ହାଇଦ୍ରାବାଦ: ସମ୍ପତ୍ତି ପାଇଁ ଭାଇ ସାଜେ ଭଗାରୀ । ଏ ଉକ୍ତିତ ଆପଣ ଶୁଣିଥିବେ । କିନ୍ତୁ ସ୍ତ୍ରୀର ସମ୍ପତ୍ତି ହଡପ କରିବାକୁ ସ୍ବାମୀ ଓ ପୁଅ କେଉଁ ସ୍ତରକୁ ଯାଇପାରନ୍ତି ତାହା ଜାଣିଲେ ଆପଣ ଚକିତ ହୋଇଯିବେ । ପତ୍ନୀର ସମ୍ପତ୍ତିକୁ ହଡପ କରିବାକୁ ବାପା ପୁଅ ରଚିଛନ୍ତି ସାଙ୍ଘାତିକ ଷଡଯନ୍ତ୍ର । ତେଲେଙ୍ଗାନା ହନୁମାନକୋଣ୍ଡା ଥାନା ଅଞ୍ଚଳରେ ଘଟିଥିବା ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି ।
ସମ୍ପତ୍ତି ଲୋଭରେ ନିର୍ଦ୍ଦୟ ପାଲଟି ଗଲେ ପୁଅ ଓ ସ୍ବାମୀ । ମାଆକୁ ମାରି ଦେଲା ପୁଅ ଓ ସ୍ତ୍ରୀକୁ ମାରିଦେଲା ସ୍ବାମୀ । ତାହା ପୁଣି ସତରେ ନୁହଁ ବରଂ ସାର୍ଟିଫିକେଟରେ । ୧୫ କୋଟି ସମ୍ପତ୍ତି ପାଇବା ଲୋଭରେ ମହିଳାଙ୍କୁ ଅକଥନୀୟ ଅତ୍ୟାଚାର ପରେ ସେ ମାନସିକ ଭାରସାମ୍ୟ ହରାଇବାରୁ ଟ୍ରେନରେ ବାହାର ରାଜ୍ୟକୁ ପଠାଇ ନିଖୋଜ ଥିବା ଦର୍ଶାଇଲେ ସ୍ବାମୀ ଓ ପୁଅ । ଘଟଣାର ୫ ବର୍ଷ ପରେ ସତ ଏବେ ସାମ୍ନାକୁ ଆସିଛି ।
ଘଟଣାଟି ଥିଲା ଏମିତି
ନିର୍ଯାତନାର ଶିକାର ହୋଇଥିବା ମହିଳା ବିବାହ ସମୟରେ ୧୫ କୋଟି ଟଙ୍କାର ସମ୍ପତ୍ତି ଆଣିଥିଲେ । କିନ୍ତୁ ବିବାହର କିଛି ବର୍ଷ ପରେ ମହିଳାଙ୍କ ସ୍ବାମୀ ଦ୍ବିତୀୟ ବିବାହ କରିଥିଲେ । ଏହାପରେ ସମ୍ପତ୍ତି ହଡପ କରିବା ପାଇଁ ପ୍ରଥମ ସ୍ତ୍ରୀକୁ ନିର୍ଯାତନା ଦେବା ଆରମ୍ଭ କରିଥିଲା । ମହିଳାଙ୍କ ପୁଅ ମଧ୍ୟ ସମ୍ପତ୍ତି ଲୋଭରେ ମାଆକୁ ନିର୍ଯାତନା ଦେବା ଆରମ୍ଭ କରିଥିଲେ । କିନ୍ତୁ ସମ୍ପତ୍ତି ଦେବାକୁ ମହିଳା ଜଣଙ୍କ ଏଥିରେ ଅମଙ୍ଗ ହେବାରୁ ପୁଅ ଓ ସ୍ବାମୀ ତାଙ୍କୁ ଅକଥନୀୟ ଅତ୍ୟାଚାର ଦେବାରୁ ସେ ମାନସିକ ଭାରସାମ୍ୟ ହରାଇ ବସିଥିଲେ । ଏହା ପରେ ମହିଳା ଜଣଙ୍କୁ ନିଖୋଜ କରି ସମସ୍ତ ସମ୍ପତ୍ତି ନିଜ ନାମରେ କରିବା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ କରିଥିଲେ ବାପା ପୁଅ । ମହିଳା ଜଣଙ୍କୁ ୨୦୧୭ ମସିହାରେ ଟ୍ରେନରେ ବସାଇଦେଇ ସେ ନିଖୋଜ ହୋଇଯାଇଥିବା ପରିବାର ଲୋକଙ୍କୁ ଜଣାଇଥିଲେ । ଏହା ପରେ ମହିଳାଙ୍କ ସ୍ବାମୀ ଅନ୍ୟ ଜଣେ ମହିଳା ସହ ବାହାରକୁ ଚାଲିଯାଇଥିଲେ । ଧିରେ ଧିରେ ସମ୍ପର୍କୀୟ ମଧ୍ୟ ମହିଳାଙ୍କୁ ଭୁଲିଗଲେ ।
ତେବେ ମହିଳା ଜଣଙ୍କ ଟ୍ରେନରେ ବସିବାର କିଛି ଦିନ ପରେ ଚେନ୍ନାଇରେ ପହଞ୍ଚିଥିଲେ । ଏହାପରେ ରେଲଓ୍ବେ ପୋଲିସ ଦ୍ବାରା ତାଙ୍କୁ ଏକ ଆଶ୍ରମରେ ରଖାଯାଇଥିଲା । ମହିଳା ଜଣଙ୍କୁ ତାଙ୍କ ବିଷୟରେ ପଚାରିବାରୁ ସେ ସବୁ କିଛି ଭୁଲିଯାଇଥିବା କହିଥିଲେ । ଏହାପରେ ଆଶ୍ରମର ସଦସ୍ୟ ମହିଳା ଜଣଙ୍କ ଆଧାରକାର୍ଡ କରାଇବାକୁ ଆଧାରକାର୍ଡ ସେଣ୍ଟର ନେଇଥିଲେ, ସେଠାରେ ଫିଙ୍ଗର ପ୍ରିଣ୍ଟ ନେବା ସମୟରେ ତାଙ୍କ ନାମରେ ପୂର୍ବରୁ ଆଧାରକାର୍ଡ ଥିବା ଜଣାପଡିଥିଲା । ଆଧାରକାର୍ଡରୁ ମହିଳା ଜଣଙ୍କ ତେଲେଙ୍ଗାନାର ହୋଇଥିବା ଜଣାପଡିବା ପରେ ପରିବାର ଲୋକଙ୍କ ସହ ଯୋଗଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ସମ୍ଭବପର ହୋଇପାରିନଥିଲା । ଏହାପରେ ହନୁମାନକୋଣ୍ଡା ପୋଲିସ ସହ ଯୋଗାଯୋଗ କରିବାରୁ ମହିଳାଙ୍କ ପୁଅଙ୍କ ସହ ଯୋଗାଯୋଗ କରି ଫଟୋ ପଠାଇଥିଲେ । କିନ୍ତୁ ସେ ପ୍ରଥମେ ଜାଣିନଥିବା କହି, ପରେ ତାଙ୍କ ମାଆଙ୍କର ମୃତ୍ୟୁ ହୋଇଥିବା କହିଥିଲେ । ଏବଂ ତାଙ୍କ ପାଖରେ ମୃତ୍ୟୁ ପ୍ରମାଣପତ୍ର ରହିଥିବା କହିଥିଲେ । କିନ୍ତୁ ଏନେଇ ପୋଲିସ ତଦନ୍ତ କରିବା ପରେ ସତ ସାମ୍ନାକୁ ଆସିଥିଲା ।
ପୋଲିସର କହିବା ଅନୁଯାୟୀ, ''ମହିଳାଙ୍କ ସ୍ବାମୀ ଓ ପୁଅ ସମ୍ପତ୍ତି ଲୋଭରେ ମହିଳା ଜଣଙ୍କୁ ଟ୍ରେନରେ ପଠାଇ ଦେଇ ଏକ ମୃତ୍ୟୁର ପ୍ରମାଣ ପତ୍ର କରିଥିଲେ । ଏହାକୁ ୱାରଙ୍ଗାଲ ନଗର ପ୍ରଶାସନ ନିକଟରେ ଦେଖାଇ ସମସ୍ତ ସମ୍ପତ୍ତିକୁ ନିଜ ନାମରେ କରିଥିଲେ''। ତେବେ ମୃତ୍ୟୁର ପ୍ରମାଣପତ୍ର କେମିତି କରିଥିଲେ ସେନେଇ ତଦନ୍ତ ଜାରି ରହିଛି । ବର୍ତ୍ତମାନ ମହିଳା ଜଣଙ୍କ ଆଶ୍ରମରେ ରହିଛନ୍ତି । ଯଦି ପରିବାର ସଦସ୍ୟ ଚାହାନ୍ତି ତାଙ୍କୁ ଘରକୁ ଆଣିପାରିବେ। ଏନେଇ ଆଶ୍ରମର ସଦସ୍ୟ ମାନେ ହନୁମାନକୋଣ୍ଡା ଜିଲ୍ଲାପାଳଙ୍କୁ ଏକ ଚିଠି ଲେଖିଛନ୍ତି ।
