ରାୟପୁର: ଉଦଯାପିତ ହୋଇଛି ରାୟପୁରରେ ୩ଦିନ ଧରି ଚାଲିଥିବା ଜାତୀୟ ଆଦିବାସୀ ନୃତ୍ୟ ମହୋତ୍ସବ 2021 । ଏହି ଅବସରରେ ଏହି ମହାନ କାର୍ଯ୍ୟକ୍ରମର ଆୟୋଜିତ ପାଇଁ ପାଇଁ ସମସ୍ତଙ୍କୁ ଧନ୍ୟବାଦ ଦେଇଛନ୍ତି ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବାଘେଲ । ସମଗ୍ର ବିଶ୍ୱରୁ ଆଦିବାସୀ ସାଥୀମାନଙ୍କର ସହଯୋଗ ପାଇଁ ରାୟପୁରରେ ଏହି ଜାତୀୟ ଆଦିବାସୀ ନୃତ୍ୟ ମହୋତ୍ସବରେ ସଫଳ ଆୟୋଜନ ସମ୍ଭବ ହୋଇପାରିଛି ବୋଲି କହିବା ସହ ସମସ୍ତଙ୍କୁ ଧନ୍ୟବାଦ ଦେଇଛନ୍ତି ମୁଖ୍ୟମନ୍ତ୍ରୀ ବାଘେଲ ।
ଏହି ୩ ଦିନିଆ ମହୋତ୍ସବରେ ଆଦିବାସୀ ନୃତ୍ୟ, ସଙ୍ଗୀତ, ସଂସ୍କୃତି ପ୍ରଦର୍ଶିତ କରିଥିଲେ ଦେଶର ବିଭିନ୍ନ ପ୍ରାନ୍ତରୁ ଆସିଥିବା ଆଦିବାସୀ ପ୍ରତିଯୋଗୀ । ଏହି ଜାତୀୟ ପ୍ରତିଯୋଗିତାରେ ଝାଡଖଣ୍ଡର ନୃତ୍ୟଶିଳ୍ପୀ ପ୍ରଥମ ସ୍ଥାନ ଅଧିକାର କରିଥିବାବେଳେ, ଓଡିଶାରୁ ଅଂଶଗ୍ରହଣ କରିଥିବା ପ୍ରତିଯୋଗୀ ୨ୟ ସ୍ଥାନ ଅଧିକାର କରିଛନ୍ତି । ସେହିପରି ତୃତୀୟ ସ୍ଥାନରେ ଆସାମର ନୃତ୍ୟଶିଳ୍ପୀ ରହିଥିବା ସୂଚନା ରହିଛି । କୃତି କଳାକାରଙ୍କୁ ଅର୍ଥରାଶି ସହ ଆଓ୍ବାର୍ଡ ଓ ପ୍ରମାଣ ପତ୍ର ପ୍ରଦାନ କରି ପୁରସ୍କୃତ କରାଯାଇଛି । ୧ମ ସ୍ଥାନ ଅଧିକାର କରିଥିବା ପ୍ରତିଯୋଗୀଙ୍କୁ ୫ ଲକ୍ଷ ଅର୍ଥ ରାଶି ସହ ପ୍ରମାଣପତ୍ର ଓ ୨ୟଙ୍କୁ ୩ ଲକ୍ଷ ଏବ ତୃତୀୟ ସ୍ଥାନ ଅଧିକାର କରିଥିବା ସଫଳ ପ୍ରତିଯୋଗୀଙ୍କୁ ୨ ଲକ୍ଷ ଅର୍ଥରାଶି ସହ ପ୍ରମାଣ ପତ୍ରରେ ସମ୍ମାନିତ କରାଯାଇଛି ।
ଏହି କାର୍ଯ୍ଯକ୍ରମ ଅବସରରେ, ମୁଖ୍ୟମନ୍ତ୍ରୀ ଭୂପେଶ ବାଘେଲ ଅତିଥି ଭାବେ ଯୋଗ ଦେଇ କହିଛନ୍ତି ଯେ, ଆଦିବାସୀ ମହୋତ୍ସବ ମାଧ୍ୟମରେ ଆମେ ଗୋଟିଏ ପ୍ଲାଟଫର୍ମରେ ବିଭିନ୍ନ ଆଦିବାସୀ ଜନଜାତିର ଗୀତ, ସଙ୍ଗୀତ, ନୃତ୍ୟ ଏବଂ ସଂସ୍କୃତିକୁ ଉପସ୍ଥାପନ କରିବାର ପ୍ରୟାସ କରିଛୁ । ଯାହା ଶତାବ୍ଦୀ ଧରି ଏହି ଆଦିବାସୀ ସମାଜର ପରିଚୟ ବହନ କରେ । ସମସ୍ତ ସ୍ଥାନର ଆଦିବାସୀ ଜନଜାତିର ସଂସ୍କୃତି ମଧ୍ୟରେ ସମନତା ଥିବା ଏହି ମଞ୍ଚରେ ପ୍ରତିଫଳିତ ହୋଇଛି ବୋଲି ମଧ୍ୟ ସେ ମତ ରଖିଛନ୍ତି । ଆଦିବାସୀ ସମାଜର ପ୍ରକୃତ ସ୍ଲୋଗାନ ହେଉଛି ସେବା, ଅର୍ଥାତ୍ ପ୍ରକୃତି ଏବଂ ସମାଜ ପାଇଁ ସେବା ହିଁ ଆଦିବାସୀ ସମାଜର ବାସ୍ତବିକତା ବୋଲି କହିଛନ୍ତି ମୁଖ୍ୟମନ୍ତ୍ରୀ ବାଘେଲ । ସମାପନ ସମାରୋହରେ କଂଗ୍ରେସର ବରିଷ୍ଠ ନେତା ଭକ୍ତ ଚରଣ ଦାସ ମଧ୍ୟ ଉପସ୍ଥିତ ଥିଲେ। କାର୍ଯ୍ୟକ୍ରମର ଶେଷ ଅଭିଭାଷଣରେ ମନ୍ତ୍ରୀ ଅମରଜିତ ଭାଗବତ କବିତା ଆବୃତ୍ତି କରି ସମସ୍ତଙ୍କ ହୃଦୟ ଜିତିଥିଲେ।
ବ୍ୟୁରୋ ରିପୋର୍ଟ, ଇଟିଭି ଭାରତ
