକକରଣ କରନ୍ତୁ ।
ଇଟିଭି ଭାରତ, ଭୁବନେଶ୍ବର
