ଶିମଲା: ହିମାଚଳ ପ୍ରଦେଶ ବିଧାନସଭା ନିର୍ବାଚନ ଫଳାଫଳ ଉପରେ ଦେଶର ନଜର ରହିଛି । ଏନେଇ ଭୋଟ ଗଣତି ଜାରି ରହିଛି । ବିଜେପି ମୁଖ୍ୟମନ୍ତ୍ରୀ ଜୟରାମ ଠାକୁରଙ୍କ ସମେତ ମୋଟ 11 ମନ୍ତ୍ରୀଙ୍କ ଭାଗ୍ୟ ବାଜିରେ ଲାଗିଛି । ଏଥରୁ ଦୁଇଜଣ ମନ୍ତ୍ରୀ ସୁରେଶ ଭାରଦ୍ବାଜ ଏବଂ ରାକେଶ ପଠାନିୟାଙ୍କ ଆସନ ବଦଳି ଯାଇଛି । ମୁଖ୍ୟମନ୍ତ୍ରୀ ଜୟରାମ ଠାକୁର ଆଗୁଆ ରହିଥିଲେ । ଷଷ୍ଠ ଥର ପାଇଁ ବାଜ ମାରି ନେଇଛନ୍ତି ମୁଖ୍ୟମନ୍ତ୍ରୀ ଜୟରାମ ଠାକୁର । ସେରାଜ ଆସନରୁ ବାଜିମାତ କରିଛନ୍ତି ଜୟରାମ ଠାକୁର । ଜାଣନ୍ତୁ ସମସ୍ତ ମନ୍ତ୍ରୀଙ୍କ ନିର୍ବାଚନ ପରିଣାମ । 3 ସ୍ବାଧୀନ ପ୍ରାର୍ଥୀ ଆଗରେ ରହିଛନ୍ତି ।
ଜୟରାମ ଠାକୁର: ସିଏମ ଜୟରାମ ଠାକୁର ମଣ୍ଡି ଜିଲ୍ଲା ସେରାଜ ଆସନରୁ ଲଢିଥିଲେ । ତାଙ୍କ ସାମ୍ନାରେ ଥିଲେ ଚେତରାମ ଠାକୁର । ଦୁଇ ଠାକୁରଙ୍କ ମଧ୍ୟ ଛକାପଞ୍ଝା ଦେଖିବାକୁ ମିଳିଥିଲା । ଆରମ୍ଭରୁ ଆଗୁଆ ଥିଲେ ଜୟରାମ ଠାକୁର । 57 ବର୍ଷୀୟ ଜୟରାମ ଠାକୁର ପାଞ୍ଚଟି ନିର୍ବାଚନ ବିଜେପି ପକ୍ଷରୁ ଲଢିଛନ୍ତି । 1998. 2003, 2007, 2012 ଓ 2017ରେ ବିଜୟ ହାସଲ କରିଥିଲେ । ଷଷ୍ଠ ଥର ପାଇଁ ଜୟରାମ ଠାକୁର ବିଜୟ ହାସଲ କରିଛନ୍ତି । ସମସ୍ତ 8 ରାଉଣ୍ଡରେ ଜୟରାମ ଠାକୁର ଆଗରେ ରହିଥିଲେ ।
ସୁରେଶ ଭାରଦ୍ବାଜ: କସୁମ୍ପ୍ଟି ବିଧାନସଭା ଆସନରୁ ବିଜେପି ପ୍ରାର୍ଥୀ ତଥା ନଗର ଉନ୍ନୟନ ମନ୍ତ୍ରୀ ସୁରେଶ ଭାରଦ୍ବାଜଙ୍କ ଭାଗ୍ୟ ନିର୍ଦ୍ଧାରଣ ହେଉଛି। ତାଙ୍କ ମୁକାବିଲା କଂଗ୍ରେସର ଅନିରୁଦ୍ଧଙ୍କ ସହିତ ହେଉଛି । ଅନିରୁଦ୍ଧଙ୍କଠୁ ପଛରେ ପଡିଛନ୍ତି ସୁରେଶ ।
ରାକେଶ ପଠାନିଆ: ନୁରପୁରର ବିଧାୟକ ଏବଂ ଜୟରାମ ସରକାରରେ ଜଙ୍ଗଲ ମନ୍ତ୍ରୀ ରାକେଶ ପଠାନିଆ ଫତେହପୁରରୁ ମଇଦାନରେ ଅଛନ୍ତି। ଏହି ଆସନର ବିଶେଷତ୍ବ ସର୍ବଦା ରହିଆସିଛି କୌଣସି ବାହାର ଲୋକ ଏହି ସିଟ୍ ଜିତି ନାହାଁନ୍ତି । କଂଗ୍ରେସ ପ୍ରତିନ୍ଦ୍ବଦୀଠୁ ପଛରେ ରହିଛନ୍ତି ରାକେଶ ପଠାନିଆ।
ବିକ୍ରମ ସିଂ ଠାକୁର: ବିକ୍ରମ ସିଂ ହିମାଚଳ ପ୍ରଦେଶର ଶିଳ୍ପ ପରିବହନ, ଶ୍ରମ ଏବଂ ନିଯୁକ୍ତି ମନ୍ତ୍ରୀ। 2017 ରେ ବିକ୍ରମ ସିଂ ଯଶୱା ପରାଗପୁରରୁ ଜିତିଥିଲେ । 2012 ବିଧାନସଭା ନିର୍ବାଚନରେ ବିଜେପିର ବିକ୍ରମ ସିଂ ମଧ୍ୟ ଜିତିଥିଲେ। କ୍ରମାଗତ ଦୁଇଟି ନିର୍ବାଚନରେ ବିକ୍ରମ ସିଂ ବିଜୟ ହାସଲ କରିଥିଲେ। ଅନ୍ୟପକ୍ଷରେ କଂଗ୍ରେସ ପ୍ରାର୍ଥୀ ସୁରିନ୍ଦର ସିଂ ମାନକୋଟିଆ ମଧ୍ୟ ରାଜନୀତିର ଜଣେ ଅଭିଜ୍ଞ ଖେଳାଳି। ହିମାଚଳ ପ୍ରଦେଶର ଏକ ବଡ଼ ରାଜନୈତିକ ଚେହେରା ମଧ୍ୟରୁ ଜଣେ ମାନକୋଟିଆ । ଏଭଳି ପରିସ୍ଥିତିରେ ବିକ୍ରମ ସିଂ ବିଜୟକୁ ବଜାୟ ରଖିବା ଚ୍ୟାଲେଞ୍ଜ ହୋଇଛି । ବିକ୍ରମ ସିଂ ଠାକୁର ଏପର୍ଯ୍ୟନ୍ତ ଟ୍ରେଣ୍ଡରେ ଆଗୁଆ ଅଛନ୍ତି ।
ସରବୀନ ଚୌଧୁରୀ: ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରୀ ସରବୀନ ଚୌଧୁରୀ ଧୁରୀ ଶାହାପୁର ଆସନରୁ ମଇଦାନରେ ରହିଛନ୍ତି । ତାଙ୍କ ଆଗରେ ଅଛନ୍ତି ମେଜର ବିଜୟ ସିଂ । ଏହି ବିଧାନସଭା ନିର୍ବାଚନରେ ମେଜରଙ୍କ ସମର୍ଥକମାନେ ସରବୀନ ଚୌଧୁରୀଙ୍କୁ ସମର୍ଥନ କରିଥିବା କୁହାଯାଉଛି । ବର୍ତ୍ତମାନ ସୁରବୀନ ଚୌଧୁରୀ ପଛୁଆ ଚାଲିଛନ୍ତି ।
ରାଜୀବ ସୈଜଲ: କସୋଲି ବିଧାନସଭା ଆସନରୁ ବିଧାୟକ ତଥା ସ୍ବାସ୍ଥ୍ୟମନ୍ତ୍ରୀ ରାଜୀବ ରାଜ୍ୟ ରାଜନୀତିର ଏକ ବଡ଼ ଚେହେରା। ରାଜୀବ ସୈଜଲ ଏହି ଆସନରୁ ଲଗାତାର ତିନିଟି ନିର୍ବାଚନରେ ବିଜୟୀ ହୋଇଛନ୍ତି ଏବଂ ଚତୁର୍ଥ ଥର ପାଇଁ ପୁଣିଥରେ ମଇଦାନକୁ ଓହ୍ଲାଇଛନ୍ତି। କସୋଲିରୁ କଂଗ୍ରେସ ପ୍ରାର୍ଥୀ ବିନୋଦ ସୁଲତାନପୁରୀ ତୃତୀୟ ଥର ପାଇଁ ନିର୍ବାଚନ ଲଢୁଛନ୍ତି । 2012 ରେ ସୈଜଲ ଏବଂ ବିନୋଦ ସୁଲତାନପୁରୀଙ୍କ ମଧ୍ୟରେ ଭୋଟ ମାର୍ଜିନ ବହୁତ କମ୍ ଥିଲା | ଯେଉଁଥିରେ ରାଜୀବ ସୈଜଲ 24 ଭୋଟରେ ଜିତିଥିଲେ।
ଏହା ବି ପଢନ୍ତୁ...Himachal Pradesh Result: ପ୍ରାରମ୍ଭିକ ଟ୍ରେଣ୍ଡରେ ଆଗୁଆ କଂଗ୍ରେସ
ସୁଖରାମ: ପାବଟା ସାହିବ ଆସନରୁ ବିଜେପି ଏବଂ କଂଗ୍ରେସ ମଧ୍ୟରେ ମୁକାବିଲା ହେଉଛି । ଭାଜପାର ବର୍ତ୍ତମାନ ବିଧାୟକ ସୁଖରାମ ଚୌଧୁରୀଙ୍କୁ ଦ୍ବିତୀୟ ଥର ସୁଯୋଗ ଦିଆଯାଇଛି । 2017 ଓ 2012ରେ ସୁଖରାମ ଚୌଧୁରୀ କଂଗ୍ରେସର କରନେଶଙ୍କ ହରାଇଥିଲେ । ବର୍ତ୍ତମାନ ସୁଖରାମ ଆଗୁଆ ଅଛନ୍ତି ।
ରାଜେନ୍ଦ୍ର ଗର୍ଗ: ଜୟରାମ ସରକାରରେ ଖାଦ୍ୟ ଯୋଗାଣ ଏବଂ ଉପଭୋକ୍ତା ବ୍ୟାପାର ମନ୍ତ୍ରୀ ରାଜେନ୍ଦ୍ର ଗର୍ଗ ଗତ ନିର୍ବାଚନରେ ଘୁମାରବି ବିଧାନସଭା ଆସନରୁ ଜିତିଥିଲେ। କଂଗ୍ରେସର ରାଜେଶ ଧର୍ମାଣୀ ଲଗାତାର ଦୁଇଥର ବିଜୟ ହାସଲ କରିଥିଲେ ହେଲେ ମାତ୍ର 2017ରେ ତାଙ୍କ ହାତରୁ ଏହି ସିଟ ଖସି ଯାଇଥିଲା । ବର୍ତ୍ତମାନ ରାଜେନ୍ଦ୍ର ଗର୍ଗ ପଛରେ ଚାଲିଛନ୍ତି ।
ଗୋବିନ୍ଦ ସିଂ ଠାକୁର: ମନାଲି ବିଧାନସଭା ଆସନରେ ଗୋବିନ୍ଦ ସିଂ ଠାକୁର ଲାଗାତାର ତିନିଥର ବିଜୟୀ ହୋଇଛନ୍ତି । 15 ବର୍ଷ ହେବେ ଏହି ଆସନରେ ଆଧିପତ୍ୟ ଜମାଇ ରଖିଛନ୍ତି ଗୋବିନ୍ଦ । ଏଥର କିଛି ପରିବର୍ତ୍ତନ ହେବା ନେଇ ଦେଖା ଯାଉଛି । କଂଗ୍ରେସ ପ୍ରତିନ୍ଦ୍ବନ୍ଦୀ ଭୁବନେଶ୍ବର ଗୌଡଙ୍କଠୁ ପଛରେ ପଡିଛନ୍ତି ଗୋବିନ୍ଦ ।
ବିରେନ୍ଦ୍ର କଂବର: 58 ବର୍ଷୀୟ ବର୍ତ୍ତମାନ ଗ୍ରାମୀଣ ବିକାଶ ପଞ୍ଚାୟତରାଜ ମନ୍ତ୍ରୀ ହେଉଛନ୍ତି ବିରେନ୍ଦ୍ର କଂବର । 2017ରେ ବିରେନ୍ଦ୍ର କଂଗ୍ରେସର ବିବେକ ଶର୍ମାଙ୍କୁ ହରାଇଥିଲେ । ଗତ ଚାରି ଚାରି ଥର ଏଠାରେ ଜିତି ଆସିଛନ୍ତି ବିରେନ୍ଦ୍ର । ଏଥର ବିଜୟଧାରା ବଜାୟ ରଖିବା ଏକପ୍ରକାର ଚ୍ୟାଲେଞ୍ଜ ହୋଇଛି । 49 ବର୍ଷୀୟ ଦେବେନ୍ଦ୍ର କୁମାର ଭୁଟ୍ଟା ଆଗୁଆ ଅଛନ୍ତି ।
ରାମଲାଲ ମାରକଣ୍ଡା: ଲାହୋଲ ସ୍ଥିତ ଏକମାତ୍ର ବିଧାନସଭା ଆସନରେ ଏଥର ରୋଚକ ମୋଡରେ ରହିଛି ମୁକାବିଲା। ଏଥର ଏଠାରେ 73.75 ପ୍ରତିଶତ ଭୋଟ ଗ୍ରହଣ ହୋଇଛି । ବିଜେପିର ରାମଲାଲ ମାରକଣ୍ଡା ଏହି ଆସନରୁ ଲଢୁଛନ୍ତି । ବର୍ତ୍ତମାନ ରାମଲାଲ ପ୍ରତିନ୍ଦ୍ବନ୍ଦୀ ରବି ଠାକୁରଙ୍କଠୁ ଆଗରେ ଚାଲିଛନ୍ତି ।
ପ୍ରକାଶ ଥାଉ କି ନଭେମ୍ବର 12 ତାରିଖରେ ହିମାଚଳ ପ୍ରଦେଶର 68 ଆସନରେ ଭୋଟ ଗ୍ରହଣ ହୋଇଥିଲା । 69.09 ପ୍ରତିଶତ ଭୋଟ ଗ୍ରହଣ ହୋଇଥିଲା ।
