ମୁମ୍ବାଇ: ମହାରାଷ୍ଟ୍ରରେ ଲାଗି ରହିଥିବା ସଙ୍କଟ ମଧ୍ୟରେ ଆସନ୍ତାକାଲି(ଗୁରୁବାର) ବହୁମତର ପ୍ରମାଣ ଦେବ ଉଦ୍ଧବ ଠାକରେଙ୍କ ନେତୃତ୍ବାଧୀନ ସରକାର । ଗୃହରେ ଫ୍ଲୋର ଟେଷ୍ଟ ପାଇଁ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଚିଠି ଲେଖିଛନ୍ତି ରାଜ୍ୟପାଳ ଭଗତ ସିଂ କୋଶିୟାରୀ । ଗତକାଲି ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ଦେବେନ୍ଦ୍ର ଫଡନାଭିସ ରାଜ୍ୟପାଳଙ୍କୁ ଭେଟି ଫ୍ଲୋର ଟେଷ୍ଟ ପାଇଁ ଦାବି ଜଣାଇଥିଲେ । ଆଜି ଔପଚାରିକ ଭାବେ ରାଜ୍ୟପାଳ ମୁଖ୍ୟମନ୍ତ୍ରୀ ଉଦ୍ଧବଙ୍କୁ ଚିଠି ଲେଖି ଆସନ୍ତାକାଲି ଗୃହରେ ସଂଖ୍ୟା ବହୁମତର ପ୍ରମାଣ ଦେବାକୁ କହିଛନ୍ତି ।
ଶିବସେନାର 38 ବିଦ୍ରୋହୀ ବିଧାୟକ ମହାବିକାଶ ଅଘାଡି ମେଣ୍ଟ (MVA)ରୁ ସମର୍ଥନ ପ୍ରତ୍ୟାହାର କରିସାରିଥିବା ବେଳେ ଉଦ୍ଧବ ଠାକରେଙ୍କ ନେତୃତ୍ବାଧୀନ ସରକାର ବର୍ତ୍ତମାନ ବହୁମତ ହରାଇ ସାରିଥିବା ଗତକାଲି ରାଜ୍ୟପାଳଙ୍କୁ ଅବଗତ କରିଥିଲା ବିରୋଧୀ ବିଜେପି । ବିରୋଧୀ ଦଳ ନେତା ଦେବେନ୍ଦ୍ର ଫଡନାଭିସଙ୍କ ନେତୃତ୍ବରେ ବରିଷ୍ଠ ବିଜେପି ନେତାଙ୍କ ଏକ ପ୍ରତିନିଧି ଟିମ ଗତକାଲି ରାଜ୍ୟପାଳ କୋଶିୟାରୀଙ୍କୁ ଭେଟି ଏପ୍ରକାର ଦାବି ଜଣାଇଥିଲେ ।
ସାମ୍ବିଧାନିକ ବ୍ୟବସ୍ଥା ଅନୁସାରେ ଏପରି ସଙ୍କଟ ସମୟରେ ବିରୋଧୀ ଦଳ ପକ୍ଷରୁ ସରକାରଙ୍କ ବହୁମତ ସଂଖ୍ୟା ଉପରେ ସନ୍ଦେହ ସୃଷ୍ଟି ହେଲେ, ରାଜ୍ୟପାଳଙ୍କ ଆହ୍ବାନ କ୍ରମେ ସରକାରଙ୍କୁ ଗୃହରେ ସଂଖ୍ୟା ବହୁମତର ପ୍ରମାଣ ଦେବାକୁ ହୋଇଥାଏ । ଗୃହରେ ବହୁମତ ଦର୍ଶାଇବାରେ ବିଫଳ ହେଲେ ମୁଖ୍ୟମନ୍ତ୍ରୀ ଇସ୍ତଫା ଦେବା ସହ ସରକାର ଭଙ୍ଗ ହୋଇଥାଏ । ଏହା ସହ ରାଜ୍ୟପାଳ ବିରୋଧୀଙ୍କୁ ସରକାର ଗଠନ ପାଇଁ ନିମନ୍ତ୍ରଣ ମଧ୍ୟ କରିଥାନ୍ତି ।
ତେବେ ଠାକରେ ସରକାର ଆସନ୍ତାକାଲି ଫ୍ଲୋର ଟେଷ୍ଟ ଦେବାକୁ ଯାଉଥିବା ବେଳେ ଆବଶ୍ୟକ ସଂଖ୍ୟା ପ୍ରମାଣିତ କରିବାରେ ମହାବିକାଶ ଅଗାଡି ମେଣ୍ଟ ବିଫଳ ହେବାର ସମ୍ଭାବନା ମଧ୍ୟ ପ୍ରାୟ ସ୍ପଷ୍ଟ । ଶିବସେନାର 38 ବିଧାୟକ ଓ କିଛି ସ୍ବାଧୀନ ବିଧାୟକଙ୍କୁ ମିଶାଇ ଏକନାଥ ସିନ୍ଧେଙ୍କ ନିକଟରେ 40ରୁ ଊର୍ଦ୍ଧ୍ବ ବିଧାୟକଙ୍କ ସମର୍ଥନ ରହିଛି ।
ଉଦ୍ଧବଙ୍କ ଇସ୍ତଫା ପରେ ସିନ୍ଧେ ଗୋଷ୍ଠୀ ସହାୟତାରେ ବିରୋଧି ବିଜେପି କ୍ଷମତା ହାତେଇବା ସହ ପୂର୍ବତନ ମୁଖ୍ୟମନ୍ତ୍ରୀ ତଥା ବର୍ତ୍ତମାନର ବିରୋଧୀ ଦଳ ନେତା ଦେବେନ୍ଦ୍ର ଫଡନାଭିସ ହି ମୁଖ୍ୟମନ୍ତ୍ରୀ ଭାବେ ଶପଥ ନେଇପାରନ୍ତି । ଗଠନ ହେବାକୁ ଥିବା ନୂଆ ସରକାରର କିଙ୍ଗ ମେକର କୁହାଯାଉଥିବା ଏକନାଥ ସିନ୍ଧେ ଓ ତାଙ୍କ ସହଯୋଗୀ ବିଧାୟକଙ୍କୁ ମଧ୍ୟ ଏକାଧିକ ଗୁରୁତ୍ବପୂର୍ଣ୍ଣ ମନ୍ତ୍ରୀ ପଦ ମଧ୍ୟ ମିଳିପାରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
