ନୂଆଦିଲ୍ଲୀ: ଆମେରିକାର ଆର୍ଥିକ ଅନୁସନ୍ଧାନକାରୀ ସଂସ୍ଥା ହିଣ୍ଡନବର୍ଗ ରିପୋର୍ଟ ପ୍ରକାଶ କରିବା ପରେ ଆଦାନୀ ଗ୍ରୁପ କମ୍ପାନୀରେ ଆସିଛି ସୁନାମି । ଯାହାଦ୍ବାରା ଦୋହଲିଯାଇଛି ଗୌତମ ଆଦାନୀଙ୍କ ସାମ୍ରାଜ୍ୟ । ସମୟ ସହିତ ତାଙ୍କ ନେଟୱର୍ଥ ରୋଜଗାର ଧୀରେ ଧୀରେ ହ୍ରାସ ପାଇବାରେ ଲାଗିଛି । ଯାହାର ପରିଣାମ ତାଙ୍କ କ୍ୟାରିଅର ଉପରେ ମଧ୍ୟ ଦେଖିବାକୁ ମିଳିଛି । ବିଶ୍ବର ୧୦ ପ୍ରମୁଖ ଶିଳ୍ପପତି ତାଲିକାରୁ ପୂର୍ବରୁ ଖସିଥିବା ବେଳେ ଏବେ ୨୦ ଜଣଙ୍କ ମଧ୍ୟରେ ଆଦାନୀ ନଥିବା ଜଣାପଡ଼ିଛି । ବିଶ୍ବର ସର୍ବଶ୍ରେଷ୍ଠ ୨୦ ଧନିକ ଶ୍ରେଣୀ ବ୍ୟକ୍ତିଙ୍କ ତାଲିକାରୁ ଖସିଛନ୍ତି ଆଦାନୀ ।
ଆଦାନୀ ୧୦ଦିନରେ ହରାଇଲା ୫୨ ଆରବ ଡଲାର:- Bloomberg Billionaires Index ଅନୁସାରେ ଗୌତମ ଆଦାନୀଙ୍କ ନେଟୱର୍ଥ ହ୍ରାସ ପାଇବା ପରେ ଏବେ ସେ ଶ୍ରେଷ୍ଠ ୨୦ ଧନୀ ତାଲିକାରୁ ବାଦ ପଡି ୨୧ତମ ସ୍ଥାନରେ ରହିଛନ୍ତି । ତାଙ୍କ ମୋଟ ସମ୍ପତି ହ୍ରାସ ପାଇ ଏବେ ଏହାର ମୂଲ୍ୟ ୬୧.୩ ଆରବ ଡଲାର ରହିଛି । ଗତ ୨୪ ଘଣ୍ଟାରେ ଆଦାନୀଙ୍କୁ ୧୦.୭ ଆରବ ଡଲାରର କ୍ଷତି ହୋଇଛି । ସେହିପରି Forbes Real Time Billionaire List ଅନୁସାରେ ୫୫.୮ ବିଲିୟନ ଡଲାର ନେଟୱର୍ଥ ସହିତ ସେ ୨୨ତମ ସ୍ଥାନରେ ରହିଛନ୍ତି ।
ଗୁରୁବାର ଆଦାନୀ ୬୪.୭ ଆରବ ଡଲାର ସହ ବିଶ୍ବର ଧନୀ ଶ୍ରେଣୀ ତାଲିକାର ୧୬ ନମ୍ବର ସ୍ଥାନରେ ରହିଥିଲେ । ମାତ୍ର ଗତ ୨୪ ଘଣ୍ଟାରେ ସେ ୫ଟି ପାହ୍ୟା ଖସି ଏବେ ୨୧ତମ ସ୍ଥାନରେ ପହଞ୍ଚିଛନ୍ତି । ଆଦାନୀ ଗ୍ରୁପର କ୍ଷତି ସମ୍ପର୍କରେ ଆଲୋଚନା କଲେ ବ୍ଲୁମବର୍ଗ ରିପୋର୍ଟ ଅନୁସାରେ ସେ ଏହି ବର୍ଷରେ ଏଯାବତ ୫୯.୨ ଆରବ ଡଲାରର କ୍ଷତି ସହିଛି । ଗତ ୧୦ଦିନ ମଧ୍ୟରେ ସେ ୫୨ ଆରବ ଡଲାର କ୍ଷତି ସହିଛନ୍ତି । ଗତ ଏକ ସପ୍ତାହ ମଧ୍ୟରେ ଗୌତମ ଆଦାନୀଙ୍କ କମ୍ପାନୀ କ୍ଷତି ସହିବା ପରେ ଷ୍ଟକ୍ ମାର୍କେଟରେ ମଧ୍ୟ କମ୍ପାନୀ ପ୍ରଭାବିତ ହୋଇଛି । ତାଙ୍କ କମ୍ପାନୀର ମୋଟ ବଜାର କ୍ୟାପ୍ ୧୦୦ ବିଲିୟନ ଡଲାରରୁ ଅଧିକ ହ୍ରାସ ପାଇଛି। ନିମ୍ନରେ ଦିଆଯାଇଥିବା ଚାର୍ଟ ଗୁରୁବାର ଆଦାନୀ ସେୟାରର ହ୍ରାସ ଏବଂ ଏହାର ମୂଲ୍ୟକୁ ଦର୍ଶାଇଛି ।
| ଆଦାନୀ ସେୟାର ନାମ | ଶେୟାରରେ ହ୍ରାସ (ଶତକଡାରେ) | ଶେୟାରର ମୂଲ୍ୟ |
| Adani Enterprises Ltd | 21.61 | 1,694.10 ଟଙ୍କା |
| Adani Power Ltd | 4.98 | 202.05 ଟଙ୍କା |
| Adani Wilmar Ltd | 5 | 421.00 ଟଙ୍କା |
| Adani Green Energy Ltd | 10 | 1,039.85 ଟଙ୍କା |
| Adani Total Gas Ltd | 10 | 1,707.70 ଟଙ୍କା |
| Adani Transmission Ltd | 10 | 1,551.15 ଟଙ୍କା |
| Adani Ports | 4.66 | 472.10 ଟଙ୍କା |
ମୁକେଶ ଅମ୍ବାନୀ ବି Top-10 ତାଲିକାରୁ ବାଦ:- ଗୋଟିଏ ପଟେ ଗୌତମ ଆଦାନୀ ଟପ୍-୨୦ ତାଲିକାରୁ ବାଦ୍ ପଡିଥିବା ବେଳେ ଏପଟେ ମୁକେଶ ଅମ୍ବାନୀ ମଧ୍ୟ ଟପ୍-୧୦ ତାଲିକାରୁ ବାଦ ପଡିଛନ୍ତି । ମୁକେଶ ଅମ୍ବାନୀଙ୍କ ନେଟୱର୍ଥ ଏବେ ୮୦.୩ ଆରବ ଡଲାର ରହିଥିବା ବେଳେ ସେ Bloomberg Billionaires Indexର ୧୨ତମ ସ୍ଥାନରେ ପହଞ୍ଚିଛନ୍ତି ।
