Israel-Hamas War: ଇସ୍ରାଏଲରେ ଫସିଛନ୍ତି ୨୦ ହଜାର ଭାରତୀୟ, ଉଦ୍ଧାର ପାଇଁ ଆରମ୍ଭ ହେଲା ଅପରେସନ ଅଜୟ

ଯୁଦ୍ଧଗ୍ରସ୍ତ ଇସ୍ରାଏଲରେ ଫସିଛନ୍ତି ହଜାର ହଜାର ଭାରତୀୟ । ସେମାନଙ୍କୁ ସୁରକ୍ଷିତ ସ୍ବଦେଶ ଫେରାଇ ଆଣିବା ପାଇଁ ଅପରେସନ ଅଜୟ ଆରମ୍ଭ କଲେ ଭାରତ ସରକାର । ଅଧିକ ପଢନ୍ତୁ

ତେଲ୍ ଅଭିଭ୍: ଯୁଦ୍ଧଗ୍ରସ୍ତ ଇସ୍ରାଏଲରେ ୨୦ ହଜାରରୁ ଅଧିକ ଭାରତୀୟ ଫସି ରହିଛନ୍ତି । ଆଜକୁ ୬ ଦିନ ହେଲାଣି ଇସ୍ରାଏଲ ଓ ହମାସ୍ ମଧ୍ୟରେ ଘମାଘୋଟ ଯୁଦ୍ଧ ଜାରି ରହିଥିବା ବେଳେ ଭାରତୀୟ ନାଗରିକମାନେ ସେଠାରେ ଭୟ ଓ ଆତଙ୍କରେ ଜୀବନ କାଟୁଛନ୍ତି । ତେଣୁ ସେମାନଙ୍କୁ ସୁରକ୍ଷିତ ଭାବେ ସ୍ବଦେଶ ଫେରାଇ ଆଣିବାକୁ 'ଅପରେସନ ଅଜୟ' ଆରମ୍ଭ କରିଛନ୍ତି ଭାରତ ସରକାର । ଏନେଇ ବୁଧବାର ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ଘୋଷଣା କରିଛନ୍ତି ।

ବୈଦେଶିକ ମନ୍ତ୍ରୀ ଅପରେସନ ସମ୍ପର୍କରେ କହିଛନ୍ତି ଯେ, ଯୁଦ୍ଧଗସ୍ତ ଇସ୍ରାଏଲରୁ ଭାରତୀୟ ନାଗରିକଙ୍କୁ ଉଦ୍ଧାର ପାଇଁ ସ୍ବତନ୍ତ୍ର ଚାର୍ଟର ବିମାନ ଏବଂ ଅନ୍ୟାନ୍ୟ ବ୍ୟବସ୍ଥା କରାଯିବ । ବିଦେଶରୁ ଆମ ନାଗରିକଙ୍କୁ ସୁରକ୍ଷିତ ଫେରାଇ ଆଣିବାକୁ ଆମେ ପ୍ରତିଶ୍ରୁତିବଦ୍ଧ । ଏଥିପାଇଁ ଅପେରସନ ବିଜୟ ଲଞ୍ଚ ହୋଇଛି । ଯେଉଁମାନେ ଭାରତ ଫେରିବା ପାଇଁ ପ୍ରଥମେ ପଞ୍ଜିକରଣ କରିଥିଲେ, ସେମାନଙ୍କୁ ଆଜି ସ୍ବତନ୍ତ୍ର ବିମାନ ଯୋଗେ ସ୍ବଦେଶକୁ ଫେରାଇ ଅଣାଯିବ ।

ସେପଟେ ମୁମ୍ବାଇରେ ଥିବା ଇସ୍ରାଏଲର କନସୁଲ ଜେନେରାଲ କୋବ୍ବି ଶୋସାନି ନ୍ୟୁଜ୍‌ ଏଜେନ୍ସି PTIକୁ କହିଛନ୍ତି ଯେ, ଇସ୍ରାଏଲରେ ୨୦ ହଜାରରୁ ଅଧିକ ଭାରତୀୟ ବସବାସ କରୁଛନ୍ତି, ଯାହାକି ଏବେ ପାଲେଷ୍ଟାଇନର ଆତଙ୍କୀ ଗୋଷ୍ଠୀ ହମାସ୍ ସହ ଯୁଦ୍ଧ କରୁଛି । ତେବେ ବାସ୍ତବରେ କେତେ ସଂଖ୍ୟକ ଭାରତୀୟ ଇସ୍ରାଏଲରେ ଫସି ରହିଛନ୍ତି ସେନେଇ ସେ ସ୍ପଷ୍ଟ କରିପାରି ନାହାନ୍ତି । ଇସ୍ରାଏଲ ଓ ହମାସ୍ ମଧ୍ୟରେ ଲଢେଇ ପରେ ମଙ୍ଗଳବାର କେରଳ ମୁଖ୍ୟମନ୍ତ୍ରୀ ପିନାରାୟୀ ବିଜୟନ ବୈଦେଶିକ ମନ୍ତ୍ରୀ ଜୟଶଙ୍କରଙ୍କୁ ଏକ ଚିଠି ଲେଖି ଯୁଦ୍ଧଗ୍ରସ୍ତ ଦେଶରେ ଫସିଥିବା କେରଳର ୭ ହଜାର ନାଗରିକଙ୍କ ସୁରକ୍ଷା ସୁନିଶ୍ଚିତ କରିବାକୁ ନିବେଦନ କରିଥିଲେ ।

ତେବେ ଇସ୍ରାଏଲରେ ଫସିଥିବା ଭାରତୀୟଙ୍କ ମଧ୍ୟରେ ଅନେକ ଛାତ୍ର ଅଛନ୍ତି । ସେହିପରି ଆଉ ବ୍ୟବସାୟ ଏବଂ ବୁଲିବା ପାଇଁ ଯାଇଥିବା ଅଧିକାରୀ ଜଣାଇଛନ୍ତି । ବଲିଉଡ ଅଭିନେତ୍ରୀ ନୁସରତ୍ ଭରୁଚା ମଧ୍ୟ ହାଫିଆ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ଯୋଗ ଦେବା ପାଇଁ ଇସ୍ରାଏଲ ଯାଇଥିବା ବେଳେ ସେଠାରେ ଫସି ଯାଇଥିଲେ । ତାଙ୍କୁ ଫେରାଇ ଆଣିବାକୁ ଇସ୍ରାଏଲରେ ଥିବା ଭାରତୀୟ ରାଷ୍ଟ୍ରଦୂତଙ୍କ ସହ ସମ୍ପର୍କ କରାଯାଇଥିଲା । ଏହାପରେ ସ୍ବତନ୍ତ୍ର ବିମାନ ଯୋଗେ ସେ ଭାରତ ଫେରି ଆସିଥିଲେ ।