ଥିରୁଅନନ୍ତପୁରମ: ଦେଶରେ ମହାମାରୀ କୋରୋନାର ଭୟାବହତା ମଧ୍ୟରେ କେରଳରେ କାୟା ବିସ୍ତାର କରୁଛି ଜିକା ଭାଇରସ(Zika virus) । ରବିବାର ରାଜ୍ୟରେ ଆଉ ୨ ଜିକା ଭାଇରସ ପଜିଟିଭ ଚିହ୍ନଟ ହୋଇଛନ୍ତି । ତେବେ ଏହାକୁ ମିଶାଇ ବର୍ତ୍ତମାନସୁଦ୍ଧା କେରଳରେ ଜିକା ଭାଇରସ ମାମଲା ୪୮ରେ ପହଁଞ୍ଚିଛି ।
ରବିବାର ରାଜ୍ୟରେ ଆଉ ୨ ଜିକା ଭାଇରସ ପଜିଟିଭ ରୋଗୀ ଚିହ୍ନଟ ହୋଇଛନ୍ତି । ଏବେ ରାଜ୍ୟରେ ମୋଟ ୪୮ଟି ମାମଲା ଚିହ୍ନଟ ହୋଇସାରିଥିବା ସୂଚନା ଦେଇଛନ୍ତି କେରଳ ସ୍ବାସ୍ଥ୍ୟମନ୍ତ୍ରୀ ଭୀନା ଜର୍ଜ ।
ସ୍ବାସ୍ଥ୍ୟ ବିଭାଗର ସୂଚନା ଅନୁଯାୟୀ, କେରଳରେ ରବିବାର ୨ଟି ଜିକା ଭାଇରସ ପଜିଟିଭ ମିଳିଛି । ଏଥିମଧ୍ୟରୁ ୫ଟି ମାମଲା ସକ୍ରିୟ ରହିଛି । ରବିବାର ଚିହ୍ନଟ ପଜିଟିଭ ମଧ୍ୟରୁ ଥିରୁଅନନ୍ତପୁରମର ଜଣେ ୪୨ ବର୍ଷୀୟ ମହିଳା ଥିବାବେଳେ କୋଲ୍ଲମରୁ ୩୦ ବର୍ଷୀୟ ମହିଳା ସାମିଲ ଅଛନ୍ତି ।
ଥିରୁଅନନ୍ତପୁରମ ମେଡିକାଲ କଲେଜର ଭାଇରୋଲୋଜୀ ଲ୍ୟାବରେ ହୋଇଥିବା ଟେଷ୍ଟରୁ ଏହି ୨ ଜଣ ମହିଳାଙ୍କ ନମୁନା ପଜିଟିଭ ମିଳିଛି । ତେବେ ସଂକ୍ରମିତ ମେଡିକାଲରେ ଭର୍ତ୍ତି ହୋଇନଥିବାବେଳେ ସେମାନଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଥିବା ସୂଚନା ଦିଆଯାଇଛି ।
୨୨ ଜୁଲାଇରେ ରାଜ୍ୟରେ ୩ଟି ଜିକା ଭାଇରସ ମାମଲା ରିପୋର୍ଟ ହୋଇଥିଲା । ଭାଇରସକୁ ନେଇ ଗୋଟିଏ କଣ୍ଟ୍ରୋଲରୁମ ମଧ୍ୟ ଆରମ୍ଭ କରାଯାଇଛି । ଜୁଲାଇ ୯ରେ କେରଳରେ ପ୍ରଥମ ଜିକା ଭାଇରସ ଚିହ୍ନଟ ହୋଇଥିଲା ।
