ନୂଆଦିଲ୍ଲୀ: ପ୍ରଧାନମନ୍ତ୍ରୀ ରେସ୍ରୁ ରାହୁଲ ଗାନ୍ଧୀଙ୍କୁ ବାହାର କରିବାକୁ ମଲ୍ଲିକାର୍ଜୁନ ଖଡ଼ଗେଙ୍କ ନାଁ ସୁପାରିଶ ହୋଇଛି । ଟିଏମସି ସୁପ୍ରିମୋ ମମତା ବାନାର୍ଜୀ ଓ ଆପ୍ ମୁଖ୍ୟ ଅରବିନ୍ଦ କେଜ୍ରିୱାଲ ରାହୁଲଙ୍କୁ ଆଉଟ୍ କରିବା ପାଇଁ ଖଡ଼ଗେଙ୍କୁ ଇଣ୍ଡିଆ ମେଣ୍ଟର ପ୍ରଧାନମନ୍ତ୍ରୀ ପ୍ରାର୍ଥୀ କରିବାକୁ ପ୍ରସ୍ତାବ ରଖିଛନ୍ତି । କାରଣ ସେମାନେ ଜାଣିଛନ୍ତି ରାହୁଲ ଥାଉ ଥାଉ ଖଡଗେ କେବେ ବି ପ୍ରଧାନମନ୍ତ୍ରୀ ପ୍ରାର୍ଥୀ ହେବନି । ଗତକାଲିର ବିରୋଧୀ ମେଣ୍ଟ ବୈଠକ ପରେ ଏଭଳି ବୟାନ ଦେଇଛନ୍ତି କେନ୍ଦ୍ରମନ୍ତ୍ରୀ ଗିରିରାଜ ସିଂହ ।
କେନ୍ଦ୍ରମନ୍ତ୍ରୀ ଗିରିରାଜଙ୍କ କହିବା କଥା, ୨୦୨୪ ଲୋକସଭା ନିର୍ବାଚନରେ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ଭାବେ ପ୍ରତିଦ୍ବନ୍ଦିତା କରନ୍ତୁ ବୋଲି ମମତା ବାନାର୍ଜୀ ଏବଂ କେଜ୍ରିୱାଲ ଚାହୁଁ ନାହାନ୍ତି । ତେଣୁକରି ପ୍ରଧାନମନ୍ତ୍ରୀ ଦୌଡ଼ରୁ ରାହୁଲଙ୍କ ଆଉଟ୍ କରିବାକୁ ସେମାନେ ବୈଠକରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ନାଁ ପ୍ରସ୍ତାବ କରିଛନ୍ତି । କେଜ୍ରିୱାଲ ଏବଂ ମମତା ବାନାର୍ଜୀ ଭଲ ଭାବେ ଜାଣିଛନ୍ତି ଯେ ରାହୁଲ ଗାନ୍ଧୀ ଥିବା ପର୍ଯ୍ୟନ୍ତ ଖଡ଼ଗେ କେବେ ପ୍ରଧାନମନ୍ତ୍ରୀ ପ୍ରାର୍ଥୀ ହେବେନି । ତେଣୁ ରାହୁଲଙ୍କୁ ପ୍ରାର୍ଥୀ ନକରିବାକୁ ସେମାନେ ଏଭଳି ପ୍ରସ୍ତାବ ଦେଇଛନ୍ତି । ଏପରି କରି ସେମାନେ ଉଭୟ ଖଡ଼ଗେ ଏବଂ ରାହୁଲଙ୍କୁ ନିଜ ଜାଲରେ ଫସାଇଛନ୍ତି ।
