ମୁମ୍ବାଇ: ଦକ୍ଷିଣ ଭାରତର ପ୍ରିୟ ଖାଦ୍ୟ 'ଇଟିଲି', କାହାକୁ ବା ପସନ୍ଦ ନୁହେଁ । ଧବଳ ବର୍ଣ୍ଣର ଏହି ଖାଦ୍ୟଟି ଶରୀର ପାଇଁ ହୋଇଥାଏ ବେଶ ଉପଯୋଗୀ । ଏଥିଲାଗି ଖାଦ୍ୟ ପ୍ରତି ସଚେତନ ଲୋକ ନିକଟରେ ଏହି ଖାଦ୍ୟର ରହିଥାଏ ବେଶ ଚାହିଦା । ତେବେ ଇଟିଲି କଥା କହିଲେ ଆପଣଙ୍କ ମନରେ ଧଳା ରଙ୍ଗର ଇଟିଲି ମନେ ପଡ଼ିଥାଏ । କିନ୍ତୁ ଆପଣ କେବେ କଳା ରଙ୍ଗ(Famous balck idli from Nagpur)ର ଇଟିଲି ସମ୍ପର୍କରେ ଶୁଣିଛନ୍ତି କି ? ଏଭଳି ଭିନ୍ନ ରଙ୍ଗର ଇଟିଲି ମହାରାଷ୍ଟ୍ର ନାଗପୁର ଅଞ୍ଚଳରେ ମିଳୁଥିବା ଦେଖିବାକୁ ମିଳିଛି ।
ଦେଶରେ ଅନ୍ୟ ପ୍ରାନ୍ତରୁ ଦୋକାନରେ ଲାଗୁଛି ଲୋକଙ୍କ ଭିଡ଼:-
ଏହି ଇଟିଲିକୁ ଦକ୍ଷିଣ ଭାରତବାସୀ କୁମାର ରେଡ୍ଡି(Kumar Reddy cooks Black Idli) ପ୍ରସ୍ତୁତ କରୁଛନ୍ତି । ଏହାକୁ ନେଇ ଏବେ ଦେଶରେ ଚର୍ଚ୍ଚା ହେଉଛି । କେବଳ ମହାରାଷ୍ଟ୍ରରେ ନୁହେଁ, ଏହି ଇଟିଲି ସମ୍ପର୍କରେ ସୋସିଆଲ ମିଡ଼ିଆରେ ଖବର ପାଇବା ପରେ ଫୁଡ୍ ଲଭର୍ମାନେ ଏହି ଦୋକାନରେ ଭିଡ଼ ଜମାଉଛନ୍ତି । ରେଡ୍ଡି ନାଗପୁରର ସିଭିଲ ଅଞ୍ଚଳରେ ଦୋକାନ କରିଛନ୍ତି । ଲୋକମାନେ ପ୍ରାତଃ ଭ୍ରମଣ କରିବାକୁ ଆସିବା ପରେ ଏଠାରେ ଜଳଖିଆ କରୁଥିବା ଦେଖିବାକୁ ମିଳିଛି ।
କିପରି ଆସିଲା ଚିନ୍ତାଧାରା ?
ରେଡ୍ଡି ସମସ୍ତଙ୍କଠୁ ଭିନ୍ନ ଖାଦ୍ୟ ସହିତ ସୁସ୍ବାଦୁ ଖାଦ୍ୟ ବନାଇବା ପାଇଁ ଚିନ୍ତା କରିଥିଲେ । ଏହାପରେ ସେ ପ୍ରଥମେ ଅଣ୍ଡା ଇଟିଲି(egg idli) ପ୍ରସ୍ତୁତ କରିଥିଲେ । କିନ୍ତୁ ଏହି ପ୍ରକାରର ଇଟିଲିକୁ ଏତେ ପସନ୍ଦ କରିନଥିଲେ ଲୋକେ । ଏହାପରେ ରେଡ୍ଡିଙ୍କ ଜଣେ ବନ୍ଧୁ ତାଙ୍କୁ କଳା ରଙ୍ଗ(black idli) ତିଆରି ପାଇଁ କହିଥିଲେ । ଏହାପରେ ଏହି ରଙ୍ଗର ଇଟିଲି ତିଆରି କରିଥିଲେ ରେଡ୍ଡି ।
କିପରି ପ୍ରସ୍ତୁତ ହୁଏ 'କଳା ଇଟିଲି' ?
ଏହି କଳା ରଙ୍ଗର ଇଟିଲିକୁ ପ୍ରସ୍ତୁତ କରିବା ପାଇଁ ରେଡ୍ଡି କମଳା ଚୋପା ଓ ନଡ଼ିଆ ସଢେଇକୁ ପୋଡିଥାନ୍ତି । ଏହାପରେ ଏଗୁଡ଼ିକୁ ଗୁଣ୍ଡ କରି ଏକ ପାଉଡ଼ର ପ୍ରସ୍ତୁତ କରନ୍ତି । ଇଟିଲି ପିଠଉରେ ସେ ଏହି ପାଉଡ଼ର ମିଶାଇ ପ୍ରସ୍ତୁତ କରନ୍ତି 'ସୁସ୍ବାଦୁ କଳା ଇଟିଲି' । ଏହି ଭିନ୍ନ ରଙ୍ଗର ଇଟିଲି ପ୍ରସ୍ତୁତ ହେବା ପରେ ଲୋକଙ୍କ ଦୃଷ୍ଟି ଆକର୍ଷଣ କରିଥିଲା । ଏହାର ସ୍ବାଦ ଚାଖିବା ପରେ ଲୋକେ ଖୁବ ପସନ୍ଦ କରିଥିଲେ ।
ସପ୍ତରଙ୍ଗୀ 'ଇଟିଲି':-
ରେଡ୍ଡିଙ୍କ ଦୋକାନକୁ ଆସୁଥିବା କିଛି ଲୋକେ କଳା ରଙ୍ଗର ଇଟିଲି ଖାଇବା ପରେ ଏବେ ତାଙ୍କୁ 'ସପ୍ତରଙ୍ଗ'ର ଇଟିଲି ପ୍ରସ୍ତୁତ କରିବା ପାଇଁ ଦେଇଛନ୍ତି ପରାମର୍ଶ । ଗ୍ରାହକଙ୍କ ଇଚ୍ଛାକୁ ସମ୍ମାନ ଜଣାଇ ଏପରି ଆଉ ଏକ ଭିନ୍ନ ରଙ୍ଗର ଇଟିଲି ସେ ଖୁବଶୀଘ୍ର ପ୍ରସ୍ତୁତ କରିବେ ବୋଲି କହିଛନ୍ତି ରେଡ୍ଡି ।
ବ୍ୟୁରୋ ରିପୋର୍ଟ, ଇଟିଭି ଭାରତ
