ମୁମ୍ବାଇ: ମହାରାଷ୍ଟ୍ରର ରାଜଧାନୀ ମୁମ୍ବାଇ ଓ ଏହାର ଆଖପାଖ ଅଞ୍ଚଳରେ ଛୁଇଁଛି ଦକ୍ଷିଣ-ପଶ୍ଚିମ ମୌସୁମୀ । ଏହି କାରଣରୁ ଦେଶର ବିଜନେସ କ୍ୟାପିଟାଲ ଓ ଏହାର ଉପକଣ୍ଠରେ ପ୍ରବଳରୁ ଅତିପ୍ରବଳ ବର୍ଷା ହୋଇଛି ।
ମୌସୁମୀ ବର୍ଷା ଯୋଗୁଁ ଜଳାର୍ଣ୍ଣବ ହୋଇଛି ମୁମ୍ବାଇ । ଆଉ ଏହି କାରଣରୁ ମୁମ୍ବାଇର ଲାଇଫଲାଇନ କୁହାଯାଉଥିବା ଲୋକାଲ ଟ୍ରେନ ସେବାରେ ଉପୁଜିଛି ବାଧା ।
ଭାରତୀୟ ପାଣିପାଗ ବିଭାଗର ସୂଚନା ଅନୁଯାୟୀ, ମୁମ୍ବାଇ ଓ ପଡୋଶୀ ଥାନେ, ପାଲଘର ଓ ରାୟଗଢ ଜିଲ୍ଲା ପାଇଁ ଜାରି ହୋଇଛି ରେଡ ଆଲର୍ଟ । ବୁଧବାର କିଛି ସ୍ଥାନରେ ପ୍ରବଳ ବର୍ଷା ନେଇ ଚେତାବନୀ ଦେଇଛି ଆଇଏମଡି ।
ଆଇଏମଡି ବୁଧଧବାର ନିଜ ପୂର୍ବାନୁମାନରେ କହିଛି ଯେ ସାଟେଲାଇଟରୁ ମିଳିଥିବା ରିପୋର୍ଟ ଅନୁଯାୟୀ, ମୁମ୍ବାଇ ଓ ଏହାର ଆଖପାଖ ଅଞ୍ଚଳରେ 3ରୁ 4 ଦିନ ମଧ୍ୟରେ ପ୍ରବଳ ବର୍ଷା ହୋଇପାରେ । କିଛି ସ୍ଥାନରେ ବିଜୁଳ ଘଡଘଡି ସହ ବର୍ଷା ହେବାର ମଧ୍ୟ ଆଶଙ୍କା ରହିଛି ।
ଅଧିକାରୀଙ୍କ କହିବାନୁଯାୟୀ, ମୁମ୍ବାଇର ଛତ୍ରପତି ଶିବାଜୀ ମହାରାଜ ଟର୍ମିନାଲରୁ ଥାନେ, ନବି ମୁମ୍ବାଇର ଭାସି ପର୍ଯ୍ୟନ୍ତ ଯାଉଥିବା ଲୋକାଲ ଟ୍ରେନ ସେବା ବାଧାପ୍ରାପ୍ତ ହଇଛି । ରେଳଧାରଣା ପାଣିରେ ବୁଡି ରହିଥିବାରୁ ଅନେକ ଟ୍ରେନ ବାତିଲ କରାଯାଇଛି ।
