ନୂଆଦିଲ୍ଲୀ: ଜାତିସଂଘ ସାଧାରଣ ପରିଷଦରେ ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ୍ ଖାନ କାଶ୍ମୀର ସଂକ୍ରାନ୍ତରେ ଦେଇଥିବା ମନ୍ତବ୍ୟ ଉପରେ ଜବାବ ଦେଲା ଭାରତ । ଆତଙ୍କବାଦୀଙ୍କ ପ୍ରତ୍ୟକ୍ଷ ସହାୟକ ଭାବେ ପାକିସ୍ତାନ ବିଶ୍ବ ପରିଚିତ ବୋଲି ଜାତିସଂଘ ସାଧାରଣ ପରିଷଦରେ ଭାରତର ପ୍ରଥମ ସଚିବ ସ୍ନେହା ଦୁବେ କହିଛନ୍ତି ।
ସେ କହିଛନ୍ତି ଯେ, ଆତଙ୍କବାଦୀଙ୍କୁ ପାଳନ କରିବା, ସାହାଯ୍ୟ ଦେବା ଓ ସିଧାସଳଖ ସମର୍ଥନ କରିବାରେ ପାକିସ୍ତାନର ନାମ ଇତିହାସରେ ଅଛି ଏହା ମଧ୍ୟ ପାକିସ୍ତାନର ଏକ ନୀତି ସଦୃଶ । ଜାତିସଂଘ ନିଷିଦ୍ଧ କରିଥିବା ଆତଙ୍କବାଦୀମାନଙ୍କ ମଧ୍ୟରୁ ବିପୁଳ ସଂଖ୍ୟକ ଆତଙ୍କବାଦୀଙ୍କୁ ପାକିସ୍ତାନ ସହାୟତା ଦେଇଥିବାର ପ୍ରତ୍ୟକ୍ଷ ପ୍ରମାଣ ରହିଛି । ଓସାମା ବିନ୍ ଲାଡେନ୍ ପାକିସ୍ତାନରେ ଆଶ୍ରୟ ନେଇଥିଲେ । ଆଜି ମଧ୍ୟ ପାକିସ୍ତାନର ନେତୃତ୍ବ ତାଙ୍କୁ ଜଣେ ‘ସହିଦ’ ଭାବେ ଗୌରବାନ୍ବିତ କରୁଛି ।
ସେ ଆହୁରି ମଧ୍ୟ କହିଛନ୍ତି, ଦୁଃଖର ବିଷୟ, ଜାତିସଂଘ ପ୍ରଦତ୍ତ ଏହି ମଞ୍ଚରେ ପାକିସ୍ତାନର ନେତା ମୋ ଦେଶ ବିରୋଧରେ ମିଥ୍ୟା ଓ ବିଦ୍ବେଷଭରା ପ୍ରଚାର କରିବା ଏହା ପ୍ରଥମ ନୁହେଁ । ପାକିସ୍ତାନରେ ଆତଙ୍କବାଦୀମାନେ ନିଶୁଳ୍କ ସୁବିଧା ସୁଯୋଗ ପାଉଥିବା ବେଳେ ସାଧାରଣ ଜନତା ବିଶେଷକରି ସଂଖ୍ୟାଲଘୁ ସଂପ୍ରଦାୟଙ୍କ ଜୀବନ ଓଲଟପାଲଟ ହୋଇଯାଇଛି । ଆପଣା ଦେଶର କରୁଣ ପରିସ୍ଥିତି ଉପରୁ ବିଶ୍ବର ଦୃଷ୍ଟି ହଟାଇବା ଲାଗି ପାକିସ୍ତାନୀ ନେତା ଏଭଳି ବୃଥା ଉଦ୍ୟମ କରୁଛନ୍ତି ।
ପାକିସ୍ତାନ ଉପରେ ଦୋଷାରୋପ କରି ଦୁବେ ଆହୁରି ମଧ୍ୟ କହିଛନ୍ତି, ଆତଙ୍କବାଦୀଙ୍କୁ ପାଳନ-ପୋଷଣ କରି ପାକିସ୍ତାନ ଅଗ୍ନିସଂଯୋଗକାରୀ ହୋଇ ଥିବାବେଳେ ଅଗ୍ନିନିର୍ବାପକର ଛଦ୍ମବେଶ ଧାରଣ କରିଛି । ଏପରି ଛଦ୍ମବେଶ ଧାରଣ ନ କରି ବେଆଇନ ଭାବେ ଦଖଲ କରିଥିବା ଅଞ୍ଚଳଗୁଡ଼ିକୁ ପାକିସ୍ତାନ ତୁରନ୍ତ ଛାଡ଼ି ଦେଉ ।
ସୂଚନାଯୋଗ୍ୟ, ଶୁକ୍ରବାର ସନ୍ଧ୍ୟାରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କର ପୂର୍ବରୁ ରେକର୍ଡ ହୋଇଥିବା ଏକ ଭାଷଣ ଜାତିସଂଘର ସାଧାରଣ ପରିଷଦ୍ ବୈଠକରେ ପ୍ରସାରିତ ହୋଇଥିଲା । ନୂଆଦିଲ୍ଲୀ କଶ୍ମୀରରେ ମାନବ ଅଧିକାର ଉଲ୍ଲଂଘନ କରୁଛି ବୋଲି ସେଥିରେ ସେ କହିଥିଲେ । ଏହାର କଡା ଜବାବ ଦେଇଛନ୍ତି ଭାରତର ପ୍ରଥମ ଜାତିସଂଘ ସାଧାରଣ ପରିଷଦର ସଚିବ ସ୍ନେହା ଦୁବେ କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
