ଲକ୍ଷ୍ନୌ:ଦୁଇଦିନିଆ ବାରଣାସୀ ଗସ୍ତରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା । ଏହି ଅବସରରେ ଦଳର ବାରଣାସୀର କାଶୀ ଅଞ୍ଚଳର ସମସ୍ତ ସାଂସଦ ବିଧାୟକ ସହ ଜିଲ୍ଲା ସଭାପତିଙ୍କୁ ନେଇ ବୈଠକ କରିଛନ୍ତି । ଏହି ବୈଠକରେ ଦଳୀୟ ନେତା ଓ କର୍ମୀକୁ ନେଇ ଦଳକୁ ମଜବୁତ କରିବା ସହ ଲୋକ ସମ୍ପର୍କକୁ ନେଇ ଆଲୋଚନା କରିଛନ୍ତି ।
ଦଳୀୟ ସୂତ୍ରରୁ ପ୍ରକାଶ ଯେ ଉତ୍ତରପ୍ରଦେଶରେ ଆସନ୍ତାବର୍ଷ ପଞ୍ଚାୟତ ନିର୍ବାଚନ ଓ ଏହା ପରେ ପରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ଏହାକୁ ଦୃଷ୍ଟିରେ ରଖି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଦଳୀୟ ନେତା ଓ କର୍ମକର୍ତ୍ତାଙ୍କ ସହ ପ୍ରସ୍ତୁତି ନେଇ ଆଲୋଚନା କରିଛନ୍ତି । ସେ ଏହି ବୈଠକରେ କହିଛନ୍ତି ଯେ ରାଜ୍ୟରେ କେନ୍ଦ୍ର ସରକାରଙ୍କ ଓ ରାଜ୍ୟ ସରକାରଙ୍କ ବିଭିନ୍ନ ଜନକଲ୍ୟାଣକାରୀ ଯୋଜନା ବିଷୟରେ ଲୋକଙ୍କୁ ସଚେତନତା କରିବା ପାଇଁ ପରାମର୍ଶ ଦେଇଛନ୍ତି । ଏହା ସହ ବିଜେପି ଅଧ୍ୟକ୍ଷ ମେରା ବୁଥ ସବୁଠୁ ମଜବୁଥ କାର୍ଯ୍ୟକ୍ରମ ମାଧ୍ୟମରେ ଲୋକସମ୍ପର୍କକୁ ଗୁରୁତ୍ବ ଦେବା ପାଇଁ ଦଳୀୟକର୍ମୀ ଓ ନେତାଙ୍କୁ କହିଛନ୍ତି । ଏହା ସହ ସେ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲୋକପ୍ରିୟତାର ଶୀର୍ଷରେ ରହିଛନ୍ତି ଯାହାକି ନିକଟରେ ଗୁଜୁରାଟରେ ଅନୁଷ୍ଠିତ ପୌରନିର୍ବାଚନରେ ପ୍ରମାଣିତ ହୋଇଛି ବୋଲି ନଡ୍ଡା କହିଛନ୍ତି ।
ଏହା ସହ ଦଳୀୟ କର୍ମକର୍ତ୍ତାଙ୍କୁ ଆଗାମୀ ଦିନରେ ହେବାକୁ ଥିବା ପଞ୍ଚାୟତ ନିର୍ବାଚନ ଓ ବିଧାନସଭା ନିର୍ବାଚନରେ ଦଳର ସଫଳତା ପାଇଁ ବୁଥସ୍ତରରୁ କାର୍ଯ୍ୟ କରିବା ପାଇଁ ନିର୍ଦ୍ଦେଶ ଦେଇଛନ୍ତି । ଦୁଇଦିନିଆ ବାରଣାସୀ ଗସ୍ତରେ ଥିବା ବିଜେପି ଅଧ୍ୟକ୍ଷ ଜେପି ନଡ୍ଡା ଆସନ୍ତାକାଲି କାଶୀ ବିଶ୍ବନାଥ ମନ୍ଦିର ଓ କାଲ ଭୈରବ ମନ୍ଦିର ଦର୍ଶନ କରିବେ । ଏହା ପରେ ଦଳୀୟ ନେତା ଓ ବୁଥ ସ୍ତରୀୟ କର୍ମକର୍ତ୍ତାଙ୍କୁ ନେଇ ଆଲୋଚନା କରିବେ ।
ବ୍ୟୁରୋ ରିପୋର୍ଟ,ଇଟିଭି ଭାରତ
