ବେଙ୍ଗାଲୁରୁ: ଦୁଇ ଚକିଆ ଯାନ, ଟିଭି, ଫ୍ରିଜ ଓ ପାଞ୍ଚ ଏକରରୁ ଅଧିକ ଜମି ଥିବା ଲୋକଙ୍କୁ ଆଉ ଦାରିଦ୍ର୍ୟ ସୀମାରେଖା ତଳେ ଗଣାଯିବ ନାହିଁ । ଏମାନଙ୍କୁ ନିଜ ବିପିଏଲ କାର୍ଡ ସରେଣ୍ଡର୍ କରିବାକୁ ପଡିବ । ଏଭଳି ଚେତାବନୀ ଦେଇଛନ୍ତି କର୍ଣ୍ଣାଟକର ୟେଦ୍ୟୁୟିରପ୍ପା ସରକାର ।
ଦୁଇ ଚକିଆ ଯାନ ସହ ଟିଭି, ଫ୍ରିଜ ଥିବା ବିପିଏଲ ରାସନକାର୍ଡ ହିତାଧିକାରୀଙ୍କୁ ମାର୍ଚ୍ଚ 21 ସୁଦ୍ଧା କାର୍ଡ ସରେଣ୍ଡର କରିବାକୁ ପଡିବ ନଚେତ ଆଇନଗତ କାର୍ଯ୍ୟାନୁଷ୍ଠାନର ସାମ୍ନା କରିବା ପାଇଁ ପ୍ରସ୍ତୁତ ରହିବାକୁ ସରକାର କହିଛନ୍ତି । କର୍ଣ୍ଣାଟକ ଖାଉଟିମନ୍ତ୍ରୀ ଉମେଶ କଟ୍ଟି ବେଲଗାୱି ସାମ୍ବାଦିକ ସମ୍ମିଳନୀରେ କହିଛନ୍ତି, ବିପିଏଲ କାର୍ଡ ରଖିବା ପାଇଁ କିଛି ମାପଡଣ୍ଡ ରହିଛି । ହିତାଧିକାରୀ ପାଖରେ 5 ଏକରରୁ ଅଧିକ ଜମି, ମୋଟର ସାଇକେଲ, ଟିଭି କି ଫ୍ରିଜ ନଥିବା ଆବଶ୍ୟକ ।
ମନ୍ତ୍ରୀ କହିଛନ୍ତି, ଯେଉଁମାନେ ମାପଦଣ୍ଡ ଅନୁଯାୟୀ ଯୋଗ୍ୟ ବିବେଚିତ ହେଉନାହାନ୍ତି, ସେମାନଙ୍କୁ ନିଜ ବିପିଏଲ କାର୍ଡ ଫେରାଇବାକୁ ପଡିବ । ନେଚେତ ସେମାନଙ୍କ ଉପରେ ହେବ କାର୍ଯ୍ୟାନୁଷ୍ଠାନ । ମନ୍ତ୍ରୀ ଏହା ମଧ୍ୟ କହିଛନ୍ତି କି ବାର୍ଷିକ 1.20 ଲକ୍ଷ ଟଙ୍କା ରୋଜଗାର କରୁଥିବା ଲୋକଙ୍କୁ ବିପିଏଲ କାର୍ଡ ବ୍ୟବହାର କରିବା ଉଚିତ ନୁହେଁ । ଏମାନଙ୍କୁ ମାର୍ଚ୍ଚ 31 ସୁଦ୍ଧା କାର୍ଡ ଫେରାଇବାକୁ ପଡିବ ।
ସେପଟେ ମନ୍ତ୍ରୀଙ୍କ ଏହି ବୟାନଙ୍କୁ ସମାଲୋଚନା କରିଛି କଂଗ୍ରେସ । ଦଳର କାର୍ଯ୍ୟକର୍ତ୍ତା ବେଙ୍ଗାଲୁରୁର ବିଭିନ୍ନ ସ୍ଥାନରେ ରାସନ ଦୋକାନ ସାମ୍ନାରେ ପ୍ରଦର୍ଶନ କରିଥିବା ଦେଖିବାକୁ ମିଳିଛି ।
