ଡେରାଡୁନ: ମହାରାଷ୍ଟ୍ରର ହାଇଟେକ ଭିକ୍ଷୁକ ବାବୁରାମ । ଯିଏକି ରିକ୍ସାକୁ ପରିଣତ କରିଛନ୍ତି ଆଲିସାନ ବଙ୍ଗଳାରେ । ତାଙ୍କ ରିକ୍ସାରେ ରହିଛି ଅତ୍ୟାଧୁନିକ ସୁବିଧା । ବାବୁରାମ ତାଙ୍କ ଭ୍ରାମ୍ୟମାଣ ବଙ୍ଗଳା ବା ଅତ୍ୟାଧୁନିକ ରିକ୍ସାରେ କରୁଛନ୍ତି ଭାରତ ଭ୍ରମଣ । ସବୁଠୁ ଖାସ କଥା ହେଉଛି ଏହି ରିକ୍ସାରେ ରହିଛି ଅତ୍ୟାଧୁନିକ ସୁବିଧା । ରିକ୍ସାରେ ଏଲଇଡି ବଲ୍ବ ସହିତ ଟିଭି, ସ୍ପିକର, ଇନଭର୍ଟର, ଜେନେରେଟର, ଫ୍ୟାନ ଓ ଖଟ ମଧ୍ୟ ରହିଛି । ଏହି ରିକ୍ସା ତାଙ୍କର ଆଲିସାନ ବଙ୍ଗଳା ପାଲଟିଥିବା ବେଳେ ବାବୁରାମ ନିଜ ପତ୍ନୀଙ୍କ ସହିତ ଏଥିରେ ହିଁ ଭ୍ରମଣ କରୁଛନ୍ତି ।
ରିକ୍ସାର ସ୍ବତନ୍ତ୍ରତା:- ଫୁଟପାଥରେ ହଜାର ହଜାର ଲୋକଙ୍କୁ ଆପଣ ଦେଖିଥିବେ । ଯାହାଙ୍କ ଜୀବନ ସେହି ରାସ୍ତାରୁ ଆରମ୍ଭ ହୋଇ ସେଇଠି ଶେଷ ହୋଇଯାଏ । ଇଟିଭି ଭାରତ ସମ୍ବାଦଦାତା କିରଣ କାନ୍ତ ଶର୍ମା ରାସ୍ତାରେ ରହୁଥିବା ଏପରି ଜଣେ ଦମ୍ପତିଙ୍କୁ ଭେଟିଥିଲେ ଯାହାଙ୍କ ଘର ପାଲଟିଛି ରାସ୍ତା । ରବିବାର ବିଳମ୍ବିତ ରାତିରେ କିରଣ ଡେରାଡୁନରୁ ହରିଦ୍ବାରରେ ପହଞ୍ଚିଥିଲେ । ଏକ ଚଳଚ୍ଚିତ୍ର ଗୀତର ଶବ୍ଦ ରିକ୍ସା ନିକଟରୁ ଆସୁଥିଲା । କବାଟ ଟିକିଏ ଖୋଲାଥିଲା । ପୁରା କବାଟ ଖୋଲିବା ମାତ୍ରେ ଦେଖାଗଲା ଯେ ଜଣେ ବ୍ୟକ୍ତି ରିକ୍ସାରେ ବିଶ୍ରାମ ନେଉଛନ୍ତି । ଆଉ ରିକ୍ସାର ଡିଜାଇନ ଓ ସାଜସଜ୍ଜା ଏକ ଘର ପରି ଥିଲା । ବାବୁରାମଙ୍କ ଭ୍ରାମ୍ୟମାଣ ଘର ବା ରିକ୍ସାରେ ରହିଛି ସମସ୍ତ ସୁବିଧା । ଏହା ଭିତରେ ଖଟଠୁ ଆରମ୍ଭ କରି ଟିଭି, ଫ୍ୟାନ, ଇନଭର୍ଟର, ଜେନେରଟର ସବୁ କିଛି ରହିଛି ।
ଏହା ବି ପଢନ୍ତୁ- ଅନର୍ଗଳ ଇଂରାଜୀ କହୁଛନ୍ତି ଭିକାରୀ, ଦେଖନ୍ତୁ ଭିଡିଓ
୬ବର୍ଷରେ ବୁଲିଲେଣି ଅନେକ ରାଜ୍ୟ:- ମୁମ୍ବାଇ ବାସୀ ବାବୁରାମ ନିଜ ପତ୍ନୀଙ୍କ ସହିତ ଏହି ରିକ୍ସାରେ ଗତ ୬ ବର୍ଷ ଧରି ଜୀବନ କାଟୁଛନ୍ତି । ପ୍ରଥମେ ଭିକ୍ଷା ବୃତ୍ତି କରୁଥିଲେ । ହେଲେ ଏବେ ସେହି ରିକ୍ସାରେ ହିଁ ଦୋକାନ କରିଛନ୍ତି । ତାଙ୍କ ସନ୍ତାନ ଥିଲେ ସୁଦ୍ଧା ସେମାନେ ବିବାହ କରିବା ପରେ ଏବେ ଅଲଗା ରହୁଛନ୍ତି । ଏଣୁ ବାବୁରାମ ଓ ପତ୍ନୀ ରିକ୍ସାକୁ ନିଜର ଘର ରୂପେ ପରିଣତ କରି ଏଠାରେ ଜୀବନ ବିତାଉଛନ୍ତି । ଏପରି ଭାବରେ ବାବୁରାମ ନିଜ ପତ୍ନୀଙ୍କ ସହିତ ମହାରାଷ୍ଟ୍ର, ଦିଲ୍ଲୀ, ହରିୟାଣା, ଗୁଜୁରାଟ, ୟୁପି ଓ ଉତ୍ତରାଖଣ୍ଡ ଭ୍ରମଣ କରିସାରିଥିବା କହିଛନ୍ତି ।
ନିଜେ ଡିଜାଇନ କରିଛନ୍ତି ରିକ୍ସା:- ଏହି ରିକ୍ସା ଅତ୍ୟନ୍ତ ସ୍ବତନ୍ତ୍ର । କାରଣ ଏହା ବର୍ଷା କିମ୍ବା ଝଡ଼ ଦ୍ବାରା ପ୍ରଭାବିତ ହୁଏ ନାହିଁ । ବାବୁରାମ କହିଛନ୍ତି ଯେ ସେ ନିଜେ ଏହି ରିକ୍ସା ଡିଜାଇନ୍ କରିଛନ୍ତି । ପ୍ରତ୍ୟେକ ଆଇଟମ୍ ଏହାକୁ କିସ୍ତିରେ ନେଇ ରିକ୍ସାରେ ସଜାଇଛନ୍ତି । ବାବୁରାମ ଚଳଚ୍ଚିତ୍ର ଦେଖିବାକୁ ପସନ୍ଦ କରିଥାନ୍ତି । ଏଣୁ ନିଜ ରିକ୍ସାରେ ଏକ ଟିଭି ଲଗାଇଛନ୍ତି । ବାବୁରାମ ସ୍ମାର୍ଟଫୋନ ମଧ୍ୟ ବ୍ୟବହାର କରନ୍ତି । ଯେଉଁଠାକୁ ବୁଲିବାକୁ ଯାଆନ୍ତି, ଏହାର ଲୋକେସନ ସମ୍ପର୍କୀୟଙ୍କୁ ପଠାନ୍ତି ବୋଲି କୁହନ୍ତି ।
