କୋଲକାତା: National Monetisation Pipeline(NMP)କୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀଙ୍କ କଡା ଟାର୍ଗେଟ । NMP ଏହା ଏକ ଆଶ୍ଚର୍ଯ୍ୟଜନକ ଏବଂ ଦୁର୍ଭାଗ୍ୟଜନକ ନିଷ୍ପତ୍ତି ବୋଲି ତୃଣମୂଳ କଂଗ୍ରେସ ମୁଖ୍ୟ ମମତା ବାନାର୍ଜୀ କହିଛନ୍ତି । ଏହି ଯୋଜନାରେ ବିକ୍ରି ହେବାକୁ ଥିବା ସମ୍ପତ୍ତିର ଅର୍ଥରେ ବିଜେପି ନିର୍ବାଚନ ଲଢିବ ବୋଲି ମମତା ଅଭିଯୋଗ କରି କହିଛନ୍ତି ।
ଏହି ଆଶ୍ଚର୍ଯ୍ୟଜନକ ତଥା ଦୁର୍ଭାଗ୍ୟଜନକ ନିଷ୍ପତ୍ତିକୁ ଆମେ ନିନ୍ଦା କରୁଛୁ ବୋଲି ମମତା ରାଜ୍ୟ ସଚିବାଳୟରେ କହିଛନ୍ତି । ଏହି ସମ୍ପତ୍ତିଗୁଡିକ ଦେଶର ଅଟେ, ଏହା ନରେନ୍ଦ୍ର ମୋଦି କିମ୍ବା ଭାରତୀୟ ଜନତା ପାର୍ଟିର ନୁହେଁ । କେନ୍ଦ୍ର ସରକାର ନିଜ ଇଚ୍ଛାରେ ଦେଶର ସମ୍ପତ୍ତି ବିକ୍ରି କରିପାରିବେ ନାହିଁ । ଦେଶ ବିରୋଧୀ ଏହି ନିଷ୍ପତ୍ତିକୁ ସମଗ୍ର ଦେଶ ବିରୋଧ କରିବ ଏବଂ ଏକାଠି ଠିଆ ହେବ। ଏଥିପାଇଁ ବିଜେପିକୁ ଲଜ୍ଜିତ ହେବା ଉଚିତ୍ ବୋଲି ମମତା କହିଛନ୍ତି ।
ତେବେ ସୂଚନା ଅନୁଯାୟୀ ଅର୍ଥମନ୍ତ୍ରୀ ନିର୍ମଳା ସୀତାରମଣ 6 ଲକ୍ଷ କୋଟି ଟଙ୍କାର ଜାତୀୟ ବିମୁଦ୍ରୀକରଣ ପାଇପଲାଇନ ଘୋଷଣା କରିଥିଲେ । ଏହାକୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ କଡା ସମାଲୋଚନା କରିଛନ୍ତି । ଏହା ଉପରେ ପ୍ରତିକ୍ରିୟା ରଖି ପଶ୍ଚିମବଙ୍ଗ ବିଜେପି ପ୍ରଶ୍ନ କରିଛି ଯେ, ଦେଶର ସମ୍ପତ୍ତି ବିଷୟରେ ଚିନ୍ତା କରୁଥିବା ତୃଣମୂଳ କଂଗ୍ରେସ କିପରି ରାଜ୍ୟ ସରକାରଙ୍କ ସମ୍ପତ୍ତି ବିକ୍ରି କରିପାରିଲା ? ବିଜେପି ମୁଖପାତ୍ର ଶାମିକ ଭଟ୍ଟାଚାର୍ଯ୍ୟ କହିଛନ୍ତି ଯେ, ଯଦି ସେମାନେ ଦେଶର ସମ୍ପତ୍ତିକୁ ନେଇ ଏତେ ଚିନ୍ତିତ, ତେବେ ଗତ 10 ବର୍ଷ ମଧ୍ୟରେ ତୃଣମୂଳ କଂଗ୍ରେସ କାହିଁକି ରାଜ୍ୟରେ ଅନେକ ସମ୍ପତ୍ତି ବିକ୍ରି କଲା, ସେସବୁ ସମ୍ପତ୍ତି କାହାର ଥିଲା ? ତୃଣମୂଳ କଂଗ୍ରେସର ନା ରାଜ୍ୟ ସରକାରଙ୍କର ? ପଶ୍ଚିମବଙ୍ଗ ସରକାର ପ୍ରଥମେ ଏହାର ଉତ୍ତର ଦେବା ଉଚିତ୍ ।
ଅନ୍ୟପଟେ ମମତା ବିଜେପିର ପଶ୍ଚିମବଙ୍ଗ ଯିବା-ଆସିବା ଉପରେ ମଧ୍ୟ ପ୍ରଶ୍ନ କରିଛନ୍ତି । ସେ କହିଛନ୍ତି ଯେ ବିଜେପି ବିଧାନସଭା ନିର୍ବାଚନରେ ହାରିବା ପରେ ମଧ୍ୟ କେନ୍ଦ୍ରୀୟ ନେତା ଦୈନିକ ଯାତ୍ରୀଙ୍କ ପରି ବଙ୍ଗଳା ଯାତ୍ରା କରୁଛନ୍ତି । ବର୍ତ୍ତମାନ ସେମାନେ ଆମ ରାଜ୍ୟକୁ ଭାଗ କରିବାକୁ ଚାହୁଁଛନ୍ତି । ଏହାକୁ ଦୃଢ ଭାବେ ବିରୋଧ କରାଯିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
