ନୂଆଦିଲ୍ଲୀ: ସୀମାରେ ଚୀନ ସହ ଜାରି ଉତ୍ତେଜନା ମଧ୍ୟରେ ଆମେରିକା ଓ ଭାରତ ସମ୍ପର୍କରେ ଦେଖିବାକୁ ମିଳିଛି ନୂଆ ଝଲକ । ଆମେରିକା କମ୍ପାନୀଠୁ ଲିଜ୍ରେ ଅଣାଯାଇଥିବା ଦୁଇଟି ପ୍ରିଡେଟର ଡ୍ରୋନକୁ ଭାରତୀୟ ନୌସେନାରେ କରାଯାଇଛି ସାମିଲ ।
ହିନ୍ଦ-ପ୍ରଶାନ୍ତ ମହାସାଗରେ ନଜର ରଖିବ ଏହି ଡ୍ରୋନ । କେବଳ ଏତିକି ନୁହେଁ, ଏହି ଡ୍ରୋନକୁ ପୂର୍ବ ଲଦାଖର ବାସ୍ତବିକ ନିୟନ୍ତ୍ରଣ ରେଖା(LAC)ରେ ମଧ୍ୟ ମୁତୟନ କରାଯାଇପାରେ ।
ଭାରତ-ଚୀନ ବିବାଦକୁ ଦୃଷ୍ଟିରେ ରଖି ଏହି ଦୁଇଟି ଆମେରିକୀୟ ଡ୍ରୋନ୍ ପାଇଁ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଜରୁରୀକାଳୀନ କ୍ରୟ ଅଧୀନରେ ଅନୁମତି ଦିଆଯାଇଥିଲା । ପରେ ଏହାକୁ ନୌସେନାରେ ଅନ୍ତର୍ଭୁକ୍ତ କରାଯାଇଛି । ସରକାରୀ ଶୀର୍ଷ ସୂତ୍ରର ସୂଚନା ଅନୁଯାୟୀ ଏହି ଡ୍ରୋନଗୁଡିକ ନଭେମ୍ବରର ଦ୍ବିତୀୟ ସପ୍ତାହରେ ଭାରତରେ ପହଞ୍ଚିଥିବା ବେଳେ 21 ନଭେମ୍ବରରେ ଭାରତୀୟ ନୌସେନାର ଆଇଏନଏସ ରଜାଲି ବେସରେ ଆୟୋଜିତ ଫ୍ଲାଇଙ୍ଗ୍ ଅପରେସନରେ ସାମିଲ କରାଯାଇଥିଲା ।
ଡ୍ରୋନଗୁଡିକ ଉଡ଼ାଣ କାର୍ଯ୍ୟ ଆରମ୍ଭ କରିସାରିଛନ୍ତି ଏବଂ ସାମୁଦ୍ରିକ ଶକ୍ତି ପାଇଁ ଏହା ଅତ୍ୟନ୍ତ ପ୍ରଭାବଶାଳୀ ପ୍ରମାଣିତ ହେବ । ସମ୍ବାଦ ସରବରାହ ସଂସ୍ଥା ଏଏନଆଇ ସୂତ୍ରରୁ ପ୍ରକାଶ ଯେ ଆମେରିକାର କ୍ରୁମାନେ ମଧ୍ୟ କମ୍ପାନୀରୁ ଆସିଛନ୍ତି, ଯେଉଁମାନେ ନୌସେନାକୁ ଏହି ଡ୍ରୋନ ମେସିନ ଚଳାଇବାରେ ସାହାଯ୍ୟ କରିବେ ।
