ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ବଢିଲା ଲକଡାଉନ ଅବଧି । ଜୁନ 7 ତାରିଖ ସକାଳ 5 ଯାଏ ଲକଡାଉନ ବଳବତ୍ତର ରଖିବା ପାଇଁ ନିର୍ଦ୍ଦେଶ ଦେଇଛନ୍ତି ଦିଲ୍ଲୀ ସରକାର । ଏନେଇ ଦିଲ୍ଲୀ ସରକାରଙ୍କ ପକ୍ଷରୁ ଆଦେଶ ଜାରି କରିଦିଆଯାଇଛି । ଏହି ଲକଡାଉନ ସମୟରେ ଜରୁରୀ ସେବା, ଉତ୍ପାଦନ ସେବା ସମେତ ମାଲ ପରିବହନ ପୂର୍ବଭଳି ଜାରି ରହିବା ନେଇ ନିର୍ଦ୍ଦେଶରେ ଦର୍ଶାଯାଇଛି ।
ଦିଲ୍ଲୀରେ ସ୍ଥିତି ସାମାନ୍ୟ ସୁଧାର ଆସୁଥିବା ବେଳେ ଅନଲକ ପ୍ରକ୍ରିୟା ଆରମ୍ଭ ହେବା ନେଇ ମଧ୍ୟ ସରକାର ବିଚାରବିମର୍ଶ ଆରମ୍ଭ କରିଦେଇଥିଲେ। ତେବେ ଖୁବ ଶୀଘ୍ର ଅନଲକ ପ୍ରକ୍ରିୟା ଆରମ୍ଭ ହେବା ନେଇ ମଧ୍ୟ ଆଶା କରାଯାଉଥିଲା । କିନ୍ତୁ ସ୍ଥିତିକୁ ଦେଖି ଲକଡାଉନ ଅବଧିକୁ ବୃଦ୍ଧି କରିଛନ୍ତି ଦିଲ୍ଲୀ ସରକାର ।
ବର୍ତ୍ତମାନ ସ୍ଥିତିକୁ ଦେଖି ବିଭିନ୍ନ ରାଜ୍ୟ ଜାରି କରିଥିବା ଲକଡାଉନକୁ ବୃଦ୍ଧି କରିବାରେ ଲାଗିଛନ୍ତି । ଅନ୍ୟପଟେ ଦେଶରେ କୋରୋନା ଗ୍ରାଫ ପୂର୍ବାପେକ୍ଷା କ୍ରମଶଃ ହ୍ରାସ ପାଇବାରେ ଲାଗିଛି । ଏପରି କ୍ରମରେ ବର୍ତ୍ତମାନ ସମୟରେ ସତର୍କତା ଓ ସଚେତନତା ନିହାତି ଆବଶ୍ୟକ, ନଚେତ ପୁଣି ଥରେ କୋରୋନା ଗ୍ରାଫ ଉପରମୁହାଁ ହେବାର ଆଶଙ୍କା ରହିଛି । ତେଣୁ ବିଭିନ୍ନ ରାଜ୍ୟ ଲାଗୁ କରିଥିବା ଲକଡାଉନ ଅବଧୀକୁ ବୃଦ୍ଧି କରିବାରେ ଲାଗିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
