ହାଇଦ୍ରାବାଦ: ବର୍ତ୍ତମାନ ଦେଶରେ ତଳମୁହାଁ ହେଉଛି ସଂକ୍ରମଣ । ହେଲେ ମୃତ୍ୟୁସଂଖ୍ୟା ଥମିବାର ନାଁ ଧରୁନି । ଏଯାବତ୍ କୋରୋନାରେ ଲକ୍ଷ ଲକ୍ଷ ଲୋକ ଆଖି ବୁଜିଲେଣି । କିଏ ନିଜ ବାପାମାଆକୁ ହରାଇଛି ତ ଆଉ କିଏ ନିଜ ସନ୍ତାନଙ୍କୁ । ଇତିମଧ୍ୟରେ ଅନେକ ନବ ବିବାହିତଙ୍କ ମଥାରୁ ସିନ୍ଦୂର ପୋଛି ନେଇଛି କାଳ କୋରୋନା । ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରି ବି ଅଦୃଶ୍ୟ ଭୂତାଣୁ ଆଗରେ ହାର ମାନୁଛି ମଣିଷ । ହାଇଦ୍ରାବାଦସ୍ଥିତ ଶମସାବାଦ ଅଞ୍ଚଳରୁ କୋରୋନାର ଏଭଳି ଏକ ଦାରୁଣ ଚିତ୍ର ସାମ୍ନାକୁ ଆସିଛି । ଗୋଟିଏ ମାସରେ ମାଆ, ପୁଅ ଓ ଝିଅ ସଂକ୍ରମିତ ହୋଇ ଆଖି ବୁଜିଛନ୍ତି । ସବୁଠୁ ବଡ କଥା ହେଲା ଯେ ପରିବାର ସଦସ୍ୟ 80 ଲକ୍ଷ ଟଙ୍କା ଚିକିତ୍ସାରେ ପାଣି ଭଳି ବ୍ୟୟ କଲାପରେ ବି ସେମାନଙ୍କୁ ବଞ୍ଚାଇ ପାରିନାହାଁନ୍ତି ।
ସୂଚନାଯୋଗ୍ୟ, ଶମସାବାଦ ଥୋଣ୍ଡୁପାଲି ଅଞ୍ଚଳରେ ବିତାଲାଇହ ଓ ସୁଲୋଚନା ନାମକ ଦମ୍ପତିଙ୍କ ଘର । ସେମାନଙ୍କ ତିନୋଟି ପୁଅ ଓ ଗୋଟିଏ ଝିଅ । ନିକଟରେ ପୁରା ପରିବାର ନିଜ ଆତ୍ମୀୟଙ୍କ ସହ ମିଶି ଏକ ଉତ୍ସବ ପାଳନ କରିଥିଲେ । ଏହାପରେ ସେମାନେ ଅସୁସ୍ଥ ଅନୁଭବ କରିଥିଲେ । ଏଣୁ ନିଜର କୋଭିଡ ଟେଷ୍ଟ କରାଇଥିଲେ । ଫଳରେ ପରିବାରର 5 ଜଣ ସଦସ୍ୟ କୋରୋନା ସଂକ୍ରମିତ ଥିବା ଜଣାପଡିଥିଲା ।
ପ୍ରଥମେ ସୁଲୋଚନାଙ୍କ ସ୍ବାସ୍ଥ୍ୟବସ୍ଥା ଗୁରୁତର ହେବାରୁ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ହେଲେ ଗତ ମେ 12 ତାରିଖରେ ସେ ପ୍ରାଣ ହରାଇଥିଲେ । ତାଙ୍କ ପୁଅ ସୁବାଷ(50) ଏବଂ ଝିଅ ଲାବନ୍ୟା(45) ମଧ୍ୟ ଅସୁସ୍ଥ ହେବା କାରଣରୁ ମେଡିକାଲରେ ଚିକିତ୍ସାଧୀନ ଥିଲେ । ହେଲେ ଚିକିତ୍ସାର 25 ଦିନ ପରେ ଗତ 8 ତାରିଖ ଦିନ ସୁବାଷଙ୍କ ମଧ୍ୟ ମୃତ୍ୟୁ ଘଟିଥିଲା । ଶେଷରେ ଲାବଣ୍ୟା ଚିକିତ୍ସାଧୀନ ଅବସ୍ଥାରେ ସୋମବାର ଆଖି ବୁଜିଛନ୍ତି । ତେବେ ସେମାନଙ୍କ ଚିକିତ୍ସା ପାଇଁ ପରିବାର ସଦସ୍ୟ 80 ଲକ୍ଷ ଟଙ୍କା ଖର୍ଚ୍ଚ କରିଥିବା ଜଣାପଡିଛି । ହେଲେ କାହାରି ଜୀବନ ମଧ୍ୟ ରକ୍ଷା କରାଯାଇ ପାରିନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
