ଭୋପାଳ: ଫଳର ରାଜା ବୋଲାଉଥିବା ଆମ୍ବ କାହାକୁ ବା ପସନ୍ଦ ନୁହେଁ । ଗ୍ରୀଷ୍ମ ଋତୁ ଆସିବା ମାତ୍ରେ ହଳଦିଆ ରଙ୍ଗର ସତେଜ ଆମ୍ବକୁ ଦେଖି ଫଳପ୍ରେମୀ ନିଜ ଲୋଭ ସମ୍ଭାଳି ପାରିନଥାଏ । କିନ୍ତୁ ଆଶ୍ଚର୍ଯ୍ୟକର ବିଷୟ ହେଉଛି ମଧ୍ୟପ୍ରଦେଶର ଏଭଳି ଏକ ତୋଟା ରହିଛି ଯେଉଁଠି ଆମ୍ବଚୋରିକୁ ରୋକିବା ପାଇଁ କୁକୁର ସାଜିଛି ଜଗୁଆଳୀ । ଏଥିରୁ ସ୍ପଷ୍ଟ ଜଣାପଡୁଛି ନିହାତି ଭାବରେ ଏହି ଆମ୍ବର ଚାହିଦା ଢେର ଅଧିକ ହୋଇଥିବ । ଆଉ ଏହି 'ତଇଓ-ନୋ-ତମାଗୋ' ଆମ୍ବର କିଲୋ ପିଛା ଦାମ ହେଉଛି 2 ଲକ୍ଷ ଟଙ୍କା ।
ସାରା ବିଶ୍ବରେ ଆମ୍ବ କଥା ପଡିଲେ କେବଳ ଭାରତ କଥା ନଜରକୁ ଆସେ । ଦେଶରେ ଆମ୍ବର ଅନେକ ପ୍ରଜାତି ରହିଛି । କିନ୍ତୁ ବିଶ୍ବର ସବୁଠୁ ଦାମୀ ଆମ୍ବ ଏହି ରାଜ୍ୟରେ ଚାଷ କରାଯାଏ, ଯାହାର ପ୍ରକୃତ ଉତ୍ପତ୍ତି ସ୍ଥଳ ହେଉଛି ଜାପାନ । ଏହି ଫଳର ମଜା ନେବା ପାଇଁ ଜାପାନ ଯିବାକୁ ପଡିନଥାଏ, ବରଂ ମଧ୍ୟପ୍ରଦେଶ ଜବରପୁଲ ବଗିଚାରେ ଏହି ଫଳର ଚାଷ କରାଯାଏ । ଏହି ଆମ୍ବର ଚୋରିକୁ ରୋକିବା ପାଇଁ ତୋଟାରେ ଜଗୁଆଳୀଙ୍କ ସହିତ ରହିଥାନ୍ତି କୁକୁର । ଦିନରାତି ଏମାନେ ତୋଟାରେ ଜଗି ରହିଥାନ୍ତି । ଦୁନିଆର ସବୁଠୁ ଅଧିକ ଦାମର ଏହି ଆମ୍ବ ଜବଲପୁର ସହିତ ବିହାରର ପୁର୍ଣ୍ଣିଆ ଅଞ୍ଚଳରେ ମଧ୍ୟ ମିଳିଥାଏ । ପୁର୍ଣ୍ଣିଆର ଦୁର୍ଗାବାଡିର ଅଜିତ ସରକାରଙ୍କ ଜ୍ବାଇଁ ଓ ଅନେକ ପରିବାର ଏ ସମ୍ପର୍କରେ ସ୍ପଷ୍ଟ କରିଛନ୍ତି ।
ଜବଲପୁରର ଚରଗାୱାଁ ରୋଡ ନିକଟରେ ରହିଛି ସଙ୍କଳ୍ପ ଓ ରାନି ପରିହାରଙ୍କ ଏହି ବଗିଚା । ସେହି ବଗିଚାରେ 14ରୁ ଅଧିକ ପ୍ରକାରର ଆମ୍ବ ଗଛ ରହିଛି । ସେଥିମଧ୍ୟରୁ ସବୁଠୁ ଅଧିକ ମୂଲ୍ୟର ଆମ୍ବଗଛ ହେଉଛି 'ତଇଓ-ନୋ-ତମାଗୋ' । ଏହି ପ୍ରଜାତିର ଗଛରେ ଗତ 4 ବର୍ଷ ଧରି ପ୍ରଚୁର ପରିମାଣର ଆମ୍ବ ଫଳୁଛି । ଏହି ପ୍ରଜାତିର ଆମ୍ବକୁ ଜାପାନର ପଲି ହାଉସ ଅର୍ଥାତ୍ ପଲିଥିନ ତଳେ ଲଗାଯାଉଥିବା ବେଳେ ଆମ ଦେଶରେ ଖୋଲା ପରିବେଶରେ ଲଗାଯାଇଥାଏ ।
ଏଭଳି ମହଙ୍ଗା ଆମ୍ବର ଚାଷ କରିବା ପ୍ରକୃତରେ କୌଣସି ଚ୍ୟାଲେଞ୍ଜଠାରୁ କମ ନୁହେଁ। ରାନିଙ୍କ ଆମ୍ବତୋଟା ଉପରେ ସବୁବେଳେ ଚୋରଙ୍କ ନଜର ରହିଥାଏ । ସେମାନେ ଆମ୍ବଚୋରି କରି ବଜାରର ଚଢା ଦରରେ ବିକୁଥିବାର ଅନେକ ଖବର ଆସିଛି । ଏହି ବଗିଚାରେ ପ୍ରତି କୋଣରେ କୁକୁରକୁ ରଖାଯାଇଛି । ଫଳରେ କମୁଛି ମହଙ୍ଗା ଆମ୍ବର ଚୋରି । ଯଦି ଏଭଳି ଆମ୍ବର ଚାଷ ପ୍ରତି ସରକାର ଧ୍ୟାନ ଦିଅନ୍ତେ, ତେବେ ଗରିବ ଶ୍ରେଣୀର ଲୋକମାନେ ମଧ୍ୟ ମହଙ୍ଗା ଆମ୍ବର ସ୍ବାଦ ଚାଖିବାରେ ସକ୍ଷମ ହୋଇପାରନ୍ତେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
