ଜେରୁଜେଲମ: ଏପ୍ରିଲ ୩ ତାରିଖରେ ଇସ୍ରାଏଲ ପ୍ରଧାନମନ୍ତ୍ରୀ ଭାରତ ଗସ୍ତରେ ଆସିବାକୁ ଥିବାବେଳେ ଏହି ଗସ୍ତ ବାତିଲ ହୋଇଯାଇଛି । ଇସ୍ରାଏଲ ପ୍ରଧାନମନ୍ତ୍ରୀ ନାଫଟିଲ ବେନେଟ ଏପ୍ରିଲ ୩ ତାରିଖରୁ ଦୁଇ ଦିନି ଆଭାରତ ଗସ୍ତରେ ଆସିବାକୁ ଥିବାବେଳେ ଗତକାଲି ସେ କୋଭିଡ ସଂକ୍ରମିିତ ହୋଇଥିବା ଜଣାପଡିଥିଲା । ତେବେ ସେ ସଂକ୍ରମିତ ଜଣାପଡିବା ପରେ ତାଙ୍କ ବିଦେଶ ଗସ୍ତ ନେଇ କଳ୍ପନାଜଳ୍ପନା ଜାରି ରହିଥିଲା । ଆଜି ତାଙ୍କ ଭାରତ ଗସ୍ତ ବାତିଲ ହୋଇଥିବା ସରକାରୀ ଭାବେ ସ୍ପଷ୍ଟ କରାଯାଇଛି ।
ଏନେଇ ଇସ୍ରାଏଲ ପ୍ରଧାନମନ୍ତ୍ରୀଙ୍କ ପରାମର୍ଶଦାତାଙ୍କ ପକ୍ଷରୁ ସ୍ପଷ୍ଟ କରାଯାଇଥିବା ବେଳେ ପରବର୍ତ୍ତୀ ସମୟରେ ଏହି ଗସ୍ତ ପାଇଁ ଆଉ ଏକ କାର୍ଯ୍ୟସୂଚୀ ସ୍ଥିର ହେବା ନେଇ କୁହାଯାଇଛି । ତେବେ କେବେ ଦ୍ବିତୀୟ ଗସ୍ତସୂଚୀ ଜାରି ହୋଇପାରେ ସେ ନେଇ କୌଣସି ସୂଚନା ମିଳିପାରିନାହିଁ ।
ଭାରତ-ଇସ୍ରାଏଲର ଦ୍ବିପାକ୍ଷିକ ସମ୍ପର୍କର ୩୦ବର୍ଷ ପୂର୍ତ୍ତି ଅବସରରେ ବେନେଟଙ୍କୁ ଭାରତ ଆସିବା ପାଇଁ ଆମନ୍ତ୍ରିତ କରିଥିଲେ ପ୍ରଧାନମନ୍ତ୍ରୀ ମୋଦି । ତେବେ ଗସ୍ତର ଦୁଇ ଦିନ ପୂର୍ବରୁ ଅର୍ଥାତ ଗତକାଲି ବେନେଟ କୋଭିଡରେ ଆକ୍ରାନ୍ତ ହୋଇଥିବା ଜଣାପଡିଥିଲା । ପରେ ତାଙ୍କର ନିକଟତମ ବିଦେଶ ଗସ୍ତ ପ୍ରଭାବିତ ହେବା ନେଇ ଆଶଙ୍କା କରାଯାଉଥିବା ବେଳେ ତାହା ହିଁ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
