ଚଣ୍ଡିଗଡ଼: ଶିବସେନା ନେତା ସୁଧୀର ସୁରୀଙ୍କୁ ଗୁଳିକରି ହତ୍ୟା । ପଞ୍ଜାବ ଅମୃତସରର ଗୋପାଳ ମନ୍ଦିର ସମ୍ମୁଖରେ ସୁଧୀର ସୁରୀଙ୍କୁ ପାଞ୍ଚଥର ଗୁଳି ଚାଳନା କରି ହତ୍ୟା କରାଯାଇଛି । ଗୁଳି ଚଳାଇଥିବା ବ୍ୟକ୍ତିକୁ ଗିରଫ କରାଯାଇଥିବା ବେଳେ ହତ୍ୟାରେ ବ୍ୟବହୃତ ବନ୍ଧୁକକୁ ଜବତ କରାଯାଇଛି । ସୁଧୀର ସୁରୀଙ୍କୁ ଗ୍ୟାଙ୍ଗଷ୍ଟାର ଲାଣ୍ଡାର ସାଥି ହତ୍ୟା କରିଥିବା ନେଇ ସେ ନିଜେ ସୋସିଆଲ ମିଡ଼ିଆରେ ପୋଷ୍ଟ କରିଛି । ଏହି ଘଟଣା ନେଇ ପୋଲିସର ତଦନ୍ତ ଆରମ୍ଭ ହୋଇଛି ।
ସୂଚନା ଅନୁଯାୟୀ, ଅମୃତସରର ଗୋପାଳ ମନ୍ଦିର ସମ୍ମୁଖରେ ଶିବସେନା ନେତା ସୁଧୀର ସୁରୀ ଧାରଣାରେ ବସିଥିଲେ । ଏହି ସମୟରେ କାରର ସନ୍ଦୀପ ସିଂ ନାମନ ଜଣେ ବ୍ୟକ୍ତି ଆସି ତାଙ୍କ ଉପରକୁ ଗୁଳି ଚଳାଇଥିଲା । ଦୁଇଟି ଗୁଳି ସୁଧୀରଙ୍କ ଛାତିରେ ବାଜିଥିଲା । ତାଙ୍କୁ ତୁରନ୍ତ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଛନ୍ତି । ତେବେ ପୋଲିସର କଡ଼ା ସୁରକ୍ଷା ସତ୍ତ୍ବେ କିଭଳି ହତ୍ୟାକାରୀ ସୁଧୀରଙ୍କ ଉପରେ ଗୁଳି ଚାଳନା କଲା ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଅନ୍ୟପଟେ ଗ୍ୟାଙ୍ଗଷ୍ଟାର ଲଣ୍ଡା ହରିକେ ଏହି ହତ୍ୟାକାଣ୍ଡର ଦାୟିତ୍ବ ଗ୍ରହଣ କରିଥିବାବେଳେ ଏନେଇ ନିଜେ ସୋସିଆଲ ମିଡ଼ିଆରେ ପୋଷ୍ଟ କରି ଖୋଲାଖୋଲି ଭାବେ ଚ୍ୟାଲେଞ୍ଜ ଦେଇଛି ।
ଗ୍ୟାଙ୍ଗଷ୍ଟାର ଲଣ୍ଡା ନିଜ ଫେସବୁକ ପୋଷ୍ଟରେ ଲେଖିଛି, "ଅମୃତସରରେ ଆମ ଭାଇମାନଙ୍କ ଦ୍ବାରା ସୁଧୀର ସୁରୀଙ୍କ ହତ୍ୟା କରାଯାଇଛି । ଦେଶ, ଜାତି କିମ୍ବା କୌଣସି ଧର୍ମ ବିରୋଧରେ କହୁଥିବା ବ୍ୟକ୍ତିମାନେ ପ୍ରସ୍ତୁତ ରୁହନ୍ତୁ । ଯେଉଁମାନେ ସୁରକ୍ଷା ବଳୟ ମଧ୍ୟରେ ରହୁଛନ୍ତି ଭାବନ୍ତୁନି ସେମାନେ ଏଥିରୁ ବଞ୍ଚିଯିବେ । ଯିଏ ଆମକୁ ସମର୍ଥନ କରିଛନ୍ତି ଆମେ ସେମାନଙ୍କ ସହ ଠିଆ ହେବୁ ।"
ଏହା ମଧ୍ୟ ପଢ଼ନ୍ତୁ: ପଞ୍ଜାବରେ ଆପ କାଉନସିଲରଙ୍କୁ ଗୁଳିକରି ହତ୍ୟା
ତେବେ ଏହି ପୋଷ୍ଟର ସତ୍ୟତାକୁ ନେଇ ପୋଲିସ ଯାଞ୍ଚ ଆରମ୍ଭ କରିଛି । କାରଣ ପୋଷ୍ଟଟି ଏକ ସ୍କ୍ରିନସଟ ହୋଇଥିବାବେଳେ ପୋଷ୍ଟକୁ ଡିଲିଟ କରିଦିଆଯାଇଛି । ଏହା କେଉଁଠାରୁ ପୋଷ୍ଟ କରାଯାଇଛି ସେନେଇ ସାଇବର ସେଲ ଯାଞ୍ଚ କରୁଥିବା ପୋଲିସ ସୂଚନା ଦେଇଛି । ପଞ୍ଜାବର ଡିଜିପି ଗୌରଭ ଯାଦବ କହିଛନ୍ତି, "ଏହି ଘଟଣା ନେଇ ଏକ ହତ୍ୟା ମାମଲା ରୁଜୁ କରି ଅଭିଯୁକ୍ତ ସନ୍ଦୀପ ସିଂ ସନ୍ନିକୁ ଗିରଫ କରାଯାଇଛି । ସନ୍ଦୀପ 32 ବୋର ଲାଇସେନ୍ସପ୍ରାପ୍ତ ବନ୍ଧୁକ ବ୍ୟବହାର କରି 5ଟି ଗୁଳି ଚଳାଇଥିଲା । ତେବେ ସୁରୀଙ୍କ ଶରୀରରେ କେତୋଟି ଗୁଳି ବାଜିଛି ମୃତଦେହ ବ୍ୟବଚ୍ଛେଦ ରିପୋର୍ଟ ଆସିଲେ ଜଣାପଡ଼ିବ । ବର୍ତ୍ତମାନ ପର୍ଯ୍ୟନ୍ତ ହତ୍ୟାର କାରଣ ସ୍ପଷ୍ଟ ହୋଇନାହିଁ । ହତ୍ୟା ପଛରେ କୌଣସି ସଂଗଠନ ଅଛି ନା ଏହା ଷଡଯନ୍ତ୍ର ହୋଇଛି ସେନେଇ ତଦନ୍ତ ଜାରି ରହିଛି ।
