ନୂଆଦିଲ୍ଲୀ: ଉତ୍ତରପ୍ରଦେଶ ଓ ବିହାରର ଗଙ୍ଗା ନଦୀରେ ମୃତଦେହ ଭାସିବା ଘଟଣାକୁ ଗମ୍ଭୀରତାର ସହ ନେଇଛନ୍ତି ଜାତୀୟ ମାନବାଧିକାର ଆୟୋଗ । ଏନଏଚଆରସି ଗୁରୁବାର ବିହାର ଓ ଉତ୍ତରପ୍ରଦେଶ ମୁଖ୍ୟ ଶାସନ ସଚିବଙ୍କ ସହିତ କେନ୍ଦ୍ରକୁ ପଠାଇଛି ନୋଟିସ । 4 ସପ୍ତାହ ମଧ୍ୟରେ କାର୍ଯ୍ୟାନୁଷ୍ଠାନର ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛି ଜାତୀୟ ମାନବାଧିକାର ଆୟୋଗ ।
ଉତ୍ତରପ୍ରଦେଶର ବଲିୟା ଜିଲ୍ଲାରେ ରହୁଥିବା ଲୋକଙ୍କ କହିବାନୁସାରେ, ନରହି ଅଞ୍ଚଳର ଉଜିୟାର, କୁହ୍ଲଡିୟା ଏବଂ ଭରୌଲି ଘାଟରେ ଅତି କମରେ 52 ମୃତଦେହ ଭାସୁଥିବାର ଦେଖିବାକୁ ମିଳିଥିଲା । ସେହିଭଳି ବିହାରରୁ ଗଙ୍ଗାରେ ମୃତଦେହ ଭାସୁଥିବାର ଖବର ମଧ୍ୟ ସାମ୍ନାକୁ ଆସିଥିଲା ।
ବିବୃତ୍ତିରେ ଏନଏଚଆରସି କହିଛି ଯେ ଗଙ୍ଗା ନଦୀରେ ଦରପୋଡା କିମ୍ବା ବିନା ଜଳା ମୃତ ଦେହ ଭସାଇବାରୁ ରୋକିବା ନେଇ ପ୍ରଶାସନିକ କର୍ତ୍ତୃପକ୍ଷ ଜନସାଧାରଣଙ୍କୁ ଅବଗତ କରାଇବାରେ ବିଫଳ ହୋଇଛନ୍ତି ।
