ବେଙ୍ଗାଲୁରୁ: ତେଜୁଛି କର୍ଣ୍ଣାଟକ-ମହାରାଷ୍ଟ୍ର ସୀମା ବିବାଦ(Karnataka-Maharashtra Border dispute) । କର୍ଣ୍ଣାଟକ ଓ ମହାରାଷ୍ଟ୍ର ସୀମା ବିବାଦ ଯୋଗୁଁ ମହାରାଷ୍ଟ୍ର ଟ୍ରାଫିକ ପକ୍ଷରୁ ବେଲାଗଭି ଯାଉଥିବା ପ୍ରାୟ 300ରୁ ଅଧିକ ବସ୍ ଚଳାଚଳ ଉପରେ ସାମୟିକ ରୋକ୍(buses stopped) ଲାଗିଛି । ସେପଟେ କୌଣସି ପ୍ରକାର ଅପ୍ରିତିକର ପରିସ୍ଥିତିକୁ ଏଡାଇବା ପାଇଁ ବେଲଗଭି ବସ୍ ଷ୍ଟାଣ୍ଡରେ କଡା ପୋଲିସ ସୁରକ୍ଷା ଦିଆଯାଇଛି । ମହାରାଷ୍ଟ୍ରର ଔରାଙ୍ଗବାଦ ଜିଲ୍ଲାର ଦାଉନ୍ଦ ଗ୍ରାମର କିଛି ପ୍ରୋ-ମରାଠୀ ସଂଗଠନର କର୍ମୀ ଶୁକ୍ରବାର କର୍ଣ୍ଣାଟକ ବସ୍ ଗୁଡିକ ଉପରେ କଳା କାଳି ଫିଙ୍ଗିଥିବା ଅଭିଯୋଗ ହୋଇଥିଲା । ପରେ ପୋଲିସ ବେଲଗଭି ସିଟି ସେଣ୍ଟର ବସ୍ ଷ୍ଟେସନରେ ପୋଲିସ ମୁତୟନ ହୋଇଥିଲେ ।
ମହାରାଷ୍ଟ୍ର ଷ୍ଟେଟ୍ ରୋଡ୍ ଟ୍ରାନ୍ସପୋର୍ଟ କର୍ପୋରେସନ(Maharashtra State Road Transport Corporation) ମଧ୍ୟ କର୍ଣ୍ଣାଟକଙ୍କୁ ଯିବାକୁ ଥିବା 300ରୁ ଅଧିକ ବସ୍କୁ ବାତିଲ କରିଛି । ବସ୍ ପ୍ରତିଦିନ ମହାରାଷ୍ଟ୍ରରୁ ବେଲଗଭି, ଚିକୋଡି ସମେତ କର୍ଣ୍ଣାଟକର ବିଭିନ୍ନ ସ୍ଥାନକୁ ଚଳାଚଳ କରିଥାଏ । କୌଣସି ପ୍ରକାର ଦଣ୍ଡନୀୟ ଘଟଣାକୁ ଏଡାଇବାକୁ ପୋଲିସ ପ୍ରୋ-କାନାଡା ସଂଗଠନଙ୍କୁ ଚେତାବନୀ ଦେଇଛି ।
ଗତ କିଛିଦିନ ଧରି ଦୁଇ ପଡୋଶୀ ରାଜ୍ୟ କର୍ଣ୍ଣାଟକ ଓ ମହାରାଷ୍ଟ୍ର ମଧ୍ୟରେ ସୀମା ବିବାଦ ଲାଗି ରହିଛି । ଉଭୟ ରାଜ୍ୟର ମୁଖ୍ୟମନ୍ତ୍ରୀ ଓ ଅନ୍ୟନେତା ପରସ୍ପର ପ୍ରତି ଆକ୍ଷେପଜନତ ମନ୍ତବ୍ୟ ଦେବାରେ ଲାଗିଛନ୍ତି । କର୍ଣ୍ଣାଟକ ମୁଖ୍ୟମନ୍ତ୍ରୀ ବାସବରାଜ ବୋମାଇ ଗୁରୁବାର କହିଥିଲେ ଯେ, ମହାରାଷ୍ଟ ସହ ସୀମା ବିବାଦ ନେଇ ଆସନ୍ତା ସପ୍ତାହରେ ସର୍ବଦଳୀୟ ବୈଠକରେ ଆଲୋଚନା ହେବ ।
କର୍ଣ୍ଣାଟକର ସୀମାବର୍ତ୍ତି ବେଲଗଭି ଓ ବେଲଗାମ ଜିଲ୍ଲାରେ ଥିବା 80ରୁ ଅଧିକ ମରାଠୀ ଭାଷାଭାଷୀ ଗାଁକୁ ନେଇ ମହାରାଷ୍ଟ୍ର ସହ ବିବାଦର ସୂତ୍ରପାତ ହୋଇଛି । ମହାରାଷ୍ଟ୍ରର ଦାବି ଖାରଜ ହୋଇଥିଲେ ସୁଦ୍ଧା କର୍ଣ୍ଣାଟକ ମଧ୍ୟ ପଛରେ ପଡିନାହିଁ । ସୋଲାପୁର ପରି ମହାରାଷ୍ଟ୍ରର କିଛି କାନାଡା ଭାଷାଭାଷୀ ଅଞ୍ଚଳକୁ ନିଜର ବୋଲି ଦାବି କରୁଛି । ଉଭୟ ରାଜ୍ୟ ବିଜେପି ଶାସିତ ରାଜ୍ୟ ହୋଇଥିବାବେଳେ ଗୋଟିଏରେ ମେଣ୍ଟ ସରକାର ରହିଛି ।
