ମୁମ୍ବାଇ: ସ୍ବାମୀ ସାଜିଲା ସୈତାନ । ନିଜ ସ୍ତ୍ରୀକୁ ଚଳନ୍ତା ଟ୍ରେନ ଆଗକୁ ଫିଙ୍ଗି ହତ୍ୟା କଲା ଜଲ୍ଲାଦ ସ୍ବାମୀ । ମହାରାଷ୍ଟ୍ର ଭାସାଇ ରେଳ ଷ୍ଟେସନରେ ଏଭଳି ବୀଭତ୍ସ ହତ୍ୟାକାଣ୍ଡ ଘଟିଛି । ବଡକଥା ହେଉଛି, ହତ୍ୟାକାରୀ ସ୍ବାମୀ ନିଜର ଦୁଇ ପିଲାଙ୍କ ସାମ୍ନାରେ ହିଁ ପତ୍ନୀଙ୍କୁ ହତ୍ୟା କରିଛି । ଯାହାର ଲୋମଟାଙ୍କୁରା ଭିଡିଓ ସେଠାରେ ଲାଗିଥିବା CCTV କ୍ୟାମେରାରେ କଏଦ ହୋଇଛି । ଷ୍ଟେସନରେ ଏପରି ବୀଭତ୍ସ ହତ୍ୟାକାଣ୍ଡ ଚାରିଆଡେ ଚାଞ୍ଚଲ୍ୟ ଖେଳାଇ ଦେଇଛି ।
ସୂଚନାଯୋଗ୍ୟ, ସୋମବାର ଭୋର ପ୍ରାୟ ୪ଟା ସମୟରେ ଭାସାଇ ଷ୍ଟେସନ ଠାରେ ଏହି କାଣ୍ଡ ଘଟିଛି । ସିସିଟିଭି ଫୁଟେଜରେ ଦେଖାଯାଇଛି, ମହିଳା ଜଣକ ଷ୍ଟେସନରେ ଶୋଇଥିଲେ । ସେହି ସମୟରେ ଏକ ଟ୍ରେନ ଆସୁଥିବାର ଦେଖି ସ୍ବାମୀ ତାଙ୍କୁ ହଠାତ୍ ନିଦରୁ ଉଠାଇଥିଲେ । ଏହାପରେ ତାଙ୍କ ହାତ ଧରି ଟାଣି ନେଇ ଚଳନ୍ତା ଟ୍ରେନ ଆଗକୁ ଠେଲି ଦେଇଥିଲେ । ଫଳରେ ଘଟଣାସ୍ଥଳରେ ହିଁ ମହିଳା ଜଣକ ପ୍ରାଣ ହରାଇଥିଲେ । ସିସିଟିଭିରେ ଅଭିଯୁକ୍ତ ସ୍ବାମୀ ସହ ତାଙ୍କର ଦୁଇଟି ପିଲା ଥିବା ମଧ୍ୟ ଦେଖିବାକୁ ମିଳିଛି । ବର୍ତ୍ତମାନ ରେଲୱେ ପୋଲିସ ଅଭିଯୁକ୍ତକୁ ଧରିବାକୁ ଛାନଭିନ୍ ଚଳାଇଛି ।
