ବେଙ୍ଗାଲୁରୁ: ପ୍ରେମିକକୁ ଛୁରୀ ଭୁସି ହତ୍ୟା ଉଦ୍ୟମ କଲେ ମହିଳା । ଏଭଳି ଚାଞ୍ଚଲ୍ୟକର ଘଟଣା ଦେଖିବାକୁ ମିଳିଛି କର୍ଣ୍ଣାଟକର ବେଙ୍ଗାଲୁରୁରେ । ଏହି ହତ୍ୟା ଉଦ୍ୟମ 4 ଦିନ ପୂର୍ବରୁ କରାଯାଇଥିବା ଜଣାପଡିଛି । ହେଲେ 4 ଦିନ ପରେ ଏହି ଘଟଣା ଲୋକଲୋଚନକୁ ଆସିଛି । ହତ୍ୟା ଉଦ୍ୟମ କରିଥିବା ମହିଳା ଜଣଙ୍କୁ ବିବେକନଗର ପୋଲିସ ଗିରଫ କରିଥିବା ଜଣାପଡିଛି ।
ସୂଚନା ଅନୁସାରେ, ସଂପୃକ୍ତ ମହିଳାଙ୍କର ଯୋଗେଶ ନାମକ ଏକ ଯୁବକ ସହ ପ୍ରେମ ସମ୍ପର୍କ ଗଢି ଉଠିଥିଲା । ମହିଳା ଜଣକ ଆସାମର ହୋଇଥିବାବେଳେ ସେ ବେଙ୍ଗାଲୁରୁକୁ ଚାକିରି ଅନ୍ବେଷଣରେ ଆସିଥିଲେ । ଆଉ ବେଙ୍ଗାଲୁରୁରେ ସେ ଜଣେ ବ୍ୟକ୍ତିଙ୍କ ଘରେ କେଆର ଟେକର ଭାବରେ ରହି କାମ କରୁଥିଲେ । ସେପଟେ ଯୋଗେଶ ସେଠାରେ ସିକ୍ୟୁରିଟି ଗାର୍ଡ ଭାବରେ କାର୍ଯ୍ୟରତ ଥିଲା । ତେବେ ବେଙ୍ଗାଲୁରୁରେ ଉଭୟଙ୍କ ଦେଖା ହେବା ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା । ହେଲେ ମହିଳା ଜଣକ ବିବାହିତା ଥିଲେ ।
ଉଭୟ ଯୋଗେଶ ଏବଂ ତାଙ୍କ ପ୍ରେମିକା ବିବେକନଗର ଅଞ୍ଚଳରେ ରହୁଥିଲେ । ସବୁଠୁ ଆଶ୍ଚର୍ଯ୍ୟଜନକ କଥା ହେଉଛି ଯୋଗେଶ ନିଜ ପ୍ରେମିକାଙ୍କ ଠାରୁ ଅନେକ ଟଙ୍କା ପଇସା ମଧ୍ୟ ନେଇଥିଲା । ବାରମ୍ବାର ପ୍ରେମିକା ଜଣକ ପ୍ରେମିକ ଯୋଗେଶକୁ ତାର ଦାବି ମୁତାବକ ଟଙ୍କା ନିଜ ଉପାର୍ଜିତ ଅର୍ଥରୁ ଦେଇ ଆସୁଥିଲେ । ହେଲେ ଗତ କିଛି ଦିନ ହେବ ଯୋଗେଶ ନିଜ ପ୍ରେମିକାଙ୍କ ସହ ମିଳାମିଶା କମ କରିବାରେ ଲାଗିଥିଲା । ଯାହା ଫଳରେ ଧୀରେ ଧୀରେ ମହିଳାଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା ।
ଏହା ବି ପଢନ୍ତୁ...ଜମିବାଡି ଲୋଭରେ ଭୁଲିଲେ ହିତାଧିତ ଜ୍ଞାନ, ଦିଅର ପନିକି ଚୋଟରେ ଭାଉଜ ଓ ପୁତୁରା ଗୁରୁତର
ଉଭୟଙ୍କ ସମ୍ପର୍କରେ ଫାଟ ସୃଷ୍ଟି ହେବା ପରେ ଯୋଗେଶକୁ ମହିଳା ଜଣକ ପ୍ରଶ୍ନ କରିଥିଲେ । ଯେଉଁଥିରେ ଉତକ୍ଷିପ୍ତ ହୋଇ ଯୋଗେଶ ମହିଳାଙ୍କୁ ଗାଳିଗୁଲଜ କରିଥିଲା । ଏହା ପରେ ଉଭୟଙ୍କ ମଧ୍ୟରେ ବଚସା ଆରମ୍ଭ ହୋଇଥିଲା । ଆଉ ପରିଶେଷରେ ଏହି ବଚସାକୁ ନେଇ ପ୍ରେମିକ ଯୋଗେଶକୁ ମହିଳା ଜଣକ ହତ୍ୟା କରିବାକୁ ଉଦ୍ୟମ କରିଥିଲେ ।
ଛୁରୀ ଭୁସି ହତ୍ୟା ଉଦ୍ୟମ କରିଥିବାବେଳେ ଅଳ୍ପକେ ବର୍ତ୍ତିଛି ଯୋଗେଶ । ରକ୍ତ ଜୁଡୁବୁଡୁ ଅବସ୍ଥାରେ ଯୋଗେଶକୁ ଉଦ୍ଧାର କରାଯାଇଛି ଏକ ବେସରକାରୀ ହସ୍ପିଟାଲରେ ଭର୍ତ୍ତି କରାଯାଇଛି । ତେବେ ସେଠାରେ ଯୋଗେଶର ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ଥିବା ପୋଲିସ ସୂତ୍ରରୁ ଜଣାପଡିଛି । ସେପଟେ ପୋଲିସ ହତ୍ୟା ଉଦ୍ୟମ କରିଥିବା ମହିଳାଙ୍କୁ ଗିରଫ କରି ଅଧିକ ତଦନ୍ତ ଜାରି ରଖିଛି । ଏହିପରି ଭାବେ ଦିନକୁ ଦିନ ଅନେକ ଅପରାଧିକ ମାମଲା ସାମନାକୁ ଆସୁଛି । ପ୍ରେମ ବ୍ୟାପାରକୁ କେନ୍ଦ୍ର କରି ହତ୍ୟାକାଣ୍ଡ ଘଟୁଥିବାର ଖବର ବିଭିନ୍ନ ସ୍ଥାନରୁ ଆସୁଥିବା ଜଣାପଡିଛି ।
