କୋଲକତା: ସ୍ବିଡେନ 32 ବର୍ଷୀୟ ରିସର୍ଚ୍ଚ ସ୍କଲାର ରୋଶନି ଦାସଙ୍କ ସନ୍ଦେହଜନକ ମୃତ୍ୟୁ । ମୃ୍ତ୍ୟୁ ଘଟଣାରେ ସ୍ବିଡେନ ନାଗରିକଙ୍କ ସମ୍ପୃକ୍ତି ଥିବା ସନ୍ଦେହ କରାଯାଉଛି । ସେପଟେ ପଶ୍ଚିମବଙ୍ଗର ଦୁର୍ଗାପୁରରେ ରୋଶନିଙ୍କ ମାଆ ଏକୁଟିଆ ରହୁଥିବା ବେଳେ ଝିଅର ମୃତଦେହକୁ ଫେରାଇ ଆଣିବା ପାଇଁ ସ୍ବିଡେନ ସରକାରଙ୍କୁ ଗୁହାରି କରିଛନ୍ତି ।
ସୂଚନା ଅନୁସାରେ, ପଶ୍ଚିମବଙ୍ଗ ଦୁର୍ଗାପୁର ଡିପିଏଲ ଟାଉନସିପର ରୋଶନି ଦାସ ଦୁର୍ଗାପୁରରେ ନିଜର ସ୍କୁଲ ଶେଷ କରିବା ପରେ ବର୍ଦ୍ଦମାନ ଷ୍ଟେଟ କଲେଜରୁ ପ୍ରାଣୀବିଜ୍ଞାନ ଅନର୍ସରେ ଡିଗ୍ରୀ ହାସଲ କରିଥିଲେ । ପରେ ଭୁବନେଶ୍ବର ସ୍ଥିତ କଳିଙ୍ଗ ବିଶ୍ବବିଦ୍ୟାଳୟରେ ବାୟୋଟେକ୍ନୋଲୋଜିରେ ମଧ୍ୟ ଡିଗ୍ରୀ ହାସଲ କରିଥିଲେ । ଏହାପରେ ରୋଷନି ଉଚ୍ଚଶିକ୍ଷା ପାଇଁ ସ୍ବିଡେନ ଯିବା ସହ ଉମେଆ ବିଶ୍ବବିଦ୍ୟାଳୟରେ ନିଜର ରିସର୍ଚ୍ଚ ଆରମ୍ଭ କରିଥିଲେ । ସେଠାରେ ତାଙ୍କର ନ୍ୟୁରୋଲୋଜିରେ ପୋଷ୍ଟଡକ୍ଟରାଲର ଶେଷ ପର୍ଯ୍ୟାୟରେ ଥିଲା ।
ରୋଶନିଙ୍କ ମାଆ ମମତା ଦାସଙ୍କ କହିବା ଅନୁସାରେ, ଶେଷଥର ପାଇଁ ସେପ୍ଟେମ୍ବର 29ରେ ରୋଶନିଙ୍କ ସହ କଥା ହୋଇଥିଲେ । ଏହା ପରଠାରୁ ତାଙ୍କ ସହ ଯୋଗାଯୋଗରେ ନଥିଲେ । ଅକ୍ଟୋବର 12 ତାରିଖରେ ରୋଶନିଙ୍କ ମୃତଦେହ ଏକ ଆପାର୍ଟମେଣ୍ଟରୁ ଉଦ୍ଧାର କରାଯାଇଥିବା ନେଇ ସ୍ବିଡେନ ଦୂତାବାସ ଭାରତୀୟ ଦୂତାବାସଙ୍କୁ ସୂଚନା ଦେଇଥିଲେ । ସବୁଠାରୁ ବଡ଼ କଥା ଦେଉଛି ଏହି ଘଟଣାରେ ଜଣେ ସ୍ବିଡେନ ନାଗରିକ ସମ୍ପୃକ୍ତ ଥିବା ସହ ତାଙ୍କୁ ସ୍ବିଡେନ ପୋଲିସ ଗିରଫ କରିଛି । ସେପଟେ ଝିଅର ଏଭଳି ସନ୍ଦେହଜନକ ମୃତ୍ୟୁକୁ ନେଇ ପରିବାର ଦୁଃଖରେ ଭାଙ୍ଗି ପଡ଼ିଛନ୍ତି ।
ଏହା ମଧ୍ୟ ପଢ଼ନ୍ତୁ....ନିଶା ନିବାରଣ କେନ୍ଦ୍ରରେ ଅନ୍ତେବାସୀଙ୍କ ସନ୍ଦେହଜନକ ମୃତ୍ୟୁ, ପରିବାର ଆଣିଲା ହତ୍ୟା ଅଭିଯୋଗ
ରୋଶନିଙ୍କ ମାଆ ଏହା ମଧ୍ୟ କହିଛନ୍ତି, "2018 ମସିହାରେ ଝିଅ ନିଜର ରିସର୍ଚ୍ଚ ପାଇଁ ସ୍ବିଡେନ ଯାଇଥିଲେ । ଦୁର୍ଭାଗ୍ୟ ବଶତଃ ଠିକ ସମୟରେ ସେ ତାର କାର୍ଯ୍ୟ କରିପାରିନଥିଲା ଏବଂ ନିଜର ଖାଲି ସମୟରେ ଏହାକୁ ଜାରି ରଖିବା ପାଇଁ ନିଷ୍ପତ୍ତି ନେଇଥିଲା । କିଛିଦିନ ପୂର୍ବରୁ ତାର କିଛି ଟଙ୍କାର ଆବଶ୍ୟକ ଥିଲା । ଅକ୍ଟୋବର 6 ତାରିଖରେ ତାକୁ ଟଙ୍କା ପଠାଇଥିଲି । ସବୁଥର ଟଙ୍କା ପଠାଇବା ପରେ ରୋଶନି ମତେ ଜଣାଇଥାଏ । କିନ୍ତୁ ସେଥର ରୋଶନି ଟଙ୍କା ପାଇଥିବା ନେଇ କୌଣସି ସୂଚନା ଦେଇନଥିଲା । ଏମିତିକି ତାର ଫୋନ ମଧ୍ୟ ବନ୍ଦ ଥିଲା । ଏହାପରେ ରୋଶନିର ମୃତ୍ୟୁ ହୋଇଥିବା ନେଇ ଖବର ମିଳିଥିଲା । ଝିଅର ସନ୍ଦେଦଜନକ ମୃତ୍ୟୁ ପାଇଁ ଦାୟୀ ଥିବା ବ୍ୟକ୍ତି ଉପରେ କାର୍ଯ୍ୟାନୁଷ୍ଠାନ ନେବା ସହ ଝିଅର ମୃତଦେହ ଆମକୁ ହସ୍ତାନ୍ତର କରିବା ପାଇଁ ଆମେ ସ୍ବିଡେନ ସରକାରଙ୍କୁ ଅନୁରୋଧ କରିଛୁ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
