ଚଣ୍ଡିଗଡ଼: ପଞ୍ଜାବରେ ଜଘନ୍ୟ ହତ୍ୟାକାଣ୍ଡ । ପ୍ରେମିକାକୁ ନିର୍ମମ ଭାବେ ହତ୍ୟା କରି ପୋତିଦେଲା ପ୍ରେମିକ । ପଞ୍ଜାବ ଲୁଧିଆନା ସ୍ଥିତ ଜାଗରନ ଠାରେ ଏଭଳି ଏକ ଜଘନ୍ୟ ହତ୍ୟାକାଣ୍ଡ ଘଟିଛି । ଜଣେ 24 ବର୍ଷୀୟ ଯୁବତୀଙ୍କ ପୋତାଯାଇଥିବା ମୃତଦେହ ଉଦ୍ଧାର କରିଛି ପୋଲିସ । ମୃତ ଯୁବତୀ ହେଲେ ଜସପିନ୍ଦପର କୌର ହି ଘଟଣାରେ ଅଭିଯୁକ୍ତ ପ୍ରେମିକ ସମେତ 4 ଜଣଙ୍କୁ ଗିରଫ କରିଛି ପୋଲିସ ।
ପୋଲିସର ସୂଚନା ଅନୁଯାୟୀ, ଗତ ନଭେମ୍ବର 24 ତାରିଖରେ ଯଶପିନ୍ଦର ନିଜ ଘର ଛାଡି଼ ପଳାଇଥିଲେ । ସାଥିରେ କିଛି ଅଳଙ୍କାର ଏବଂ ଟଙ୍କା ମଧ୍ୟ ନେଇଥିଲେ । ଯଶପିନ୍ଦର ନିଖୋଜ ହେବା ନେଇ ଭାଇ ଥାନାରେ ଅଭିଯୋଗ କରିଥିଲେ । ଅନ୍ୟପଟେ ଯଶପିନ୍ଦର ଏବଂ ପରମପ୍ରୀତ ନାମକ ଜଣେ ଯୁବକ ପ୍ରେମ ସମ୍ପର୍କରେ ଥିଲେ । ଯଶପିନ୍ଦର ପରମପ୍ରୀତଙ୍କୁ ବିବାହ କରିବାକୁ ଚାହୁଁଥିଲେ । କିନ୍ତୁ ପରମପ୍ରୀତ ଏଥିରେ ରାଜି ନଥିଲେ । ଏହାକୁ ନେଇ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା ।
ପରମପ୍ରୀତ ଉତ୍ୟକ୍ତ ହୋଇ ଯଶପିନ୍ଦରଙ୍କ ଓଢଣୀରେ ତାଙ୍କ ତଣ୍ଟି ଚିପି ହତ୍ୟା କରିଥିଲେ । ତାଙ୍କ ସହଯୋଗୀଙ୍କ ସହ ମିଶି ପ୍ରଥମେ ମୃତଦେହକୁ ଏକ କେନାଲରେ ଫିଙ୍ଗିଦେଲେ । ହେଲେ କେନାଲ ଶୁଖିଯିବାରୁ ମୃତଦେହକୁ ଆଣି ପୋଡି ଦେଇଥିଲେ । ଏହାପରେ ଅର୍ଦ୍ଧଦଗ୍ଧ ଶରୀରକୁ ଏକ ଘୋଡ଼ାଶାଳରେ ପୋତିଦେଇଥିଲେ । ସୂଚନା ପାଇ ଘଟଣାସ୍ଥଳରେ ପୋଲିସ ପହଞ୍ଚି ଜେସିବି ସାହାଯ୍ୟରେ ମୃତଦେହ ଉଦ୍ଧାର କରିଥିଲା । ଏହି ଘଟଣାରେ ପୋଲିସ ଅଭିଯୁକ୍ତ ପ୍ରେମିକ ସମେତ 4 ସହଯୋଗୀଙ୍କୁ ଗିରଫ କରି ତଦନ୍ତ ଜାରି ରଖିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
