ହାଇଦ୍ରାବାଦ: ଦେଶ ପାଳୁଛି ଇଂରାଜୀ ନବବର୍ଷ । ନୂଆ ସମ୍ଭାବନା, ନୂଆ ଆଶା, ଓ ନୂଆ ଆକାଂକ୍ଷା ନେଇ କଟକଣା ମଧ୍ୟରେ ଇଂରାଜୀ ନବବର୍ଷକୁ ସ୍ବାଗତ କରିଛନ୍ତି ଦେଶବାସୀ । 2020ର କଷ୍ଟକୁ ଭୁଲି କିପରି ନୂଆବର୍ଷ ସମସ୍ତଙ୍କ ଜୀବନରେ ସୁଖ ସମୃଦ୍ଧି ଭରି ଦେବ ସେ ନେଇ ଇଶ୍ବରଙ୍କ ନିକଟରେ ପ୍ରାର୍ଥନା କରିବା ସହ ପରସ୍ପରକୁ ଶୁଭେଚ୍ଛା ଜଣାଇଛନ୍ତି । ପଞ୍ଜାବ, ଜାମ୍ମୁ କାଶ୍ମୀର, ପଶ୍ଚିମବଙ୍ଗ, ଗୋଆ ଆଦି ସ୍ଥାନରେ ଲୋକେ ବାଣ ଫୁଟାଇ, ସୁସଜ୍ଜିତ ଆଲୋକମାଳାରେ ଉତ୍ସବ ମନାଉଥିବା ଦେଖିବାକୁ ମିଳିଛି ।
ପଞ୍ଜାବରେ ସ୍ବର୍ଣ୍ଣ ମନ୍ଦିରରେ ଲୋକଙ୍କ ଭିଡ ଦେଖିବାକୁ ମିଳିଛି । 2020କୁ ବିଦାୟ ଦେଇ ହର୍ଷ ଉଲ୍ଲାସରେ 2021କୁ ସ୍ବାଗତ କରିଛନ୍ତି ଦେଶବାସୀ । ନବବର୍ଷରେ କୃଷକ ମାନଙ୍କର ସମସ୍ୟାର ସମାଧାନ ହେଉ ବୋଲି କହିଛନ୍ତି କିଛି ଶ୍ରଦ୍ଧାଳୁ ।
ସେହିପରି ଜମ୍ମୁକାଶ୍ମୀରରେ ମଧ୍ୟ ନବବର୍ଷ ପାଳନ କରାଯାଇଥିବା ଦେଖିବାକୁ ମିଳିଛି । ଗୁଲମାର୍ଗରେ ବରଫ ପାତ ସତ୍ତ୍ବେ ଲୋକେ କେକ୍ କାଟି ଗୀତ ଗାଈ ନୂଆବର୍ଷକୁ ସ୍ବାଗତ କରିଛନ୍ତି ।
କୋଲକାତରେ ମଧ୍ୟ ସମାନ ଢଙ୍ଗରେ ନବବର୍ଷ ପାଳନ ହୋଇଛି । 2020 ସମସ୍ତଙ୍କ ପାଇଁ ଅତ୍ୟନ୍ତ ଚ୍ୟାଲେଞ୍ଜପୂର୍ଣ୍ଣ ରହିଥିଲା । ଆମେ ମାସ୍କ ପିନ୍ଧି, ସାନିଟାଇଜର ବ୍ୟବହାର କରି ଏକ ନୂଆ ପରମ୍ପରାକୁ ଆପଣାଇଛୁ ବୋଲି କହିଛନ୍ତି ଜଣେ ପୋଲିସ କର୍ମୀ । ତେବେ ବିଳମ୍ବିତ ରାତିରେ ଯେଉଁମାନେ ବିନା ମାସ୍କରେ ବାହାରେ ବୁଲୁଥିଲେ ସେମାନଙ୍କୁ କୋଲକାତା ପୋଲିସ ତରଫରୁ ମାସ୍କ ବଣ୍ଟନ କରାଯାଇଛି ।
ଗୋଆରେ ମଧ୍ୟ ଖୁବ ହର୍ଷ ଉଲ୍ଲାସରେ ନବବର୍ଷକୁ ସ୍ବାଗତ କରିଛନ୍ତି ଲୋକେ । ପାଣାଜୀରେ ବିଭିନ୍ନ ରେସ୍ତୋରାଁ, ପବ୍ କନସର୍ଟ ଆଦିରେ କେକ୍ କାଟି ଖୁସି ମନାଇଛନ୍ତି ।
କୋରୋନାର ନୂଆ ଷ୍ଟ୍ରେନକୁ ଦୃଷ୍ଟିରେ ରଖି ଅନ୍ୟାନ୍ୟ ରାଜ୍ୟରେ କଟକକଣା ମଧ୍ୟରେ ନବବର୍ଷ ପାଳନ କରାଯାଇଛି । ଓଡିଶା, ବେଙ୍ଗାଲୁରୁ, ନୂଆଦିଲ୍ଲୀ ଆଦି ସ୍ଥାନରେ ଜିରୋ ନାଇଟ ସେଲିବ୍ରେସନରେ ପ୍ରତିବନ୍ଧକ ଲାଗିଥିବାବେଳେ ଲୋକେ ଘରେ ରହି ନବବର୍ଷ ପାଳନ କରିଛନ୍ତି ।
