ପାନାଜି: ଗୋଆରେ ପୁଣି ବଢିଲା କୋରୋନା କର୍ଫ୍ୟୁ । ଜୁନ୍ 28 ପର୍ଯ୍ୟନ୍ତ କର୍ଫ୍ୟୁକୁ ବୃଦ୍ଧି କଲେ ରାଜ୍ୟ ସରକାର । କୋରୋନା ସଂକ୍ରମଣକୁ ଦୃଷ୍ଟିରେ ରଖି ଏପରି ନିଷ୍ପତ୍ତି ନିଆଯାଇଛି । ମଲ୍, ମାଛ ବଜାର ଓ ଷ୍ଟୋରଗୁଡିକ ସୋମବାର ଠାରୁ ଖୋଲିବ । ସିନେମା ହଲ୍, ପ୍ରେକ୍ଷାଳୟ, ମଲ୍ଟିପ୍ଲେକ୍ସ, ମନୋରଞ୍ଜନ ଜୋନ୍ ବ୍ୟତୀତ ସପିଂ ମଲ୍ ଗୁଡିକରେ ଦୋକାନଗୁଡିକ ସକାଳ 7 ଟାରୁ 3 ଟା ମଧ୍ୟରେ ଖୋଲା ରହିବ। ଏନେଇ ମୁଖ୍ୟମନ୍ତ୍ରୀ ପ୍ରମୋଦ ସାଓ୍ବନ୍ତ ଟ୍ବିଟ କରି ସୂଚନା ଦେଇଛନ୍ତି ।
କୋଭିଡ ସଂକ୍ରମଣ ଓ ମୃତ୍ୟୁକୁ ଦୃଷ୍ଟିରେ ରଖି ମେ 9ରେ ରାଜ୍ୟ ସ୍ତରୀୟ କର୍ଫ୍ୟୁ ଲାଗୁ କରାଯାଇଥିଲା । ଲାଗୁ ହେବା ପରଠାରୁ ପର୍ଯ୍ୟାୟକ୍ରମେ ପାଞ୍ଚ ଥର କର୍ଫ୍ୟୁ ବୃଦ୍ଧି କରାଯାଇଥିଲା । ସେହିପରି ଉତ୍ତରପ୍ରଦେଶ ସରକାର ଜୁନ୍ 21 ରୁ ଦୁଇ ଘଣ୍ଟା ପର୍ଯ୍ୟନ୍ତ ନାଇଟ କର୍ଫ୍ୟୁକୁ ଆରାମ ଦେଇ ସପ୍ତାହକ ମଧ୍ୟରେ ରାତି 9 ଟା ପର୍ଯ୍ୟନ୍ତ ଦୋକାନ, ମଲ୍ ଏବଂ ରେଷ୍ଟୁରାଣ୍ଟ ଖୋଲିବାକୁ ଅନୁମତି ଦେଇଛନ୍ତି। ଶନିବାର ଏବଂ ରବିବାର ସାପ୍ତାହିକ ଛୁଟି ହେବ ବୋଲି ମୁଖ୍ୟ ଶାସନ ସଚିବ ଆର କେ ତିୱାରୀ କହିଛନ୍ତି।
ଏହାପୂର୍ବରୁ ରାତି 7 ଟାରୁ ସକାଳ 7 ଟା ପର୍ଯ୍ୟନ୍ତ ରାତ୍ରି କର୍ଫ୍ୟୁ ଲାଗୁ କରାଯାଇଥିଲା। କଣ୍ଟେନମେଣ୍ଟ ଜୋନ ବାହାରେ ବଜାର ଖୋଲିବ, 50 ପ୍ରତିଶତ କ୍ଷମତା ବିଶିଷ୍ଟ ହୋଟେଲ ଏବଂ ମଲ୍ ଖୋଲିବା ସହିତ ବିଭିନ୍ନ କାର୍ଯ୍ୟକଳାପ ଅନୁମତି ଦିଆଯିବ | ବିବାହ ଏବଂ ଅନ୍ୟାନ୍ୟ କାର୍ଯ୍ୟ ସମୟରେ ଉଭୟ ଖୋଲା ଏବଂ ବନ୍ଦ ସ୍ଥାନରେ ସର୍ବାଧିକ 50 ଜଣଙ୍କୁ ଅନୁମତି ଦିଆଯିବ ଏବଂ ଏକ ସମୟରେ କେବଳ ଧାର୍ମିକ ସ୍ଥାନରେ 50 ଜଣଙ୍କୁ ଅନୁମତି ଦିଆଯିବ ବୋଲି ନିର୍ଦ୍ଦେଶାବଳୀରେ କୁହାଯାଇଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
