ନୂଆଦିଲ୍ଲୀ: ଉତ୍ତରପୂର୍ବ ଦିଲ୍ଲୀର ହର୍ଷ ବିହାର ଥାନା ଅଧିନସ୍ଥ ମଣ୍ଡି ମଣ୍ଡୋଳି ରାସ୍ତା ନିକଟରେ ଥିବା ଏକ କସମେଟିକ ଗୋଦାମରେ ଭୟାବହ ଅଗ୍ନିକାଣ୍ଡ ଘଟିଛି । ନିଆଁକୁ ଆୟତ୍ତ କରିବା ପାଇଁ ପ୍ରାୟ 30ଟି ଦମକଳ ବାହିନୀ ପହଞ୍ଚିଥିବାବେଳେ ମୃତାହତ ସମ୍ପର୍କରେ କୌଣସି ଖବର ମିଳିନାହିଁ ।
ଶନିବାର ଅପରାହ୍ନ 3ଟା ସମୟରେ ଏହି କସମେଟିକ ଗୋଦାମରେ ନିଆଁ ଲାଗିଥିଲା । ଏହି ଭୟାବହ ଅଗ୍ନିକାଣ୍ଡ ସମ୍ପର୍କରେ ଖବର ପାଇ ଘଟଣାସ୍ଥଳରେ ପ୍ରାୟ 30ଟି ଦମକଳ ବାହିନୀ ପହଞ୍ଚି ନିଆଁ ଲିଭା ପ୍ରକ୍ରିୟା ଜାରି ରଖିଥିବା ସୂଚନା ମିଳିଛି । ତେବେ ଏହି ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଥିବା ବେଳେ ଗୋଦାମର ଲକ୍ଷାଧିକ ଟଙ୍କାର ସମ୍ପତ୍ତି ପୋଡି ପାଉଁଶ ହୋଇଯାଇଛି । ଗୋଦାମଟି ପ୍ରାୟ 1 ହଜାର ଗଜ ଅଞ୍ଚଳରେ ବ୍ୟାପିଥିବା ଅଗ୍ନିଶମ ବିଭାଗ ସୂଚନା ଦେଇଛି । ତେବେ ଏହି ଅଗ୍ନିକାଣ୍ଡରେ ଏଯାବତ ମୃତାହତ ସମ୍ପର୍କରେ କୌଣସି ସୂଚନା ମିଳିନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
