ନୂଆଦିଲ୍ଲୀ: ଶେଷ ହୋଇଛି ଉପ ରାଷ୍ଟ୍ରପତି ନିର୍ବାଚନ । ବିରୋଧୀ ପ୍ରାର୍ଥୀ ମାର୍ଗରେଟ ଅଲଭାଙ୍କୁ ପରାଜିତ କରି ଦେଶର ୧୪ତମ ଉପ ରାଷ୍ଟ୍ରପତି ଭାବେ ନିର୍ବାଚିତ ହୋଇଛନ୍ତି ଏନଡିଏ ମେଣ୍ଟର ପ୍ରାର୍ଥୀ ଜଗଦୀପ ଧନଖର । 72.8 ପ୍ରତିଶତ ସହ ଧନଖରଙ୍କୁ ମୋଟ 528 ଖଣ୍ଡ ଭୋଟ ମିଳିଛି । ତେବେ କିଛି ଦିନ ପୂର୍ବରୁ ପଶ୍ଚିମଙ୍ଗର ବିବାଦୀୟ ରାଜ୍ୟପାଳ ଭାବେ ଗଣମାଧ୍ୟମର ଶିରୋନାମାରେ ରହୁଥିବା ଧନଖର ଏବେ ଉପ ରାଷ୍ଟ୍ରପତି । ପଶ୍ଚିମବଙ୍ଗ ରାଜ୍ୟପାଳ ବ୍ୟତୀତ ଆଉ କେଣ ପାଇଁ ଚର୍ଚ୍ଚିତ ଥିଲେ ଧନଖର । ରାଜ୍ୟପାଳ ହେବା ପୂର୍ବରୁ କ’ଣ ଥିଲା ତାଙ୍କ ରାଜନୈତିକ କ୍ୟାରିଅର । କ’ଣ ରହିଥିଲା ଜାତୀୟ ରାଜନୀତିରେ ତାଙ୍କର ଭୂମିକା । ତେତେ ଥର ନିର୍ବାଚନ ଲଢିଛନ୍ତି ସେ । କେମିତି ଥିଲା ତାଙ୍କ ରାଜନୈତିକ ଯାତ୍ରା । କ’ଣ ଥିଲା ପାରିବାରିକ ପୃଷ୍ଠଭୂମି ଓ ପ୍ରାରମ୍ଭିକ ଜୀବନ ? ସକ୍ରିୟ ରାଜନୀତିରେ କଣ ରହିଛି ଧନଖରଙ୍କ ଅଭିଜ୍ଞତା । ଜାଣନ୍ତୁ ଏସବୁ ସମ୍ପର୍କରେ ।
ପ୍ରାରମ୍ଭିକ ଜୀବନ:-
ଧନଖରଙ୍କ ଜନ୍ମ 1951 ମହିହା ମେ’ 18 ତାରିଖରେ ରାଜସ୍ଥାନ କିଥାନାରେ ହୋଇଥିଲା । ପ୍ରାରମ୍ଭିକ ଶିକ୍ଷା ଶେଷ ପରେ ସେ ରାଜସ୍ଥାନ ବିଶବବିଦ୍ୟାଳୟରୁ ସ୍ନାତ୍ତୋକତ୍ତର ଡିଗ୍ରୀ ହାସଲ କରିଥିଲେ । ପରେ ସେ ଆଇନରେ ମଧ୍ୟ ଉଚ୍ଚଶିକ୍ଷା ଲାଭ କରିଛନ୍ତି । ଛାତ୍ର ଜୀବନ ଶେଷ ହେବା ପ୍ରଥମେ ଆଇନଜୀବୀ ଭାବେ କାର୍ଯ୍ୟ ଆରମ୍ଭ କରିଥିବା ଧନଖର ପରେ ସକ୍ରିୟ ରାଜନୀତିରେ ପାଦ ଥାପିଥିଲେ ।
ରାଜନୈତିକ କ୍ୟାରିଅର:-
ଜନତା ଦଳରୁ ନିଜ ରାଜନୈତିକ ଜୀବନ ଆରମ୍ଭ କରନ୍ତି ଧନଖର । 1989–91 ରେ ଜନତା ଦଳରୁ ସେ 9ମ ଲୋକସଭାକୁ ସାଂସଦ ଭାବେ ନିର୍ବାଚିତ ହୋଇ ପ୍ରଥମ ଥର ସଂସଦରେ ପହଞ୍ଚିଥିଲେ । ଝୁନଝୁନ ଲୋକସଭା କ୍ଷେତ୍ରରୁ ସେ ସାଂସଦ ଭାବେ ନିର୍ବାଚିତ ହୋଇଥିଲେ । ତତ୍କାଳୀନ ପ୍ରଧାନମନ୍ତ୍ରୀ ଚନ୍ଦ୍ରଶେଖରଙ୍କ କ୍ୟାବିନେଟରେ ସେ ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ବ ସମ୍ଭାଳିଥିଲେ । ପରେ ସେ 1993–98 ରେ ରାଜସ୍ଥାନ 10ମ ବିଧାନସଭାକୁ ମଧ୍ୟ କିଷାନଗଡ ବିଧାନସଭା ମଣ୍ଡଳୀରୁ ବିଧାୟକ ଭାବେ ମଧ୍ୟ ନିର୍ବାଚିତ ହୋଇଛନ୍ତି । ଜଣେ ରାଜନେତା ବ୍ୟତୀତ ଆଇନଜୀବୀ ଭାବେ ପରିଚୟ ହାସଲ କରି ପାରିଥିଲେ ଧନଖର । ସେ ରାଜସ୍ଥାନ ହାଇକୋର୍ଟ ବାର ଆସୋସିଏସନର ସଭାପତି ଭାବେ ଅବସ୍ଥାପିତ ହୋଇଛନ୍ତି ।
ପଶ୍ଚିମବଙ୍ଗ ରାଜ୍ୟପାଳ ଭାବେ ଚର୍ଚ୍ଚାରେ:-
ସକ୍ରିୟ ରାଜନୀତିରେ ବେଶ କିଛି ଦିନ ଥିବା ଧନଖର କିନ୍ତୁ 2019 ଜୁଲାଇ 30 ତାରିଖରେ ବିଜେପିର କଠୋର ବିରୋଧୀ ତୃଣମୂଳ କଂଗ୍ରେସ ଶାସିତ ପଶ୍ଚିମବଙ୍ଗ ରାଜ୍ୟପାଳ ଭାବେ ନିଯୁକ୍ତ ହୁଅନ୍ତି । ତେବେ ଏହି ରାଜ୍ୟପାଳ ଭାବେ କାର୍ଯ୍ୟକାଳରେ ସର୍ବାଧିକ ଚର୍ଚ୍ଚାକୁ ଆସିଥିଲେ ଧନଖର । ବିଜେପିର କଠୋର ବିରୋଧୀ ଭାବେ ଜଣାଶୁଣା ତୃଣମୂଳ କଂଗ୍ରେସ ସୁପ୍ରିମୋ ତଥା କୋଲକାତା ମମତା ବାନାର୍ଜୀ ଓ ଧନଖରଙ୍କ ବିବାଦ ଏକାଧିକ ସମୟରେ ଗଣମାଧ୍ୟମ ଶିରୋନାମା ପାଲଟିଥିଲା । ମୁଖ୍ୟମନ୍ତ୍ରୀ-ରାଜ୍ୟପାଳ ବିବାଦ 2021 ରେ ମଧ୍ୟରେ ହୋଇଥିଲା ପଶ୍ଚିମବଙ୍ଗ ବିଧାନସଭା ନିର୍ବାଚନ । ବିଜେପି ଏଠାରେ ସମସ୍ତ ଶକ୍ତି ଖଟାଇ ମଧ୍ୟ ମମତାଙ୍କୁ ଗାଦିରୁ ହଟାଇବାରେ ସଫଳ ନହୋଇପାରି ବିରୋଧୀ ଦଳରେ ସନ୍ତୁଷ୍ଟ ହେବାକୁ ବାଧ୍ୟ ହୋଇଥିଲ । ସେତେବେଳେ ଧନଖରଙ୍କ ଭୂମିକା ନେଇ ମଧ୍ୟ ବିବାଦ ସୃଷ୍ଟି ହୋଇଥିଲା ।
ମମତା-ଧନଖର ବିବାଦ:-
ରାଜ୍ୟପାଳ ଧନଖର ବିଜେପି କର୍ମୀ ଭାବେ କାର୍ଯ୍ୟ କରୁଥିବା ଦର୍ଶାଇ ତାଙ୍କୁ ହଟାଇବା ପାଇଁ କେନ୍ଦ୍ରର ଦ୍ବାରସ୍ଥ ହୋଇଥିଲେ ତୃଣମୂଳ କଂଗ୍ରେସର କର୍ମକର୍ତ୍ତା । ନିର୍ବାଚନୀ ପରବର୍ତ୍ତୀ ହିଂସା ପରେ ମୁଖ୍ୟମନ୍ତ୍ରୀ ମମତା ଓ ରାଜ୍ୟପାଳ ଧନଖରଙ୍କ ମଧ୍ୟରେ ବାକଯୁଦ୍ଧ ଓ ଆରୋପ-ପ୍ରତ୍ୟାରୋପ ମଧ୍ୟ ଜୋର ଧରିଥିଲା । କେତେକ ସ୍ଥାନରେ ଧନଖରଙ୍କୁ ତୃଣମୂଳ କଂଗ୍ରେସ କର୍ମୀମାନେ ବିରୋଧ କରିଥିବା ଦେଖିବାକୁ ମଧ୍ୟ ମିଳିଥିଲା । ଏସବୁ ମଧ୍ୟରେ ଧନଖରଙ୍କୁ ଉପରାଷ୍ଟ୍ରପତି ପ୍ରାର୍ଥୀ ଭାବେ ଘୋଷଣା କରିଥିଲା ବିଜେପି । ଆଜି ନିର୍ବାଚନରେ ବିରୋଧୀ ପ୍ରାର୍ଥୀ ଅଲଭାଙ୍କୁ ଦେଶର ୧୪ତମ ରାଷ୍ଟ୍ରପତି ଭାବେ ନିର୍ବାଚିତ ହୋଇଛନ୍ତି ଜଗଦୀପ ଧନଖର ।
ବ୍ୟୁରୋ ରିପୋର୍ଟ, ଇଟିଭି ଭାରତ
