ବେଙ୍ଗାଲୁରୁ: କର୍ଣ୍ଣାଟକର ଦକ୍ଷିଣ କନ୍ନଡ ଜିଲ୍ଲାରେ ହତ୍ୟାର ଶୀକାର ହୋଇଥିବା ବିଜେପି ଯୁବ ମୋର୍ଚ୍ଚାର କାର୍ଯ୍ୟକର୍ତ୍ତା ପ୍ରବୀଣ ନେତାରୁଙ୍କ ଶେଷକୃତ୍ୟ ସମ୍ପନ୍ନ କରାଯାଇଛି । ଆଜି ଅପରାହ୍ନରେ ହଜାର ହଜାର ବିଜେପି କାର୍ଯ୍ୟକର୍ତ୍ତା ଓ ହିନ୍ଦୁ ସଂଗଠନର ସଦସ୍ୟଙ୍କ ଗହଣରେ ପ୍ରବୀଣଙ୍କ ଶେଷକୃତ୍ୟ ସମ୍ପନ୍ନ କରାଯାଇଛି । ଅନ୍ୟପଟେ ଘଟଣା ନେଇ ସାରା ରାଜ୍ୟରେ ତୀବ୍ର ଉତ୍ତେଜନା ଲାଗି ରହିଛି ।
ବିଭିନ୍ନ ସ୍ଥାନରେ ବିଜେପି ଓ ହିନ୍ଦୁ ସଂଗଠନ ପକ୍ଷରୁ ପ୍ରତିବାଦ କରାଯାଇଛି । ଏପରିକି ପ୍ରଦେଶ ବିଜେପି ମୁଖ୍ୟ ମଧ୍ୟ ହିନ୍ଦୁ କାର୍ଯ୍ୟକର୍ତ୍ତାଙ୍କ ଆକ୍ରୋଶରୁ ରକ୍ଷା ପାଇପାରି ନାହାନ୍ତି । ସ୍ଥାନୀୟ ସାଂସଦ ତଥା ପ୍ରଦେଶ ବିଜେପି ଅଧ୍ୟକ୍ଷ ନଳୀନ କୁମାର କୌଟିଲଙ୍କୁ ଉତ୍ତେଜିତ କାର୍ଯ୍ୟକର୍ତ୍ତା ଘେରିଛନ୍ତି । କୌଟିଲଙ୍କ ଗାଡିକୁ ଉତ୍ତେଜିତ ଆନ୍ଦୋଳନକାରୀ ଓଲଟାଇବା ପାଇଁ ଚେଷ୍ଟା କରିଥିଲେ । ପୋଲିସ ପହଞ୍ଚି ସ୍ଥିତିକୁ ନିୟନ୍ତ୍ରଣକୁ ନେଇଥିବା ଦେଖିବାକୁ ମିଳିଥିଲା ।
ଏହା ମଧ୍ୟ ପଢନ୍ତୁ :-କର୍ଣ୍ଣାଟକରେ BJP ଯୁବ ମୋର୍ଚ୍ଚା ନେତାଙ୍କୁ ହତ୍ୟା
ଗତାକାଲି ରାତିରେ ଏହି ବିଭତ୍ସ ହତ୍ୟାକାଣ୍ଡ ଘଟିଛି । 32 ବର୍ଷୀୟ ବିଜେପି ଯୁବ ମୋର୍ଚ୍ଚା କାର୍ଯ୍ୟକର୍ତ୍ତା ପ୍ରବୀଣ କୌଣସି ଏକ ସ୍ଥାନରୁ ଫେରୁଥିବା ବେଳେ ତାଙ୍କୁ ଅତି ବିଭତ୍ସ ଭାବେ ହତ୍ୟା କରାଯାଇଥିଲା । ଏହି ଘଟଣାକୁ ନେଇ ସାରା ରାଜ୍ୟରେ ଉତ୍ତେଜନା ପ୍ରକାଶ ପାଇଛି । ମାମଲାର ତଦନ୍ତ ଆରମ୍ଭ ହୋଇଛି ଓ ମୃତ ପ୍ରବୀଣଙ୍କ ନିକଟ ସମ୍ପର୍କୀୟଙ୍କ ଠାରୁ ତଥ୍ୟ ସଂଗ୍ରହ କରୁଛି ପୋଲିସ । ଖୁବଶୀଘ୍ର ହତ୍ୟାକାରୀଙ୍କୁ ଧରିବାରେ ପୋଲିସ ସଫଳ ହେବା ନେଇ ଦକ୍ଷିଣ କନ୍ନଡ ଏସ.ପି ଋଷିକେଶ କହିଛନ୍ତି । ଅନ୍ୟପଟେ ଘଟଣାକୁ ନିନ୍ଦା କରିବା ସହ ଦୁଃଖ ପ୍ରକାଶ କରିଛନ୍ତି କର୍ଣ୍ଣାଟକ ମୁଖ୍ୟମନ୍ତ୍ରୀ ବଶବରାଜ ବୋମ୍ମାଇ । ପ୍ରବୀଣଙ୍କ ଆତ୍ମାର ସଦଗତି ସହ ପରିବାର ଲୋକଙ୍କୁ ମୁଖ୍ୟମନ୍ତ୍ରୀ ବୋମ୍ମାଇ ସମବେଦନା ମଧ୍ୟ ଜଣାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
