ନୂଆଦିଲ୍ଲୀ: ପଳାତକ ହୀରା ବ୍ୟବସାୟୀ ମେହୁଲ ଚୋକସିଙ୍କ ମାମଲାରେ ପ୍ରତିକ୍ରିୟା ଦେଇଛି ବୈଦେଶିକ ମନ୍ତ୍ରଣାଳୟ । ପଳାତକକୁ ଦେଶକୁ ଆଣିବା ବିଷୟରେ ଭାରତ ଅଟଳ ।
ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚୀ କହିଛନ୍ତି, ମେହୁଲ ଚୋକସି ବର୍ତ୍ତମାନ ଡୋମିନିକା ପ୍ରଶାସନର ଅଧୀନରେ ଅଛନ୍ତି ଏବଂ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । ସେ କହିଛନ୍ତି ଯେ ଆମେ ପଳାତକ ଅପରାଧୀଙ୍କୁ ଭାରତକୁ ଫେରାଇ ଆଣିବାକୁ ଚେଷ୍ଟା କରୁଛୁ।
ଡୋମିନିକାରେ ବେଆଇନ ପ୍ରବେଶ ମାମଲାରେ ଗୁରୁବାର ସ୍ଥାନୀୟ ମାଜିଷ୍ଟ୍ରେଟ କୋର୍ଟ ମେହୁଲ ଚୋକସିଙ୍କ ଜାମିନ ଆବେଦନକୁ ଖାରଜ କରିଛନ୍ତି । ଶୁଣାଣି ପରେ ମେହୁଲ ଚୋକସିଙ୍କ ଆଇନଜୀବୀ କହିଛନ୍ତି ଯେ ସେ ଉଚ୍ଚ ନ୍ୟାୟାଳୟରେ ଆବେଦନ କରିବେ । ଚୋକସିଙ୍କ ଆଇନଜୀବୀ ବିଜୟ ଅଗ୍ରୱାଲ କହିଛନ୍ତି ଯେ ଉଚ୍ଚ ନ୍ୟାୟାଳୟରେ ଆବେଦନ କରାଯିବ । ଏହାପୂର୍ବରୁ ଚୋକସିଙ୍କୁ ମେ 23ରେ କାରବିଆନ ଦ୍ବୀପ ଦେଶରେ ବେଆଇନ ଭାବେ ପ୍ରବେଶ କରିଥିବା ଅଭିଯୋଗରେ ଗିରଫ କରାଯାଇଥିଲା ।
