ଗାନ୍ଧୀନଗର: ଗୁଜୁରାଟରେ ଭୟାବହ ଅଗ୍ନିକାଣ୍ଡ । ଭରୁଚ ସହରରେ ଥିବା ଏକ କେମିକାଲ ଫ୍ୟାକ୍ଟ୍ରିରେ ବ୍ଲାଷ୍ଟ ହୋଇ ଭୟାବହ ଅଗ୍ମିକାଣ୍ଡ ଘଟିଛି । ଏହି କେମିକାଲ ଫ୍ୟାକ୍ଟ୍ରିଟି ଅହମ୍ମବାଦ ଠାରୁ ୨୩୫ କିଲୋମିଟର ଦୂରରେ ରହିଥିବା ବେଳେ ଆଜି (ସୋମବାର) ଭୋର ପ୍ରାୟ ୩ଟା ସମୟରେ ଅଗ୍ନିକାଣ୍ଡ ଘଟିଛି । ଏଥିରେ ୬ ଜଣ ପୋଡି ହୋଇ ଜୀବନ୍ତ ଦଗ୍ଧ ହୋଇଥିବା ସୂଚନା ରହିଛି ।
ଭରୁଚର ଜଣେ ପୋଲିସ ଅଧିକାରୀଙ୍କ କହିବା ଅନୁଯାୟୀ, ଫ୍ୟାକ୍ଟ୍ରିରେ କର୍ମଚାରୀ ମାନେ କାମ କରିବା ସମୟରେ ହଠାତ୍ ଅଗ୍ନିକାଣ୍ଡ ଘଟିଥିଲା ଏବଂ କାର୍ଯ୍ୟରତ ଥିବା ୬ ଜଣ କର୍ମଚାରୀ ଜୀବନ୍ତ ଦଗ୍ଧ ହୋଇଯାଇଥିଲେ । ଏହି ବ୍ଲାଷ୍ଟର ପ୍ରଖରତାଏତେ ଥିଲା ଯେ ଏହାର ତୀବ୍ରତା ବହୁ ଦୂର ପର୍ଯ୍ୟନ୍ତ ଅନୁଭୂତ ହୋଇଥିଲା । ତେବେ ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି । ବର୍ତ୍ତମାନ ୬ ଜଣଙ୍କର ମୃତଦେହକୁ ଉଦ୍ଧାରକରି ପୋଷ୍ଟମୋର୍ଟମ ପାଇଁ ପଠାଇଛି ପୋଲିସ । ଏହି ଅଗ୍ନିକାଣ୍ଟରେ ୬ ଜଣଙ୍କ ମୃତ୍ୟୁ ଘଟିଥିବା ବେଳେ ଆଉ କୌଣସି କର୍ମଚାରୀ ଆହତ ହୋଇନଥିବା ଥାନା ଅଧିକାରୀ ସୂଚନା ଦେଇଛନ୍ତି ।
ଭରୁଚରେ କେମିକାଲ ଫ୍ୟାକ୍ଟ୍ରି ବ୍ଲାଷ୍ଟ ପ୍ରଥମ ଘଟଣା ନୁହେଁ । ଗତବର୍ଷ ଅଗଷ୍ଟ ମାସରେ ମଧ୍ୟ ଗୁଜୁରାଟର ଦହେଜ ଶିଳ୍ପାଞ୍ଚଳରେ ଅଗ୍ନିକାଣ୍ଡ ଘଟି ଜଣେ କର୍ମଚାରୀର ମୃତ୍ୟୁ ହୋଇଥିବା ବେଳେ ୨ ଜଣ ଆହତ ହୋଇଥିଲେ ।
