ଥୀରୁଅନନ୍ତପୁରମ: କେରଳରେ ମୃତ୍ୟୁର ବିଭୀଷିକା ରଚିଛି ବନ୍ୟା । ଲଗାଣ ବର୍ଷା ସାଙ୍ଗକୁ ଭୂସ୍ଖଳନ ନେଲାଣି ଏକାଧିକ ଜୀବନ । ଗତ ୨/୩ ଦିନ ମଧ୍ୟରେ କେରଳରେ ମୃତ୍ୟୁସଂଖ୍ୟା ୩୯ ରେ ପହଞ୍ଚିଛି । ପାଣିପାଗ ବିଭାଗ ମଧ୍ୟ ଆଜି(ବୁଧବାର) ଏବଂ ଆସନ୍ତାକାଲି(ଗୁରୁବାର) ପ୍ରବଳ ବର୍ଷା ନେଇ ସତର୍କ ସୂଚନା ଜାରି କରିଛି ।
ନଦୀକୂଳ ଏବଂ ପାହାଡିଆ ଅଞ୍ଚଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ତେଣୁ ସତର୍କ ରହିବାକୁ ପରାମର୍ଶ ଦେଇଛି ପାଣିପାଗ ବିଭାଗ । କୋଲାମ, ଅଲପୁଜାହା ଏବଂ କସରଗୋଡକୁ ୟେଲୋ ୱାର୍ଣ୍ଣିଂ ଜାରି କରାଯାଇ ଥିବାବେଳେ ବାକି ୧୧ ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି କରାଯାଇଛି । ମତ୍ସ୍ୟଜୀବୀଙ୍କୁ ଶୁକ୍ରବାର ପର୍ଯ୍ୟନ୍ତ ସମୁଦ୍ରକୁ ନ ଯିବାକୁ ପରାମର୍ଶ ଦିଆଯାଇଛି ।
ଇଡୁକ୍କି ସମେତ ବିଭିନ୍ନ ଡ୍ୟାମ ଖୋଲାଯାଇଥିବାରୁ ଅତ୍ୟଧିକ ସତର୍କତା ଜାରି କରାଯାଇଛି । ସୁରକ୍ଷା ବ୍ୟବସ୍ଥାକୁ ତ୍ୱରାନ୍ୱିତ କରିବାକୁ ରାଜ୍ୟ ସରକାର ଜିଲ୍ଲା ସଂଗ୍ରହକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ପ୍ରବଳ ବର୍ଷା ଥିବା ଅଞ୍ଚଳରେ ବିଶେଷ ସତର୍କତା ଅବଲମ୍ବନ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର । ପାହାଡ ଅଞ୍ଚଳରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଉପକୂଳବର୍ତ୍ତୀ ଅଞ୍ଚଳରେ ମଧ୍ୟ ସତର୍କତା ଅବଲମ୍ବନ କରାଯାଇଛି ।
ରାଜସ୍ୱ ମନ୍ତ୍ରୀ କେ ରାଜନ କହିଛନ୍ତି ଯେ, ଉଦ୍ଧାର କାର୍ଯ୍ୟ ପାଇଁ ରାଜ୍ୟରେ 12 ଟି NDRF ଦଳ ନିୟୋଜିତ ହୋଇଛନ୍ତି । ବାୟୁସେନା ଏବଂ ନୌସେନାର ସହାୟତା ମଧ୍ୟ ମଗାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
